Press "Enter" to skip to content

Dawa ka RBYF ban kyntiew kyrdan mar- dor ia ka Byrnihat PHC sha ka CHC

Nongpoh, K’Lyngkot 25: Da ka jingsngewkhia kaba jur halor ka jinglong jingman jong kawei na ka jaka sumar paidbah kaba don hapoh Byrnihat kaba la tip kum ka Byrnihat Public Health Centre, ha kaba da ki hajar ngut ki paidbah nongshong shnong ki ju mad jingeh na ka por sha ka por, ha kaba kum kane, na ka liang ka Ri Bhoi Youth Federation (RBYF), Byrnihat Circle ka la dawa jur na ki bor sorkar khamtam na ka tnat jong Directorate of Health Services ba kan kyntiew kyrdan noh ïa kane ka PHC sha ka Community Health Centre.
Haba pyntip halor kane ka jingeh, ba la ju mad na ka por sha ka por da ki paidbah jong katei ka thaiñ, na ka liang u samla Vigyan Kharkongngor, President ka RBYF, Byrnihat Circle, u la pynpaw ïa ka jingsngewkhia kaba jur namar ba da ki hajar ngut ki paidbah kiba ju phah leit sumar pang ha katei ka Byrnihat PHC ki ju mad ïa shibun ki jingeh kiba kynthup naduh ka jingbym biang jong ka jingshalan ïa ki dawai bapher bapher ha kane ka jaka sumar pang paidbah.
“Ka Byrnihat PHC ka dei kawei na ki jaka sumar pang paidbah kaba la kham rim bad kaba la shakri da ki phew snem ha kane ka thaiñ ban pynbiang ïa ki lad jingsumar paidbah, hynrei ha kine ki snem kane ka jaka ai jingsumar paidbah ka la sdang ban dap da ki shibun ki jingduna kiba kynthup naduh ka jingduna ha ka liang ki nongtrei bad ruh wat ka jingpynbiang ïa ki dawai dashin kiba tikna bad kane ka dei kawei kaba la pynjynjar pat ïa ki paidbah jong kane ka thaiñ”, pynpaw u samla Kharkongngor.
U Bah Vigyan Kharkongngor haba kdew ruh, halor ka jinglong kordor jong katei ka jaka sumar pang paidbah, u la kdew ba kane ka jaka ai jingsumar paidbah ka peit ka khmieh ïa palat spah tylli ki shnong ki thaw kiba don hapoh ka thaiñ Jirang Konstituensi bad ruh da palat hajar ngut ki paidbah kiba shaniah ïa ki lad jingsumar lyngba kane ka jaka ai jingsumar, hynrei lada kumne kan dang ïai khlem da lah ban pynbiang ïa kitei ki jingduna, kan buh jingeh shikatdei eh ïa ki paidbah baroh.
Shuh shuh ruh, u saml Kharkongngor, u la ïathuh, ba ka jingdawa ban kyntiew kyrdan noh ïa ka Byrnihat PHC ka la don teng ruh ha ki snem kiba la leit noh hynrei na ka liang ki bor ba dei peit khamtam na ka liang ka sorkar jylla kim shem la phaikhmat satia sha kane ka jingdonkam jong ki paidbah, kumta sa shisien pat na ka liang ka RBYF, Byrnihat Circle ka la dawa jur na ka sorkar jylla bad ki bor ba dei peit ba ki dei ban kyntiew kyrdan noh mardor ïa kane ka PHC sha ka CHC na ka bynta ka bha ka miat bad ka jingmyntoi jong ki paidbah hi baroh, bynrap u Samla Kharkongngor.