Press "Enter" to skip to content

Hato kham khlaiñ ki Sengbhalang ïa ka sorkar ban bat mynder?

Ka jingïakren halor ka jingïoh rung kyrthlep ki mynder ne haduh ki khyllahjait sha u pud u sam ka jylla kadei ka phang kaba la slem bha ym tang ha ki tnad sorkar hynrei khamtam eh na ki sengbhalang ba pawkhmat ka Jylla. Katei ka phang kadei ka bynta kaba hakhmat eh ba bun ki sengbhalang ki ju dawa na ka por sha ka por na ka sorkar ba kadei ban pynkhlaiñ shuh shuh ïa ki khyrdop talasi mynder kiba don ha kylleng ki bynta jong ka Jylla namar kumba long mynta ka mih ka jingkynnoh ba ki mynder da kaba suk ki ïoh ban rung lyngba kitei ki khyrdop kam pher la kadei ha kano kano ka por ruh.
Jan manla ka sngi, la lap ba ki sengbhalang ki ïohkem da ki spah ngut ki mynder kiba wan boi sha kane ka jylla khamtam kiba ju wan ha ka dur jong ki nongwan wad bylla. Shi ban la dei ban ai jingïaroh ïa ki sengbhalang kiba kem ïa kine ki mynder namar ka jingwan jong kine ki mynder sha kane ka jylla khlempep kan long kum ka jingma ïa ka jaidbynriew kaba ritpaid. Ka jingkharoi ki mynder ha kane ka jylla ka la pynlong ïa ki sengbhalang ban ïamir jingmut halor kane bad ban dawa na ka sorkar ban thaw ïa ki lad ki lynti kiba kham pyrkhing ïa ka jingwan kyrthep kine ki mynder sha kane ka jylla.
Ka Jylla Meghalaya kan ym jin da la long kumne kumba long mynta lada ki Rangbah Shnong ki la kyndit bynriew naduh kham mynshwa. Watla ka por kam pat dier hynrei ka long pat kaba eh ïa kito ki nongsynshar shnong ban beh ïa kito ki mynder kiba la ïoh ban pyntikna syndon ïa ka jinglong nong India lyngba ki dur thep vote (EPIC) ba ki ïoh. Lada ka KHADC ka shimlang ka jingkitkhlieh ban tynrong lang ïa katei ka lyngkor da kaba bthah ïa baroh ki Dorbar Shnong ba kim bit ban ai kino kino ki certificate lane wat ki jaka sah sha kito ki briew ha ki shnong ki thaw khlem kajingtip ne ka jingmynjur da ka Dorbar Shnong, kan ïarap haduh katta katta ban khanglad ïa ka jingïoh rung ki mynder bad ruh ban ïoh jaka sah ha ki shnong ki thaw.
Ban tehlakam ïa ka jingïoh rung kyrthlep ki mynder ha ka jylla lah ban khanglad ym tang ka sorkar marwei hynrei donkam ruh ka jingïatrei lang ki sengbhalang bad khamtam eh ki Rangbah Shnong kiba dei ban peit ïa ka shongsuk shongsaiñ ha ki shnong ki thaw kiba don ha kylleng ki bynta jong ka Jylla Meghalaya. Jin lada ki Rangbah Shnong ki long kiba peitngor bad peitsiar ïa ka rung ka mih jong ki briew ha ka shnong ba ki peit, lehse, yn ym don satia ki mynder ne wat ki sohshnong kiba nud ban rung ban mih ha la ka mon.
Kadei ruh ka kamram jong uwei pa u wei u trai shnong ban don ka jingkithlieh ïa ka lawei ha ki shnong jong ki da kaba pyntip sha ki bor pulit ne sha ki bor shnong haba ki i suba ïa ka rung ka mih jong ki khyllahjait ne mynder ha ki shnong jong ki.
La ju ïohi ruh ba ki sengbhalang ka jylla ki la pynlong da bunjait ki jingïakhih ban pynbor ïa ka sorkar jylla ban pyrkhing ïa ka jingïoh rung ki mynder ha ka jylla la ka long da kaba pynkhlaiñ ïa ki khyrdop talasi ne ban pyntreikam ïa ka Inner Line Permit. Kumta, ka kamram kaba kham khia ka shong ruh ha ka sorkar ban kham pyrkhing ha ka rukom pyntreikam ïa ki bor kiba la don lypa.