Press "Enter" to skip to content

Mang ka Sorkar Jylla T.70 Lak ban pynlut na bynta ka Meghalaya Games

Shillong, Rymphang 12: Ka Sorkar Jylla ka la mang ban pynlut T. 70 Lak na bynta ka lympung bah jong ka Jylla, ka Meghalaya Games 2020 ha kaba kin don palat 1900 ngut ki nongïashim bynta ha 14 tylli ki jait jingïalehkai kin ïashim bynta.
U Bah Banteidor Lyngdoh Myntri ka tnat Sports & Youth Affairs ka sorkar Jylla, haba kren bad ki nongthoh khubor ha ka sngi Balang hadien ka jingïalang pyrkhat kam jong ka Organising Committee kaba long ha Secretarïat, ula ong “Ka tnat kan ai ka jingkyrshan kaba pura ïa ka Meghalaya State Olympic Assocïation (MSOA) ban pynlong ïa ka Meghalaya Games ban plie lad ïa ki khun samla ban pynpaw pyrthei ïa ka sap ba ki don ha ki kam ïalehkai.”
Ha kane ka jingïalang pyrkhat kam la ïadonlang naduh ki nongïalam bad ki dkhot ka MSOA ba kynthup ïa u Bah John F Kharshiing Working President, ka Director ka tnat sports and Youth Affairs ka Kong Wanrilin A.M. Booth bad kiwei kiwei.
Ïa kane ka lympung la thmu ban pynlong ha u bnai Nohprah jong u snem ba la dep, hynrei la kynrïah noh pat ïa ka sha ka taiew kaban wan jong une bnai Rymphang ka ban sdang naduh ka 17 tarik.
Ki jait jingïalehkai ki long, kaArcherry, Athletic, Badminton, Basketball, Boxing, Billiards & Snooker, Judo, Karate, Shooting, Swimming, Table Tennis, Taekwando, Tennis bad ka Wushu
ïa ki jaka ïalehkai yn pynlong ha St Anthopny’s School, JN Stadium, Polo, U Tirot Sing Indoor Stadium, Shillong Club, Nong thymamai Sports & Cultural Club, Laban Sports Club Indoor Stadium, Assam Regimental Centre bad ha Crinoline Swimming Pool.