Press "Enter" to skip to content

Dawa ka JSU ïa ka Sorkar Jylla ban thung Prncipal bad Vice-Principal ha Govt. Girls HSS, Jowai

Kyntu ban maramot noh kham kloi ïa ka Hostel:

Jowai, K’lyngkot 25: Ka Jaiñtia Students’ Union (JSU) sengkmie ka pynpaw ka jingsngew bynñiaw halor ka jingbym don Principal bad vice Prnicipal ha ka skul Government Girls’ Higher Secondary School kaba don ha nongbah Jowai bad kane jingdkhoh treikam ka la wanrah ïa ka jingeh ha ka pule puthi bad ka jingduhnong kaba khraw ïa ki khynnah skul kiba thrang ïa ka jingnang jingstad.
Ha kaba ïadei bad kane ka seng lyngba u Education Secretary u samla Request Pakma ha ka kyrwoh ba la phah la ong ba ka seng ka la dawa na u Myntri ba dei peit ïa ka tand pule puthi jong ka sorkar jylla Meghalaya u ma Lakmen Rymbui, ban thung mardor noh ïa u Principal bad Vice Pricipal ha katei ka jaka pule shwa ban sdang noh ka por skul.
Ka seng ha ka juh ka por ka dawa ruh ban plie biang ïa ki Hostel jong katei ka skul, namar kumba long mynta katei ka Hostel haduh mynta ruh ym shym la don kano kano ka jingmaramot ïa ka Hostel. Shuh shuh ka seng JSU ka la pynpaw ba bun na ki khynnah skul ki dei kiba wan na ki shnong kiba jngai bad kiba thmu ban sah ha kane hostel hynrei ka la buh jingeh pat ïa ki khynnah skul ban sah namar kane ka Hostel ka la jot bad ym shim don kano kano ka jingmaramot na ka liang jong ka sorkar.
Na ka liang ka JSU ka dawa mardor na ka sorkar ba kam dei ban lap miet tang ban byrngem ha ki kot khubor ban khang khyrdep noh ïa ki 200 tylli ki skul, hynrei ka dei ban pynbha ban kyntiew shuwa ïa ki skul kiba pynïaid da ka sorkar khnang ba yn ïoh jingmyntoi ki khynnah skul jong ka jylla.