Press "Enter" to skip to content

Pynïasoh u Samuel, Kenstar & Noarem sha ka Kerala Blasters FC

Shillong, Kyllalyngkot 22: U Samuel J. Lyngdoh Kynshi, Kenstar Kharshong bad u Naorem Mahesh Singh ki la leit ban pynïasoh sha ka Kerala Blasters FC kaba dei ka reserve team jong ka lympung ïalehkai Second Division I-League jong ka samoi ïalehkai 2020.
U Samuel Lyngdoh Kynshi uba ïalehkai na shapdeng jong ka Shillong Lajong FC u la jop ïa ka Shillong Premier League ba la pynïaid da ka SSA bad ka Meghalaya State League ka MFA, ha kaba u la thep 9 kol ha baroh kitei ki ar tylli ki lympung ïalehkai jong u snem 2019.
U tei u rangïalehkai ba dang 19 snem karta ba na Meghalaya u la pynïason bad ka Shillong Lajong Academy ha u snem 2015 bad u la jop bun tylli ki tournament ha ka liang ki junior ba kynthup ïa ka U-18 I-League ha u snem 2017.
Ha ka Senior Level u la sdang ban mih madan ha ka I-League bad ka Shillong Lajong ha ka a27 tarik u Naiwieng 2017 bad u la thep ïa ka kol kaba nyngkong eh ha katei ka lympyng ha ka 2 tarik u Nohprah 2017 ha ka jingïakhun pyrshah bad ka Churchill Brothers FC u ba la kylla long ruh u rangïalehkai ba khynnah tam (Youngest Player) na Meghalaya ban ïoh thep kol kol ha ka karta kaba dang 17 snem jong katei ka lympung. Ha ka jingmih madan jong u ha katei ka lympung ïalehkai I-League, u Samuel J Lyngdoh Kynshi u la thep haduh 5 kol.
U Kenstar Kharshong u ba la long kapten ïa ka Shillong Lajong ha ka Shillong Premier League bad ka Meghalaya State League u la ïalehkai bha ha kaba u la ïarap ruh ïa ka Shillong Lajong FC ba rah nam lahduh ha baroh ar tylli kitei ki lympung ïalehkai jong u snem 2019.
U la khur ruh ïa ka nam Best Defender jong ka Shillong Premier League bad thep ruh 7 kol baroh kitei ki lympung ïalehkai. U Kenstar Kharshong 20 snem karta u ba ïalehkai kum u centre back u la pynïasoh bad ka Shillong Lajong Academy ha u snem 2013 bad u la jop ruh bun tylli ki tournament ha ka Junior Level bad ha ka U-18 I-League. Ha ka Senior Level u Kenstar Kharshong u la sdang ban mih madan ïa ka Shillong Lajong FC ha ka lympung ïalehkai I-League ha ka 5 tarik Kyllalyngkot 2018 kata pyrshah ïa ka Chennai City FC.
Haba phai sha u Naorem Mahesh Singh u la pynïasoh bad ka Shillong Lajong (Junior) ha u snem 2017 bad u la mih madan lynter naduh ba u la pynïasoh. U tei u rangïalehkai kadiang ba na Manipur u la ïoh ïa ka samoi ïalehkai kaba biang tam ha u 2019 ha kaba ka Shillong Lajong ka la jop ïa ka SPL bad ïa ka MSL. U Mahesh Singh u la thep haduh 12 kol kynthup ha ka SPL bad ka MSL bad u la ïarap ban ai thep kol (assist) kaba haduh 14 kol.
U tei u wing ba 20 snem karta u la sdang ban mih madan ha ka I-League ha ka 28 tarik Risaw 2018 ha ka jingïakhun pyrshah ïa ka Aizawl FC bad pynkhih jar nyngkong ha katei ka jingïakhun bad u la thep shuh sa 2 kol pyrshah ïa ka Minerva Punjab bad ka Churchill Brothers.
Ka Shillong Lajong ka ai khublei ktibok kitrwiang ïa kitei ki lai ngut ki rangïalehkai ban mih madan ïa ka Kerala Blasters kaba dei ruh na ka kynhun ba dang ïalehkai haduh mynta ïa ka samoi ïalehkai ISL.
Kum ban shu pynkynmaw hangne ba dang dang ha kine ki khyndait taïew ba lah dep, u Phrangki Buam (Shillong Lajong FC) u la la leit ban pynïasoh bad ka FC Bengaluru United na ka bynta katei ka lympung ïalehkai Second Division I-League 2020.