Press "Enter" to skip to content

Ka BJP ka kwah ban pyndep ishu manifesto ym ki kam pynroi : Congress

Ki daw ka jingkyrduh pisa ki jylla NE:

Shillong, K’Lyngkot 25 : Ka Congress kaba don ha ka Liang Pyrshah jong ka Ïing Dorbar Thawaiñ ka jylla ka la kynthoh ba ki daw ka jingkyrduh pisa ha ki jylla ba don ha ka thaiñ shatei lam-mihngi jong ka Ri khamtam eh ha Meghalaya kadei namar ba ka thong treikam jong ka BJP kaba don ha ka sorkar pdeng kadei ban pyntreikam ïa ki ishu ba ka kular ha ka por elekshon ym ïa ki kam pynroi.
“Ka thong treikam jong ka BJP kaba bat ïa ka bor synshar ha ka Ri ka long beit ban ïoh pyntreikam ïa ki ishu kumba la kdew ha ka manifesto khamtam eh ban wanrah bad ïoh pynlong aiñ ia ka Citizenship Amendment Bill kaba la long mynta ka Act (CAA),” ong u Chief Whip jong ka Liang Pyrshah, Bah PT Sawkmie.
U la ong ruh ba halor ka jingïakhih ha kylleng ki bynta jong ka ri ban pyrshah jur ïa ka CAA, kum u Myntri Rangbahduh ka Ri, u Narendra Modi u la dei ban pynsangeh shwa ban pynlong aiñ ïa katei ka Bill hynrei um shym la leh satia kumta.
Ha kajuh ka por u ong ba kum u Myntri Rangbahduh u don ka jingkitkhlieh kaba khia bha ban peit ba ki jylla kiba dang duna ka jingmih kin ïoh ïa ka jingkyrshan kaba pura khnang ba kitei ki jylla kin ïoh ban kiew stet lang bad kiwei pat kiba la kiew stet ha ka roi ka par bad lah ruh ban kyrshan hi dalade ïalade.
“Ka jingkwah jong u Modi la long ba baroh ki jylla jong ka ri India ki dei ban kyrshan hi dalade ïalade. Hynrei kane kam ïahap na ka bynta ka Meghalaya kaba dang duna ha baroh ki liang. Peit wat ka Assam kaba synshar hi da ka BJP ruh kam ïoh pisa kumta kumno kiwei pat kin ïoh,” la bynrap biang utei u heh Congress.
Katkum ka jingong jong u, katei ka rukom treikam jong ka sorkar BJP ka ktah haduh katta katta ïa ki jylla ka thaiñ shatei lam mihngi jong ka ri kum ka Meghalaya kiba ka jingmih na ka jylla kim pat lah satia ban pyndap ïa ki jingdonkam.
Kumban shu kdew hangne, wat na ka liang kiba bun ki myntri sorkar ka jylla ki la kubur ba ka jylla kam pahuh satia. Nalorkata kim nud ruh ban ong ba ki pahuh kumba long ha ki snem ba la dep.