Press "Enter" to skip to content

Khmih lynti ki paidbah Mawshynrut ban shna noh ïa ka surok Riangdo-Athiabari

Nongstoiñ, Rymphang 14: Ki paidbah nongshong shnong ka thaiñ Mawshynrut, ki la pynpaw ka jingdiaw mynsiem kaba jur namar ka surok na Riangdo sha Athiabari ka la don satang ki thliew suda bad jot rathai haduh katta katta khamtam eh ha kine ki sngi.
Ki paidbah nongshong shnong jong ka thaiñ Nongtrai baroh kawei kiba ïaid lyngba kane ka surok, ki la pynpaw ka jingbynñiaw kaba jur namar kane ka surok ba 37 kilomitar kam long shuh ban ïaid da ki kali rit bad wat ki kali Sumo ruh ki hap ban ïaksaid tyngeh bad shim por ruh da ki bun bun kynta na Riangdo ban poi ha Athiabari.
Ki paidbah nongshong shnong ki la pynpaw ïa ka jingshem jingeh haduh katta katta ha ka leit ka wan bad leit trei leit ktah, khamtam eh ha ki kam kyrkieh bad ha ka pang ka shitom.
Ki shnong ka thaiñ Nongtrai kiba shah ktah eh na kane ka jingjot jingpei jong ka surok, ki kynthup ïa ka Domprut, Riangsih,Thangtngaw, Rynñiaw, Porsohan, Umsohpieng, Myndo, Nongpdeng, Nongdiengkaiñ, Kamriangchi haduh Athiabari. Nangta kiwei pat ki shnong ba marjan kum ka Riangkang, Umkait, Nongjri, Langdongdai, Japung, Missei, Mawkyllon, Mawsmai, Mawdonglang ki dei ki shnong kiba la shah ktah lang.
Kaba kham sangsot ka long khamtam na ka bynta ki khynnah skul jong kine ki shnong namar ki hap ban ïaid na kane ka surok ban poi sha ki skul. Ka long ruh ka jingma jingmynsaw khamtam lada ïakynduh ïa ki trok kit dewiong ha ki lynti ïaid jong ki.
Ha u snem 2010 ka sorkar Meghalaya ka la phah maramot ïa katei ka surok ha kaba kawei ka Company shna surok na Assam, ka M/s Agarwal Construction Private Limited ka la maramot ïa kane ka surok. Hynrei tang hadien shisnem, katei ka surok ka la pra namar ka jingïaid ki trok dewiong. Kumba long mynta lei lei ym don rong shuh katei ka surok lait tang ha ki katto katne eh ki jaka, hynrei shilynter lynti la don satang ki thliew suda.
Ha u snem 2017 ka la don bïang ka jingphah thew phah woh da ka sorkar ïa katei ka surok baroh shilynter ha kaba ki paidbah katei ka thaiñ ki la don ka jingkyrmen ba kin sa ïoh noh da ka surok kaba khambha. Hynrei haduh kine ki sngi ym shym la don kano kano ka jingpynthikna la kitei ki briew kiba thew ba woh ïa katei ka surok ki la pyndep ne em. Nalor nangta ka jingmang pisa na ka bynta ban shna ïa katei ka surok ka la don ne em.
Ha ka jingshisha ka sorkar ka la dei ban phai khmat bha sha katei ka surok na ka bynta ban pynbha namar ka dei ruh ka surok kaba donkam haduh katta katta na ka bynta ki paidbah. Namar lada katei ka surok ka la bha ki paidbah jong ka West Khasi Hills baroh kawei, kiba leit donkam sha Guwahati kim don kam shuh ban kiew na Shillong namar ka jngai palat.
Katba lada ïaid na Riangdo sha Athiabari haduh Boko ka jan bha bad ka pynsuk shi katdei eh ïa ki paidbah nalor ba ka jinglut jingsep ruh ka duna bha.