Press "Enter" to skip to content

Kynnoh u Myntri ïa ki MDC ba sa kynrum kynram ki District Council

Donkam iatreilang ki ADC bad ka Sorkar ym ban iatynjuh bor:

Shillong, Rymphang 13: U Myntri ka Tnad District Council Affairs (DCA) ba thymmai Bah Hamletson Dohling ula kynnoh ïa ki MDC kum ki dawbah ba sa mih ki kynrum kynram ha ka synshar khadar ha ki Autonomous District Council (ADC) ka Jylla.

“Ka jingkynnoh ka leit sha ki MDC halor ka jingbym skhem ka synshar khadar ha ki ADC” ong u Bah Hamlet uba la shimti ïa ka Tnad DCA hadien ka jingbate kam thymmai jong u Myntri Rangbah ka Jylla, haba iakren bad ki nongthoh khubor hynne ka sngi palei.

U Bah Hamlet u ong ba watla kam dei satia ïa ka Sorkar ba kan tuklar halor ka jingia thaw Executive Committee ha ki ADC hynrei ka dei pat ka kamram jong ki MDC ba kin don Discipline ha ka jaka ban shim kabu ïa ka jinglong jingman ka synshar khadar tang namar ka jingbym don ka aiñ ba khang kyntiap seng.

“Namar kata, nga kyrpad ïa baroh ki MDC ba kin pynneh ïa ka burom bad ka iktiar jong ki ADC. Nga kwah ban pyn kynmaw ba ki paidbah ki kwah ban tip eh ïa ka jingtreikam jong ki ym ba ki iakynthih diengkper na kawei ka kynhun sha kawei pat ne ïa bujli Executive Committee” ong u Myntri.

Haba ai khublei ïa u Myntri Rangbah ka Jylla Conrad Kongkal Sangma, une u Nongialam ka PDF ula ong “Nga sngewthuh ka kam ka long kaba eh hynrei kum u Myntri nga shim ïa ka jing bahkhlieh ban trei shitom bad ban peit ba ki Tnad ba nga peit kin treikam ha ka lynti kaba beit bad kaba shai”.

“Nga da angnud eh ba ki MDC jong ki lai ADC kin pyrshang ban pynneh ïa ka burom bad ïa ka bynta kaba hraw jong ki ADC khnang ba kin shakri khambha ïa u paidbah ka Jylla” ong u Bah Hamlet haba bynrap “Kam long satia kaba itynnad ban shu ïakynthih diengkper bad kylliang Executive Committee manla ka por,. Kane ka pynduh noh ïa ka jingshaniah jong u paidbah..Ki MDC ki dei ban burom ïa ka rai jong u paidbah uba jied ïa ki ha ka elekshon”.

Haba kdew ïa ki jingeh jong ka GHADC bad JHADC ha ka liang ka pisa tyngka kaba la poi sha u pud ka jinghap pyn duh tulop ïa ki Nongtrei, u Bah Hamlet ula ong “Kane ka dei ka kam kaba eh bha bad ngam lah ban ai jingkular eiei ruh em hynrei kaba kongsan hi ka long ba nga long uba pdiang sngewbha ban ïakren bad ruh ban pyrshang ha kaban wad ïa ki lad ki lynti ban ïoh iarap”.

U Myntri u pyntip ruh ba shen un sa khot ïa ka jingïalang bishar kam bad ki Ophisar ka Tnad DCA na ka bynta ban ïa kren ïa ki kam ba ïadei bad ki jinglong jingman jong ki ADC.

Haba kylli halor ka jingiatynjuh bor hapdeng ka Sorkar Jylla bad ka KHADC bad ka sienjam ba un shim kum u Myntri ban pynkylla noh ïa ka jingiatynjuh bor sha ka jingiatreilang, u Bah Hamlet ula ong “Ka jingiatynjuh bor teng teng kam long kaba itynnad. Kaei kaba nga kwah ka long ba ngin iatreilang namar ki ADC ki don la ka jong ka bynta bad ka Sorkar ruh ka don la ka jong ka bynta. Ki jingïapher jingmut kin beit hynrei hynrei haba ïakynduh pat, ngin lah ban pynbeit ïa kiei kiei baroh”.

Hynrei u ong ba halor ka KHADC, na ka liang jong u, um kwah satia ban kren than bad un ai ap ïa ka hukum kaba mih na ka Ïingkashari Meghalaya High Court ka ban bishar mynta ka sngi ïa ka mukotduma hashuwa ba un leh eiei ban pynbeit noh ïa ki kynrum kynram ha kane ka Council.