Press "Enter" to skip to content

Leit khynra ki Longkmie ïa ka NEEPA Dhaba ha Khanapara, ktah kynti pynban u trai Dhaba ïa ka Longkmie

Halor ka jingsuba ba pynïaid Dakait ïa ki Kynthei Khynnah:
Nongpoh, Rymphang 13: Ka long kaei kaei kaba phylla bad kaba shisha pat ba ki Longkmie da ka jingthmu ban pynduh pyndam ïa ki kam sniew bad ki kam awria ha ka thaiñ Khanapara ba ha hap ha ka Raid Marwet ha Ri Bhoi District, kawei ka Longkmie ka la shah ktah kti ha u trai ka NEEPA Dhaba katba ki Longkmie ki leit ban khynra ïa katei ka Dhaba halor ka jingsuba ba u trai katei ka Dhaba u la pyniaid kam awria ïa ki kynthei khynnah.
Kane ka jingjia ka la jia mynta ka sngi ha ka Shnong Khanapara kaba dei ka Shnong khappud ka Meghalaya bad Assam, ha kaba la ong ba ka kynhun ki Longkmie hadien ba ki la ioh jingtip ba ka don kawei ka Dhaba ba la tip kum ka NEEPA Dhaba la suba ba u trai katei ka Dhaba ula pyniaid kam awria ïa ki kynthei bad ki khynnah bad na ka liang ka kynhun ki Longkmie ha ka lama ka Khanapara Border Area Committee ha ka por shiteng sngi ki la leit ban khynra ïa katei ka Dhaba bad kaba lyngngoh ba u trai katei ka Dhaba u la ktah kti pynban ïa kawei ka Longkmie kaba la suba ba u pyniaid ïa katei ka kam awria ha katei ka Dhaba.
Kane ka NEEPA Dhaba ka dei kaba la pyniaid da uwei u bar jylla ba la tip kum u Babli Boro bad dei halor ka jingsuba ba utei u trai u la pyniaid ïa ki kam awria kum ki Longkmie kila la mih ban leit khynra mynta ka sngi da ka jingthmu ban khanglad ïa kum kitei ki kam pohjaid kiba ktah ïa ka imlang ka sahlang.
Kumba la ïathuh da ka Kong I. Lynshing, kaba dei ka nongïalam ka Khanapara Border Area Committee, la ong ba da ka jingsuba ba katei ka Dhaba ka pyniaid ïa ki kam dakait pyrshah ïa ki kynthei ki khynah bad mynta ka sngi la pynlong ka jingkhynra ha kaba la lap haduh lai ngut ki kynthei kiba don hapoh ka Dhaba ba la ioh bat da ki Longkmie bad ha ka jingleit kynra hadien ba la lap ïa kitei ki lai ngut ki kynthei ba la buhrieh noh ïa ka kyrteng u trai katei ka Dhaba ha ka jaka ban ia kren ïa ka jingshisha pynban u la ktah kti ïa ka Kong I. Lynshing kum ka Nongïalam da kaba thap ïa ka bad phet rieh noh ïa lade ryngkat bad ki Nongtrei jong u.
Ka Kong I. Lynshing ka la ong ruh kum ki Longkmie ruh ki la pyni bor ïa u trai katei ka Dhaba halor kitei ki kam ba la suba ba u pyniaid awria ïa ki kynthei ki khynnah bad dei namar kane ka daw ba u la ktah kti ïa ka da kaba thap bad phet noh ïa lade na katei ka Dhaba.
Ka la iathuh ruh halor kane ka jingktah kti une u trai ka Dhaba ka la pyntip mardor sha ki Pulit ka Khanapara bad hadien ba la wan ki Pulit kim shem la lap shuh ïa u trai ka Dhaba bad wat ki nongtrei jong u kiba la phet rieh noh ïa lade.
Shuh shuh, ka la ïathuh ruh dei halor kine ki kam pyni bor utei u bar jylla ba ki Longkmie ki ïaleh pyrshah ïa ki kam sniew ba u pynshlur ïa ki kam awria ha katei ka Dhaba ba ka la pyntip sha ki Pulit bad na ka liang jong ka ruh ka la rai beit ban ujor da ka ejehar pyrsha ïa u trai katei ka Dhaba bad ka la buh ruh ka jingkyrpad ba ki Pulit ka Khanapara ki dei ban kem bad ban thwet ïa utei u trai ka Dhaba ban pynshitom katkum ki kyndon ka ain bad ruh ban tohkit jur halor kane ka jingsuba ba u pyniaid dakait ïa ki kynthei ki khynnah, ka la bynrap.
Halor kane ka jingshah ktah kti kane ka Longkmie ha u trai katei ka Dhaba, na ka liang ka HNYF, Northern Region ruh ka la pynrem jur ïa utei u trai Dhaba uba la nud ban ktah kti wat ïa ka Longkmie nalor ba u leh ïa kum kitei ki kam kiba ktah ïa ka hok longbriew manbriew ki kynthei ki khynnah.
U President ka HNYF, Northern Region, u Bah Marcus Marten u la ong ruh ban a ka liang ka seng HNYF kan khang khyrdep beit ïa kane ka Dhaba ba kan nym ailad ban dang pyniaid iew biang ïa ka Dhaba bad na ka liang ka seng ka kyntu ruh ïa ka bor pulit ka Ri Bhoi ba dei ban kem mardor ïa u trai ka Dhaba bad ruh ban tohkit bniah halor kitei ki kam kiba la suba ba u pyniaid dakait ïa ki kynthei ki khynnah.
Shuh shuh, u la ong ruh ba ka seng HNYF kan nym ailad da lei lei ruh ïa kum kine ki briew kiba thmu ba die ïa ka longrynieng ka man rynieng ki kynthei ki khynnah bad ka seng ka ai ruh ka jingkyrshan ïa kine ki Longkmie bad kan nym ailad da lei lei ban don kum kitei ki Dhaba kiba pynsniewdur ïa ka imlang ka sahlang, la bynrap.