Press "Enter" to skip to content

Phuh ka jingrakhe ‘National Voters Day’ ha Jowai

Jowai, K’lyngkot, 25: Mynta ka sngi ha Jowai la rakhe ïa ka “10th National Voters Day” kaba la long ha District Library Auditorium halor ka phang “Electoral literacy for Stronger Democracy” ha kaba la wan ban ïadonlang da ka Additional Deputy Commissioners West Jaiñtia Hills kong R. S. Manners, MCS, ma P. K Boro, MCS, Extra Commissioner Assistant’s, kong D.D Syngai, MCS, kong B. Blah, MCS, ma O. Lamin, MDC, JHADC, ma P. Lyngdoh, Ex- MDC, ma L. Pohtai Rangbah Shnong Mynthong, ki ophisar na ka Election Branch bad ki khynnah skul.
Shi bynta ban pynshlur shuh shuh ïa ki samla ban pynrung kyrteng ïalade kum ki nongthep vote ba pura, na ka liang ka ophis u Deputy Commissioner Election Branch District ka la leh burom bad aiti ïa ki Voter ID sha ki 15 ngut kiba la pynrung kyrteng thymmai kum ki nongthep vote kiba kynthup napdeng kine ïa 3 ngut kiba don ka jingduna ha ki dkhot met.
Ka kong D. D Syngai, EAC ha ka jingkren kaba batai shaphang ka jingrakhe ïa kane ka sngi da kaba kyntu bad ai mynsiem ïa baroh ki nongthep vote kyrpang eh ïa kito kiba la pynrung kyrteng thymmai ba kin shim ïa kane ka kabu ksiar bad ban pyndonkam hok ïa ka rai ba khadduh jong ki khamtam ha ka por elekshon. Ka la ïathuh ba ïa kane ka sngi la rakhe ha kylleng ki Polling Stations shi bynta ban ai lad ïa ki samla Voter kiba thymmai ba kin ïoh ka lad ban shim bynta lyngba ki Polling Station. Katba na ka liang u ma P. K Boro ula ïalam ha ka ban pule ïa ka pledge.
Ha kaba ïadei bad kane ka sngi ka ophis la pynlong ruh ïa ka jingïakop Drawing, Painting, Essay bad ka Extempore Speech halor ka ‘Electoral Literacy for a stronger Democracy’ ïa kaba la dep ban pynlong ha kane ka 23 tarik mynta u bnai bad la sam ruh ïa ki khusnam sha ki nongjop lem bad ki sertiphiket.
Na ka liang ki bor pynïaid District ka West Jaiñtia Hills ha ryngkat ka jingïatreilang bad ka ophis u District Sports Officers kila pynlong ïa ka ‘National Voters Day Run’, kaba la sdang ban kaweh lama da ka kong R. S Manners, ADC, WJH na Kiang Nangbah Stadium ha ka por mynstep, ha ryngkat ka jingdonlang u bah Lakador Syiem, Superintendent of Police, West Jaiñtia Hills bad u Vijay Chhetri Additional Superintendent of Police.
Ha kane ka jingïakop mareh la wan ban ïashim bynta da ki 140 ngut, la sam ruh ïa ki khusnam sha ki nongjop bad ïa ka nam ba nyngkong ha ka liang ki shynrang la ïoh da u Marso Kyndait lem bad ka pisa T.5000, ba ar u Dasaman Kyndait T.3000 bad ba lai u Belin Dkhar T.2000. Ha ka liang ki kynthei ka Happiness Phawa T.5000 ka la wan ba nyngkong, ba ar ka Damon Kyndait T.3000 bad ka nam ba lai ka Medaroi Biam T.2000.