Press "Enter" to skip to content

Tei mot ka shnong Pohkseh ïa u Rangbah Shnong barim, pynkup burom ïa ki riewtymmen

Shillong, K’Lyngkot, 24: Ban pynsah jingkynmaw ïa u Rangbah Shnong u barim u Bah Lukas Konshonwell Kharkongor ïa uba la ju khot ieid hapoh ka shnong ka thaw da u Maduh Konshon, uba la noh ïa u synniang u bynhei sha u sup u thiar jong ka bha ka miat ha ka shnong ka thaw, ka Dorbar shnong Pohkseh ka la tei da u mot ban pynsah jingkynmaw ïa une u nongïalam shnong uba la bam kwai mynta ha Dwar u Blei.
U Bah Lukas u la long u Rangbah Shnong jong ka shnong Pohkseh la palat 25 snem tam bad uba la ieid bad burom da ki nongshong shnong.
Ïa u motdur jong u Bah Lukas la plie mynta ka sngi Saitjaiñ da u Rangbah Shnong ba mynta u Bah K. Paul Syiem bad u Secretary Shnong barim u Bah W. Lining Lyngdoh ha ka jingïalang kaba la long ha phyllaw jong ka iing Dorbar Shnong ha kaba la sakhi lang da ki bahaing hasem jong u Bah Lucas bad ki paidbah nongshong shnong kynthup ruh ki nongkitkam shnong jong ka Shnong Pohkseh.
Hadien ba la sdang ka jingïalang, la pynlong shwa ïa ka jingsngap jar kaba shi minit kum ka dak jingburom ïa ki mynsiem ba la khladnoh jong ki nongshong shnong bad ki nongïalam shnong kiba rim.
Ka Dorbar Shnong ha kane ka sngi ka la pynkup burom ruh ïa ki rangbah bad ïa ki longkmie kiba long ki nongshong shnong jong ka shnong Pohkseh kiba la kynjoh ïa ka rta kaba la 80 snem shaneng. Nalorkata, ka Dorbar Shnong ka la pynkup burom ruh ïa ki nongtrei Anganwadi bad ïa ki ASha bad ïa ki katto katne ngut ki nongshong shnong kiba ju don bynta ban lum ïa ki nuit ki nier na ki thliew iing jong ki briew manla ka sngi.
Shwa kane, hadien ba la plie ïa ka dobar da u Secretary Shnong barim u Bah W. Linging Lyngdoh, u Secretary shnong ba mynta u Bah Fidelis Kharkongor u la ai ïa ka kaiphod kyllum halor ka jingtreikam jong ka Executive Commmittee jong ka Dorbar Shnong bad kumjuh ruh u Treasurer u la ai ïa ka kaiphod halor ka jingkheiñ jingdiah bad ka jingïoh lum pisa jong ka shnong ha ki samoi treikam ba ladep.
U Rangbah Shnong ka Pohkseh u Bah K. Paul Syiem haba kren ha kane ka sngi u la khot bad wer ïa ki paidbah nongshong shnong jong ka Shnong Pohkseh ba kin long kiba ïatylli hapoh ka shnong ka thaw bad ban don ruh ka mynsiem ban ïatynrong lem ïa ka khia ka shon jong ka shnong bad ban long ruh kiba peitngor ïa ka shnong ka thaw.
“Ka Executive Committee jong ka Dorbar Shnong kan ym lah ban pyntyllun ïa ki kamram ba la bynshet khlem ka jingïatreilang jong ki paidbah nongshong shnong. Namarkata, nga pan ka jingïatreilang jong phi ki nongshong shnong ban wanrah ïa ka bha ka bha ka miat bad ïa ki kam pynroi na ka bynta ka jingbit jingbïang hi jong ka shnong ka thaw baroh kawei,” u la ong.