Press "Enter" to skip to content

Ud ki paidbah Mawthadraishan ba don tang ki ATM Card khlem Machine

Nongstoiñ, K’lyngkot 25: Ki paidbah nongshong shnong jong ki shnong bapher bapher ka Mawthadraishan C&RD Block, ki la ud la khñium halor ka jingbym jong ki ATM Machine kiba jan na ka bynta ban sei pisa. Ka daw ka long ba watla ki la don ïa ki ATM Card ba ki la ïoh na ka Meghalaya Rural Bank (MRB), hynrei hangno kin leit sei pisa haba ym don machine.
Ha ka thaiñ Markasa, ki paidbah naduh ka shnong Marngor, Laitkseh, Mawlaisyiem, Mawkaton, Nongkasen, Tiehsaw, Shohphria, Tyllang bad Umsaw ki pynpaw ba ka jingdon jong ki ïa ki ATM Card ka long kumba don ïa ka ruh suda khlem u moina.
Ha ka thaiñ Myriaw, ka shnong Ramsiej, Umjakoid, Umdum, Mawkhri, Mawkatad, Mawkohmoit, Mawkhan bad kiwei kiwei de ki shnong, ki mad ïa kajuh ka jingeh. Kumjuh ruh ha ka thaiñ Pariong naduh Nongdom, Rngisawlia, Peiñlang bad kiwei de ki shnong ki pynpaw ïa kajuh ka sur jong ka jingeh ba ki mad.
Ki la pynpaw ba ha ka jingshisha ka jingai ATM Card jong ka MRB, kan pynsuk ïa ki ha ka jingïadei bad ka jingsei pisa pilaiñ, kum ka bai bam NREGS na ka job card ba ki paidbah man ki shnong ki ju ïoh. Hynrei haba ym don ATM Machine, yn ïa leh aiu ka ATM Card. Ki paidbah kumba ju long hi, ki hap ban ïa pynlut por da ki sngi ban ïeng laiñ ha ki Bank ban ïoh pisa ban thied khaw thied doh ha ïing ha sem.
Uwei rangbah na ka shnong Markasa, u la pynpaw ba ha Markasa ka PHC ka la don. Hynrei ha ka pang ka shitom mynmiet myniong bad ki kam kyrkieh, ki riew paidbah bym don pisa ha kti ki la hap ban leit sei pisa shwa na ATM Machine ha Mairang, nangta sa leit shah sumar ha katei ka PHC.
Kane ka jia ym tang ïa ki nongshong shnong ka thaiñ Markasa, hynrei ka long kumjuh ha ka thaiñ Myriaw bad Pariong. U la ong, Ka jingai ATM jong ka MRB kam don jingmut ïa ki paidbah nongkyndong, namar ki paidbah ki hap leit ïeng laiñ kumjuh hi ha ki Bank kum kaba don ha Markasa, Kynshi bad kiwei kiwei de jong ka Mawthadraishan Block.
Kumba long mynta ha West Khasi Hills, lah ban ïoh sei pisa ATM tang ha Mairang bad Nongstoin. Ha Nongstoiñ District Head Quarter ruh, ki don tang saw tylli ki ATM kiba dei jong ka HDFC, SBI, Apex Bank bad Canara Bank. Hynrei kine ruh bun ba ki thud lane ki khang khamtam lei lei ynda dei ka por kut bnai ba ki paidbah ki mareh ban leit sei ïa ki tulop jong ki.
Kane hi ka pyni shai ïa ka jingsahdien jong ka West Khasi Hills. Wat ha ka jingïadei bad ka pisa ka pilaiñ jong ki ha ki bank ruh ki paidbah shem jingeh. Katno tam lei lei ha kiwei kiwei pat ki bynta kiba ïadei bad ka roi ka par ha kane ka District.
Na ka liang ki paidbah ka Mawthadraishan, ki buh ka jingkyntu sha ka sorkar Jylla ba ka dei ban leh ei ei lane thaw ki lad ki lynti kumno ban pynïoh ïa ki ATM Machine ha ki jaka ba long pdeng kum ka Markasa, Kynshi, thaiñ Pariong bad kiwei de ki jaka, khnang ba ka jingdon jong ki ïa ki ATM card kan pynmyntoi ïa ki. Ki la kyntu ruh sha u SDO Civil jong ka Mairang bad kumjuh ruh sha ka MRB ba kan kyntur sha Head Ophis jong ka, ha kaba ïadei bad kane ka bynta.
Kiba bun ki la pynpaw ba ka por ka la dei palat ba ka sorkar Jylla kan phaikhmat noh sa sha ki thaiñ Nongkyndong. Ki da ong ruh ki kam pynroi tang ha ki jaka sor, kam dei satia ka jingjop jong ka sorkar kumba ka la kop na ka por sha ka por ba ka la leh ïa ki kam pynroi. Hynrei ka jingroi jingpar ka Jylla, ka dei ka jingroi khamtam eh ha ki shnong Nongkyndong kum ka West Khasi Hills bad kiwei kiwei de.