Press "Enter" to skip to content

Sdang pyndik biang ka Assam ha khappud, kurup ïa ka kali kit dieng ha Khanduli

Jowai, Rymphang 13: Ki nongtrei jong ka tnad kam khlaw jong ka sorkar Assam ki la sdang biang ban pyndik ïa ki nongshong shnong jong ka Shnong Khanduli ha kaba ki la wan ban kurup jubor ïa kawei ka kali kit dieng thang ha ka khlaw shnong jong ka shnong Khanduli.
Kane ka kali kaba shah kurup ha ka tnad kam khlaw jong ka Assam ka dei ka Bolero Pick up kaba don u registration number ML04C 7834.
Ki nongshong shnong ki la ïathuh ba hynnin ka sngi Balang ki nongshong shnong ka Khanduli ki la leit kit dieng thang na ka khlaw shnong kaba don Langwieh, hynrei ki nongtrei jong ka tnad kam khlaw ka Assam ki la wan ban kam trai ïa katei ka khlaw shnong ban kurup ïa katei ka kali bad rah ïa ka sha Hamren, West Karbi Anglong District.
U Waheh Shnong jong ka shnong Khanduli u Yoshida Nongspung ula ïathuh ba ki la pomdieng ha katei ka khlaw shnong hadien ba ki la ïoh jingbit na u Deputy Commissioner jong ka West Jaiñtia bad la bthah ruh ïa ki Pulit jong ka Saitsama Out Post ban ai ka jingpahara ïa ki nongshong shnong kiba thoh dieng na katei ka khlaw.
Kane ka jingshah kurup kane ka kali kala jia hadien ba ki Pulit jong ka Saitsama ki la leit phai na katei ka khlaw.
Ka bor shnong mar mar ka la pyntip sha u Deputy Commissioner halor kane ka jingjia bad la phah ïa ka Border Magistrate ka Kong B. Blah ban hiar sha katei ka shnong ban pyllait ïa katei ka kali kaba la shah kurup. La pynbeit ban don ka jingïakynduh hadpeng ki ar Border Magistrate ka West Jaiñtia Hills District, Meghalaya bad West Karbi Anglong District, Assam, hynrei na ka liang jong u Assam u khlem wan satia sha katei ka jingïalang.
Ka Kong Blah ka la wanphai noh bad ka la hiar ban ïakynduh ïa ki nongshong shnong ka Khanduli ha ka dorbar kaba long kyrkieh ban ïakren ïa kane ka kam. Ka Kong Blah ka la kyntu ïa ki nongshong shnong ban ïatreilang bad ki bor Pulit ban lait na kino kino ki jingjia ba sngewsih. Kala ong ruh ban kan ai ka kaiphod jong sha u DC ban leh ïa kaba donkam.
U Waheh Chnong jong ka shnong Khanduli halor kane ka jingjia u la dep mudui ruh da ka jingujor ejahar hakhmat ki Pulit jong ka Saitsama Out Post. U la ong ba ki nongtrei jong ka tnad kam khlaw ka Assam nalor ba ki la kurup ïa ka Kali ki la knieh ruh san tylli ki mobile phone jong ki nongshong shnong ka Khanduli.