Press "Enter" to skip to content

Ban jur u CM ïa ki nongri dohkha ban trei shitom ban pynbiang ïa ka jylla

ïaroh ïa ka Aquaculture Mission ha ka tamasa dohkha:

Shillong, Rymphang 14 : U Myntri Rangbah ka jylla u Conrad K Sangma u la banjur ïa ki nongri dohkha ba kin nangtrei shitom shuh shuh ban pynmih dohkha bun khnang ba yn lah ban pyndap dohkha ha ka jylla namar kat haduh mynta ka jylla ka dang hap ban thied ne shaniah dohkha ha kiwei pat ki jylla.
ïa kane u la kren haba plie ïa ka tamasa ïadie ïathied dohkha kaba lai kaba la long mynta ka sngi ha madan Chanmary, Tura. ïa kane ka tamasa la pynlong da ka ophis Directorate of Fisheries bad ka ophis Superintendent of Fisheries, West Garo Hills, Tura bad kyrshan ruh da ka tnad Agriculture, Veterinary, Sericulture, IBDLP, District Commerce and Industries, Tura.
U Myntri Rangbah u la ai khublei ruh ïa ki nongri dohkha kiba la pyndonkam hok ïa ki jingïarap ba ki ïoh na ka sorkar ban kyntiew ïa kane ka kam ri dohkha lyngba ka Aquaculture Mission.
U la pynpaw ba ka sorkar ka don ka jingthrang ban kyntiew ïa kito kiba shim khia ïa ka kam namar ka thaiñ Garo ka dei ka jaka kaba biang bha ban ri dohkha bad ka lah ruh ban pynmih bun ka dohkha naka bynta ka jylla namar lada khlaiñ ka jingpynmih ka sorkar ka don ka jingthmu ban pynlong ïa kane ka kam kum kawei naki kam karkhana ba heh ban ai kam ai jam ïa kiba bun ba lang.
U Myntri rangbah u la ïathuh ba ka sorkar ka don ka jingthrang ban wanrah ka jingïoh nong ne jingmyntoi ba arshah ïa ki nognrep bad halor kane ka thaw ki lad ki lynti kumno ban ïarap ïa ki nongrep ba kin lah ban ïeng ha la ki jong ki kjat. U kyntu ruh ïa ki nongrep ban shim ïa ka skhim PM KISAN ha kaba ki nongrep kin ïoh 6000 tyngka ha ki lai sien siew bad ïa ka jingsiew ba nyngkong la dep pyllait lypa.
Haba kren maitphang halor ka jingthmu jong kane ka tamasa ïadie ïathied dohkha, i Director jongka Fisheries i kong A.L Mawlong i la batai shaphang ki rukom treikam jongka Aquaculture Mission. I la ïathuh ba ki don haduh 21,000 ngut ki nongri dohkha haka jylla bad kiba bun ki dei na Garo Hills. Tangba wat la katta ruh ka jylla ka dang duna haduh 14,000 metric ton ka dohkha ha ka shisnem. Kumba ka phang pdeng jongka Aquaculture Mission ka long “ Dependence to Self Sufficiency” kumta ka tnad ka don ka jingthrang ban nang pynbun ïa ki pung ri dohkha ha ri lum Garo bad kiwei kiwei ki bynta jongka jylla namar ka thong ka long ban lah ban pyndap dohkha hi hapoh ka jylla bad ba ki briew ruh kin im ja na kane ka kam.
Ha kane ka sngi u myntri rangbah u la sam ruh ïa ka khusnam sha kito ki nongri dohkha kiba trei shitom ban kyntiew ïa ka kam bad kiba la ïoh ki long
Songmagre Fish Community na East Garo Hills, Enosh Marak na Bjengdoba, North Garo Hills, Dhorom S Sangma na Gasuapara, South Garo Hills bad Thombal A Sangma (ba la khlad noh) na Selsella, West Garo Hills districts, Kine ki la ïoh da ki memento. certificate bad ka pisa.
Ha kane ka sngi la don ka jingdie ïa ki dohkha im, ki dohkha syang, ki jhur ki jhep bad kiwei kiwei ki tiar ki tar.