Press "Enter" to skip to content

Ryngkat ki lama ïong bad jingthoh dawa ILP pdiang ka COMSO ïa u Union Minister

Nongstoiñ, Rymphang 13: Ki saw tylli ki sengbhalang napoh West Khasi Hills District hapoh ka shatri jong ka Confederation of Meghalaya Social Organisation, ba kynthup ïa ka HYC, HANM, WYF bad ka WKSU, ki la mih kynsan hynne ka sngi ha shnong Mawkhlam Nongpyndeng, ha ryngkat ki lama iong ban pdiang ïa u Myntri ka sorkar pdeng u Krishan Pal Gurjar.

Ki dkhot jong ki saw seng ki la aplypa ha madan NDSA shwa ba ka Helipad jong u Myntri kan hiar khyndew ha madan. Hangne ki dkhot jong ki saw seng ha ryngkat ki lama iong ryngkat ki placard jingthoh dawa ILP bad pyrshah ïa ka CAA, ki la rah ban pynpaw hakhmat jong u Union Minister jong ka Sorkar India.

Ki nongïalam bad dkhot jong ki saw seng hadien ba u Myntri u la hïar khyndew bad leit sha jaka ba long jingïalang, ki la bud bad thmu ruh ban leit sha jaka ba u don. Hynrei na ka liang ki pulit ki la khang lynti noh ïa ki, kumta ki la shu ieng ha mar pyrshah ba long jingïalang ha ryngkat ki lama iong bad jingthoh bapher bapher.

Ki nongïalam jong kine ki Sengbhalang, ki la pynpaw biang ba ka nongrim ka long dei namar ba ka Sorkar India ka la pynslem ïa ka jingpyntreikam ïa ka ILP hapoh ka jylla Meghalaya.

“Kumba ngi tip ba na ka liang ki nongmihkhmat jong ka jylla Meghalaya ki la pass ïa ka resolution ha kaba ïa dei bad ka ILP ha ka 19 Nohprah u snem ba la lah. Ïa kane ka rai ka la dep ban phah sha ka Sorkar India. Hynrei haduh mynta ka Sorkar India ka la shu pynslem kai da kaba ong da kumne kumta”.

“Kumta na ka liang ka CoMSO ka la rai ba katba ngim pat ïoh ïa ka ILP, ngin ïa pynlong beit ka jingpyrshah ïa kino kino ki Union Minister kiba wan ha Meghalaya da ha kano kano ka dur ruh”, ong u samla Wantei Lyngdoh uwei na ki nongïalam jong ka COMSO.

“Kane ka dei kum ka jingpynkynmaw ïa une Union Minister ba un leit rah hakhmat u Home Minister u Amit Shah, ba un pyntreikam noh ïa ka ILP hapoh Meghalaya”, ong u samla Mawkordor Kharsyiemlieh bad bynrap, “Na ka liang jong ngi, ngin nang ïai bteng nangne shakhmat ban ïakhih beit kat bym pat ïoh ïa ka ILP la ha kano kano ka dur ruh”.