Press "Enter" to skip to content

Rah ka Turïap FC ïa ka 1st St.Joseph School Football Tournament 2019-20

Shillong, Kyllalyngkot 25: Ka Turïap FC ka la rah ïa ka nam lahduh jong ka 1st St.Joseph School Tourna ment 2019-20 hadien ba ka la pynliem noh da 4-0 kol ïa ka Lia Tu Phrang United FC ha ka jingïakhun final kaba la long mynta ka sngi Saitjaiñ ha Nongtalang.
Hakatei ka jingialehkai final ka long kaba shongshit haduh katta ha kaba ka Turiap FC kaba la ioh ban rah ïa ka nam jop ka la khur ïa ka khusnam song pisa ryngkat bad ka khusnam 2 lak tyngka lem bad ka Trophy, katba ka Lia Tu Phrang United FC kaba wa ba ar ka la ïoh 1 lak tyngka.
Hakatei ka Tournament la sam ruh ïa ki khusnam shimet ba kynthup ïa ka nam Top Scorer la ïoh da u Samla Bantei Shylla na ka NH6 FC uba la ïoh thep haduh 6 kol ha baroh ki jingïalehkai, ïa ka nam Best Goalkeeper la ïoh rah da u Samla Mait Kharumnuid na kaTuriap FC, Man of The Match la ïoh rah da u Samla Sheeng Sahktung na ka kynhun Turiap FC bad ïa ka nam Player of The Tournament la ïoh rah da u Samla Poibiang Pohshna.
ïa kane ka phutbol final la wan ban sakhi lang da u Ma Lahkmen Rymbui u MLA ka thaiñ ha kajuh ka por u ba long ruh u Myntri Sorkar uba la long kum u Kongsan.
Haba ai jingkren u la ong “Haba ngi phai sha ka kam ialehkai kumba ngi la tip ba ka Sorkar Meghalaya kala don ka jingpynkhreh na ka bynta ban pynlong ia ka National Games ha u 2022, lyngba kane ka lympung baroh ki thaiñ jong ka Jylla jong ngi ngin don ia la ki jong ki khynnah kiba don ia la ki jong ki sap. Kane ka dei ka por iaphi ba phin shim kabu ban pynpaw ïa ki sap bad ki phong ki jongphi, khnang ba ba phin lah ban shim bynta ha katei ka lympung”.
Ha ka juh ka por u la kitbok kitrwiang ia ka kynhun rwai ka “Rymbui Sister” bad ïa u Deman Myrchiang khnang ba kin tei ha ka sap rwai ka jong ki. U Babu Anthony Pohrmen u ba long u Headmaster ka St.Joseph School Nong talang, ha ka jingai jingkren jong u la kyntu ïa ki khynnah samla ba kin long kiba ialeh shitom khnang ba kin lah ban poi sha katei ka thong.