Press "Enter" to skip to content

‘ Yn pynduh khaw reshon, skhim sorkar ïa kiba ïoh khun palat 2 ngut ’

New Delhi: Ki shi kurim kiba kwah ban ïoh khun palat 2 ngut nangne sha-khmat, kin hap long ruh kiba la kloi ban shah ïa ki jingshah pynshitom.
Ka daw ka long ba ha Dorbar Rajya Sabha dang shen, la wanrah ïa ka Private Member’s Bill ne ka Bill na u MP, ka ong ba dei ban pynkylla noh ïa ka riti synshar jong ka ri, ha kaba kino kino ki shi kurim kiba ïoh khun palat arngut kin ngat ha ka jingpynshitom. Wat lada ha kine ki snem baladep, ka don ka aiñ ba ym shah ban ïoh khun palat arngut, hynrei mynta lyngba kane ka Bill, kiba pynkheiñ kin ngat ha ka jingpynshitom.
Katkum kane ka Bill ba la wanrah da u MP Ka Shiv Sena, ka ong ba kino kino kiba ïoh khun palat arngut, kin duh noh ïa ki skhim bapher bapher na ka sorkar, khamtam ki Social Securiy Scheme, kum u khaw reshon, ka bai bam tymmen, ka skhim ïap lok, ka skhim phet lok bad kiwei kiwei. Nangta kane ka Bill ka tyrwa ruh ban nym shah ban pdiang skul ïa ki khun kiba kha hadien 2 ngut.
Ka jingthmu ban pynkylla ïaka riti synshar lyngba kane ka Bill, ka long ba ki sorkar jylla ruh kin pyntreikam ïa kane ka aiñ, ha kaba yn khang pyrshah ban ïoh khun palat arngut.
Kumba long mynta ki jylla kiba pyntreikam ïa ka aiñ ban nym ïoh khun palat arngut ki long ka Haryana, Rajasthan, Madhya Pradesh, Andhra Pradesh bad Himachal Pradesh, ha kaba la bthah ba ki dkhot jong ki Panchayat, ki kynja dorbar shnong, ki dei ban long beit napdeng kito kiba don khun tang arngut shapoh.