Press "Enter" to skip to content

Yn iathir ka India-Bangla halor ka Hat khappud, Act East Policy

Shillong, Rymphang, 13: Ka jingïathir ïatai halor ka phang, “Fifty Years of India-Bangladesh Relations: Regionalism, Connnectivity and the North East,” kan sa long lashai ka sngi Thohdieng ha skulbah North Eastern Hill University (NEHU), Shillong. Ïa kane ka jingïathir ïatai ba la pynlong da ka Javadpur Association of International Relations (JAIR), Indian Council of Social Science Research-North Eastern Regional Centre (ICSSR-NERC) ha ryngkat ka jingïatreilang bad ka North Eastern Hill University yn sa plie da u Lat ka Jylla u Tathagata Roy kum u Kongsan.
U Hon.Director jong ka ICSSR-NERC u Dr. RK Satapatty ha ka jingïakren bad ki lad pathai khubor mynta ka sngi Palei u la ïathuh ba ka jingpynlong ïa kane ka jingïathir ïatai ka long kum shi bynta ban rakhe ïa ka lyngkhuh 50 snem halor ka jingïadei jong ka ri India bad ka ri Bangladesh halor ka khaii ka pateng bad kiwei kiwei.
Ha kane ka jingïathir ïatai, yn sa wan ïashim bynta ruh da ki heh Ophisar jong ka tnat Ministry of External Affairs, ka Sorkar India katba na ka ri Bangladesh yn sa mihkhmat da u Asst. High Commisioner ka Bangladesh sha India u Dr. Shah Mohammad Tanvir Monsur bad ka kynhun jong u.
“Lyngba kane ka jingïathir ngin sa ïakren sani bha halor ka jingkyntiew ïa ki iew khappud (Border Haat), ka Act East Policy ba la pyntreikam da ka Sorkar India ban kyntiew ïa ka thaiñ Shatei Lammihngi bad kumjuh ruh ngin tih bniah ïa ki jingeh ba ki shnong khappud jong ka ri India bad ka Bangladesh ki la mad ïa ki jingeh ha kine ki san phew snem,” ong u Dr. Satapatty.
U la ong ruh ba kane ka jingïathir ïatai kan long ruh ban pynkhlaiñ shuh shuh ïa ka jingïadei hapdeng ka ri India bad ka Bangladesh ha kiba bun ki liang.
U la pynpaw ruh ba ka lynti Rel ka la donkam bha ban pynïasnoh ïa ka ri India bad ka Bangladesh lyngba ka khapud jong ka Jylla Meghalaya khnang ban kyntiew shuh shuh ïa ka khaii ka pateng jong kine ki ar tylli ki ri.
“Ngin sa ïakren ruh halor ki kam be-aiñ kiba ju jia na ka por sha ka por ha ki bynta khappud jong ka ri India-Bangladeh bad kumjuh ruh halor ka jingprongtuh ki paidbah nongshong shnong jong kine ki ar tylli ki ri na kawei ka ri sha kawei pat,” ong u Dr. Satapatty.
Ha kaba ïadei bad kane, u la ong ba ka Sorkar India bad ka Sorkar Bangladesh ki dei ban shong ïamir jingmut ban weng ïa kine ki jingeh kiba mih ha khappud khnang ban pynkhlaiñ ïa ka jingïadei hapdeng kine ki ar tylli ki ri.
“Ngin sa ïakren ruh ïa ki jingdawa jong ki paidbah ha ki shnong khappud ïa ka jingker sainar shiah bad ban kham pynbun ïa ki iew khappud khnang ban kyntiew shuh shuh ïa ka ïoh ka kot jong ki paidbah,” u la ong shuh shuh.
U la ïathuh ba ha ka por janmiet kan sa don ruh ka jingïasyllok markhmat bad ki heh ophisar jong ka tnat Ministry of External Affairs ka Sorkar India ka ban sa long ha Shillong Club, Shillong ha ka por janmiet.