Press "Enter" to skip to content

Dawa ka CoRP ïa ka KHADC ban pynsangeh noh ka jingai Trading Licence ïa ki bar jylla

Shillong, Rymphang, 13: Ka Confederation of Ri Bhoi People (CoRP) sengkmie hapoh ka jingïalam u President u Bah Bandary Ryntathiang bad u Vice President u Bah Gershome Hat ki la leit ban ïakynduh ïa ka Administrator jong ka Khasi Hills Autonomous District Council (KHADC), ka Kong Mawsiewdor War Nongbri kaba long ruh ka Deputy Commissioner jong ka East Khasi Hills District ban kyntu ba ka District Council ba kam dei shuh ban ai Trading Licence sha ki bar jylla ha kaba ïa ki kam ba ki trai shnong ki lah ban trei hi, kum ka kam khaii pateng, kam kontrak bad kiwei kiwei ba ki trai jylla ki lah ban trei hi.
“Kumba ka long mynta la lap ba ka District Council ka dang ai Trading Licence ïa ki bar jylla bad ki kompeni ïa ki kam ba ki trai shnong ki la lah ban trei hi bad kane kan pynduhkam duhjam bylla ïa ki trai jylla,” ong u President ka Seng u Bah Ryntathiang.
Ha kane ka jingkynduh, ka CoRP ka la aiti da ka dorkhas sha ka Administartor jong ka KHADC ban pynkhing bha ban ai Trading Licence sha ki bar jylla bad na ka liang jong ka Kong Mawsiewdor War Nongbri ka la pynpaw ba kan sa peit bad bishar bha halor kane ka mat.
Ha ka dorkhas ka CoRP, ka la pynpaw ba ki kontrakor bar jylla ki thep tender shwa ïa ki kam kontrak ha ki ophis Sorkar Jylla bad kumjuh ha ki ophis Sorkar Pdeng kum ha Airport Authority of India (AAI) Umroi bad kiwei kiwei. Ki don bun ki bar jylla kiba thep kam kontrak kaba ki trai shnong ki lah ban trei, hynrei hadien ba ki la ïoh ïa ka kam kitei ki bar jylla ki sa leit ban pan Trading Licence sha ka District Council.
Kumta lada ka KHADC ka ai Trading Licence ïa ki bar jylla ban trei ïa ki kam kontrak barit baria ka pynduhkam noh pat ïa ki trai shnong kiba dei hok ban ïohkam bylla.