Press "Enter" to skip to content

Ym lah ong ka long beaiñ ne em ka jingkhynra mynder ki Sengbhalang ha Jylla: ong u HM

Ha ka taiew ban wan yn khot ïakren ka tnad Kam-Pohïng bad ophisar pulit:

Shillong, Rymphang 13: U Myntri Kam-Pohïng ba thymmai ha ka Sorkar Synrop Meghalaya Democratic Alliance (MDA), U Bah Lahkmen Rymbui, ha ka sngi palei, u la ong ba ha ka taiew ban wan un sa khot ïa ka jingïalang ïatai bniah bad ki ophisar na ka tnad pulit halor ka jingkhynra ban pyrkhing ïa ka jingwan rung beaiñ jong ki briew na shabar ka Jylla (anti-infiltration drive) ba la pyntreikam da ka Confede-ration of Meghalaya Social Organisations (CoMSO).

\ “Ha ka jingïalang ïa tai bniah ngin ïa kren ïa ka jingdon ki briew jong ngi bad katkum ki kyndon ngin ioh ban phah ïa ki sha ki khyrdop talasi ka Sorkar Jylla,” la ong u Bah Rymbui. U ne u Myntri Kam-Pohïng ba thymmai u la kyntu ïa ki kynhun seng bhalang ban nym pyntrei kam ïa ka jingkhynra ban pyrkhing ïa ka jingwan rung beaiñ jong ki briew na shabar ka Jylla.

Katkum u Bah Lahkmen, ki katto katne ki riew shim kabu ki shim kabu ïa kane ka bynta bad wallam pat sha ka jingdkoh ha ka shongsuk shongsaiñ. U Bah Rymbui u la ong ba lada kane kan dang ïaid sha khmat ka Sorkar hi kan shim ki kyndon ban pynthikna ba kan don ka shong suk shong shngaiñ ïa ki paidbah.

Na ka liang u Myntri u la ong ba ka CoMSO ka la ai ktien ba ka lah ban weng noh ïa ka jingkhynra lait tang ha ki jaka kiba long ha khappud bad ka Jylla Assam bad ka Ri Bangladesh.

“Ki la ïathuh ïa nga ba ha ki jaka kiba don ha khapppud bad kiwei pat ki Jylla ne bad ka Ri Bangladesh kin bteng beit bad ha kiwei pat ki jaka kin sangeh noh….to ngin sa ïa peit bad ap katto katne sngi”, u la ong.

U la ong ba kane ka jingkhynra ba la pynlong da ki dkhot seng bhalang yn nym lah ban ong ba ka long ‘beaiñ ne kam long’ tad haduh ba uno uno u shim ïa ka aiñ ha ki kti …hynrei ngin hap peit ha baroh ki liang”, la ong u Bah Rymbui.

Halor ka jingpynslem ka Sorkar Pdeng ban pyntrei kam noh ïa ka Inner Line Permit (ILP) ha ka Jylla, une u Myntri Kam-Pohïng ba thymmai, u la ong  ba ka Sorkar Jylla hi ka dang ïaleh ban buddien ïa kane ka ka katkum ka jingkwah ki paidbah. “Ïa kane ka mat ïa kren ban pyntreikam ïa ka ILP dei ban leh kloi katba lah hynrei sngewthuh pat ba ym lah ban shu leh hak dak ha ka shi khyllipmat”, u la ong.

Halor ar tylli ki jingjia shah thang kali ha nongbah Shillong ha ka sngi balang, kawei kaba dei ka kali Sorkar, u Bah Rymbui ula kyntu ba kum kine ki jingjia ym dei ban bteng namar kine ki jingdon la ka dei jong ka Sorkar ne jong ki shimet ruh ki dei ki jingdon jingem jong ki paidbah.

Kham ha shwa, ka kynhun na ka CoMSO ka la wan ban ïa kynduh ïa u Myntri Kam-Pohïng hadien ka jingkhot na ka liang jong u . Haba kren ha ki nongthoh khubor hadien ka jingwan kynduh ïa u Myntri Kam-Pohïng, u Bah Robertjune Kharjahrin, Chairman ka CoMSO u la ong ba u Myntri Kam-Pohïng u la kyrpad ïa ka kyhun ban nym pynlong ki jingïakhih namar ki khynnah skul bad khynnah pule ki don ha ka samoi ïaleh eksam jong ki.

U Chairman ka CoMSO u la pynthikna sha ka Sorkar Jylla ba kan nym don kano kano ka jingleh ban pyndkoh ïa ka shong suk shongsaiñ na kane ka jingkhynra ban pyrkhing ïa ka jingwan rung beaiñ ki briew na shabar ka Jylla.

U la ong ba kane ka jingkhynra ban pyrkhing ïa ka jingwan rung beaiñ ki ba shabar ha ka Jylla baroh kawei ka long ban ïarap ïa ki bor ba dei peit jong ka Sorkar kum ka Directorate of Infiltration ban ioh bat ïa ki poiwir.

U la ong ba da kane ka jingkhynra ban pyrkhing ïa ka jingwan rung beaiñ ki briew na shabar ka Jylla ka CoMSO kam shim ïa ka aiñ ha ki kti jong ka bad u la kdew ruh da kaba ong ba ka ai ka jingïatreilang bad ka tnad pulit ban weng ïa ki kam sniew kum ki kam ban rat dyngkhong ïa u drugs na ka imlang sahalang. “Ka Sorkar Jylla ka don la ka jong ka jingkitkhlieh ban shim khia bad ngi ruh ngi don la ka jong ka jingkitkhlieh”, u la ong.