Press "Enter" to skip to content

Kynnoh ka HNLC ba kamai spah bym hok ki Pulit na ka jingkhaii tuh ïa u dewïong

Byrngem ban pynthut ïa ka National Games:
Shillong, Rymphang 14: Ka kynhun kiengatiar Hynñiewtrep National Liberation Council (HNLC) kala kynnoh ba ki Pulit naduh ki Superintendent of Police, ki Officer-Incharge bad ba don ha ki Thanad kila kamai spah bym hok lyngba ka kam khaii tuh ïa u dewïong hapoh ka Jylla.
Ka HNLC kala kynthoh ïa kane halor ka jingkam jong ka Tnad Pulit ba ka pla tyngka jong ka HNLC kala troiñ da ka jingwan pyndem wait u Finance Secretary Bah Wankupar Marweiñ. Kala kynnoh ruh baka HNLC kala sdang ban pynjur ïa ki kam dawa pisa ban lah pynim ïa ka kynhun.
Ka HNLC kala byrngem ruh ïa ka Tnad Pulit ba kam dei ban pynbitar ïa ka seng da ki khubor ba bakla lem kumta ka kynhun ka lah ban pynthut ïa ka National Games 2022 ban long ha Jylla.
“Ka HNLC ka ai jingmut shisha ïa ka Tnad Pulit ba ka dei ban kiar na ka jingai jingtip ba bakla halor ka pla tyngka jong ka kynhun. Ha ka jingshisha, kan bha shibun ïa ki (Pulit) ba kin khmih ïala ka jong ka rukom lum pisa bym hok, kaba la leh lyngba ka kam khaii tuh ïa u dewïong bad ka jingkhaii tuh ïa ki masi ha baroh kawei ka Jylla” ong u Bah Sainkupar Nongtraw, General Secretary-cum-Publicity Secretary ka HNLC ha ka kyrwoh bala phah sha ki lad pathai khubor.
Haba pynpaw baka Tnad Pulit ka dei ban tip ba ka Jylla kala mad ïa ka jingkyrduh pisa, une u Nongïalam ka HNLC ula ong ‘Dei namar kane ka daw ba ki Pulit kila im ka kamai spah lyngba ka jingkhaii tuh ïa u dewong bad ka masi”.
“Baroh ki Police Station, ki Officer Incharge bad ki Superintendent jong ki District, ki ïoh ïala ka jong ka bhah song pisa la ka long na ka kam khaii masi ne khaii tuh ïa u dewïong” ula kynnoh haba bynrap “Ka Tnad pulit ka dei ban khmih ïala ki jong ki kam lum pisa be-aiñ ha ka jaka ban kdew kti ïa ngi”.
Kat kum ka jingong jong u, ka HNLC kala ïoh lum ïa ki video kaba pyni ïa ki Heh Pulit kiba dang lum pisa be-aiñ na ki nongniah trok kit dewïong.
Haba kynnoh ruh ba ki Nongthaw Aiñ ka Jylla kila kylla long ki nongpynkheiñ aiñ, u Bah Sainkupar ula ong “Ka jing tohkit jong ka CBI kala pynshisha ïa kane bad baroh ki tip ruh mano ba donkti ha lyndet ka jingkhaii tuh ïa u dewïong”.
Ka HNLC kala pynpaw ba ka tnad Pulit ka dei ban sangeh noh ïa ki jingpynbitar da ki khubor ba bakla lem kumta kan pynbor ïa ka kynhun ban pynthut ïa ka National Games ban wan. “Baroh ki tip bha ba kat kane ka lympung nalor baka dei ka lympung ba heh, kan dei ruh ka lympung kamai spah jong ki katto katne ki Politician bad ki riew shimet”.
Haba ïadei bad ka jingwan pyndem wait u Bah Wankupar Marweiñ, u Bah Sainkupar Nongtraw ula pyntip ba une u Finance Secretary barim ka kynhun u khlem wan pyndem satia hynrei ula shongthait noh na ka kam kaba ula shakri mynta la palat 20 snem.
“Ngi la ïoh pdiang ïa ka shithi shongthait jong u mynta la arbnai bad ngi la rai ha katei ka por ban pyllait noh ïa u. Ha kajuh ka por ngi lah thung ruh ïa u Bah Marius Rynjah (Hepkhoit) kum u Finance Secretary ba thymmai bad u Chandame Passah kum u Assistant Finance Secretary” ong u Bah Sainkupar.