Press "Enter" to skip to content

Rai ka sorkar :Yn ym pyndap shuh ïa ki kam ba thylli na kiba shongthait

Palat 5000 ngut kin sa shongthait shen:

Shillong, Rymphang 13 : U Symbud Myntri Rangbah ka Jylla, Bah Prestone Tynsong ha ka sngi Palei u la ong ba ki samla ki dei ban tip ba ka juk kam sorkar ha Meghalaya ka la kut bad kumta la donkam ïa ki ban ïeng ha la ki jong ki kjat.
“Ka juk kam sorkar mynta ka la kut, ngeit ïanga ka la kut. Kiba don ha ka kam sorkar mynta ka poi kumba 50,000 ngut bad mynta ha ka jingïaid ki snem, kiban shongthait ym duna shuh ïa ka 5,000 ngut, sah sa kumba 45,000 ngut. Ka rai jongngi na ka sorkar ka long ba katba nang shongthait ngin ym thep kam shuh,” u la ong haba kren ha ka jingïalang kaba long ha Nongpyiur ha kane ka sngi Palei.
La ïathuh ruh ba ka rai jong ka sorkar ban ym thep kam shuh ha kito ki jaka ba thylli na ka jingdon kiba shongthait kadei namar ha kane ka juk mynta ka rukom treikam ka la pher baklybak.
“Kam dei shuh ka juk type kot ha ki typewriter kumba leh mynshwa hynrei ka la dei ka juk computer ba uwei u briew u trei na ka bynta 10 ngut bad ka kam kaba hap trei shisngi tang shi kynta la dep lut. Kumta nga kwah ban ong ïa phi ba ki kmie ki kpa ba ka juk kam sorkar ka la kut bad ka la poi ka juk ba thymmai ban phai biang shadien,” u la bynrap biang
Katkum ka jingong jong u, kane ka juk thymmai ka long ban shim kabu ïa kiba bun ki skim kiba wan na ka sorkar ban pynheh bad pynkhlaiñ shuh shuh ïa ka kam ri jingri kynthup naduh ka ri masi khem dud bad ban klet shwa ïa ka kam sorkar.
Shwa kane, u Bah Pres-tone u la ong ba jan baroh ki nongmihkhmat ki kynduh ïa kajuh ka jingeh, kata ba ym duna 30 haduh 40 ngut ha ka shistep ki paidbah ki ju wan sha ki iing ki sem jong ki ban phah ïarap pynrung kam.