Press "Enter" to skip to content

Kyntu ka RBYF ïa ka Sorkar ban khang ïa ki Trok kit dewïong ba ïaid na Nonglum-Umshaw, Ri Bhoi

Nongpoh, K’lyngkot 22: Kum kawei na ka seng kaba ju shakri na ka bynta ka bha ka miat bad ka roi ka par ki paidbah ha Ri Bhoi, ka RBYF Umshaw Unit ha Ri Bhoi District ka la mih ban kyntu syndon sha ki bor bahalor jong ka sorkar ba ka dei ban khang noh shi syndon ban iaid ki Trok Dewiong na ka surok shnong kaba rung na Nonglum ban mih sha 14mer bad ban iaid lyngba ka surok Mawhati ban mih sha ka surokbah ha Umsning.
Ka RBYF Umshaw Unit ka la pynpaw ka jingpyrsha ban iaid ki Trok Dewiong na katei ka surok shnong namar kane ka la ktah ïa ka leit ka wan ki paidbah bad ruh ka la wan rah ka jingduhnong kaba khraw ïa ki paidbah ba ka surok ka la jot la pei na ka daw ka jingiaid ki kali kit dewiong na katei ka surok Shnong.
Haba pyntip halor kane ka jingpyrshah ban ïaid ki Kali Dewiong na katei ka surok, u President ka RBYF Umsaw Unit, u Bah Joy Makri u la ong ba ïa kane ka rai la shim hi da ka seng hadien ba ki paidbah ki la pan ka jingkyrshan ban ban khang pyrshah ïa ka jingiaid ki trok Dewiong ba kane ka la ktah ïa ki paidbah kiba leit ba wan na katei ka surok kaba la sniew bad jot naduh ba wan rung tuh ki trok dewiong na katei ka surok.
U la ïathuh ruh ba wat ki paidbah nongshong shnong ki la pynpaw ka jingsngewkhia kaba jur ban iaid ki trok dewiong namar kane ka ktah ym tang ba ka thud ha ka leit ka wan bad khamtam ka jingsniew ka surok kaba lada dang bteng ki trok dewiong ban iaid na katei ka surok kan poi ka por ba ki paidbah ki hap ban kynduh mawsiang ba ka surok ka la sniew sha ba palat da ka jingiaid ki trok Dewiong.
“Naduh ba ïaid ki Trok Dewiong kiba bun ki kynroh ki la twa bad ka rong ruh ka la khoh bad ha shi lynter ka surok la dap da ki thliew suda namar katei ka surok ka dei kaba la mang tang ban iaid ki kali rit ym bat iaid ki Kali heh” ong u Bah Joy Makri, nongïalam ka RBYF Umshaw Unit, bad bynrap ruh ba lada ki Trok Dewiong kin dang bteng ban iaid na katei ka surok na ka liang ka seng ka la rai ban pyshah bad ban bat shi syndon ban aiti sha ki bor jong ka aiñ” u la bynrap.
Khnang ban iada na ka jingshah pynjot ka surok da ka jingwan ki trok dewiong kiba rung tuh na katei ka surok Shnong, na ka liang ka RBYF ka kyntu naduh ka tnad PWD bad ruh ka bor District jong ka Ri Bhoi ba kin phah ban pahara ïa ka surok bad lada lap ba ki trok Dewiong kin dang rung tuh na katei ka surok ki dei ban kem bad ban pynshitom katkum ki kyndon jong ka aiñ, u la bynrap.