Press "Enter" to skip to content

Kyrpad ka UDP ban ïatrei lang ki paidbah bad u HM

Shillong, Rymphang, 13: Ka United Democratic Party (UDP) Amlarem Circle Unit ka la kyrpad ïa ki paidbah jong ki shnong khappud ka ri India-Bangladesh kiba don ha ka thaiñ War Jaiñtia ba kin ai ka jingïatreilang bad u Myntri ka tnat Kam Pohing ka Sorkar Jylla u Ma Lahkmen Rymbui uba long ruh u MLA jong ka Amlarem Constituency.
U President ka UDP, Amlarem Circle u Bah Kolmen Pohshna ha u kyrwoh khubor u la pyntip ruh ba ki paidbah jong ka thaiñ War Jaiñtia ki la ai khublei kitbok kitrwiang ïa u Ma Lahkmen Rymbui uba dang shu shimti thymmai ïa ka tnat Kam Pohing bad kumjuh ruh ïa u Myntri Rangbah ka Jylla u Conrad Kongkal Sangma u la ïalam ïa ka Sorkar Meghalaya Democratic Alliance (MDA).
“Ngi ki paidbah jong ka thain War Jaiñtia ngi pynpaw ka jingsngew kmen kaba khraw ba ngi la ïoh ïa u MLA uba shemphang bad uba la lah ban wanrah shibun ki kam pynroi hapoh ka thaiñ jong ngi bad kumjuh ruh ha ka jylla baroh kawei bad ban peit lem ïa ka khiah ka shong bad ka jingeh jong ki paidbah ha ki shnong khappud,” ong une u Nongïalam ka UDP.
U Bah Kolmen u la kyntu ruh ïa ki paidbah nongshong shnong ba kin ai ka jingïatreilang bad u MLA ïa kino kino ki jingeh bad khamtam ïa ki Waheh Shnong ba kin ïatreilang ryngkat bad ki Ophisar kiba shakri ha ki tnat treikam bapher.