Press "Enter" to skip to content

Na ka Valentine’s Day shah shet bun ngut ki samla NE ha Delhi

New Delhi: Bun ngut ki samla kynthei na ki jylla ka thaiñ shatei lammihngi, kynthup na Meghalaya, ki la shah shet kylla ha ki samla ne ha u lok jong ki, kiba na Delhi bad nabar ri ruh kumjuh. Kiba bun na kine kiba shah shet kidei kiba ïakynduh ha ka Valentines Day ne ha ki jingleit ïingmane.
Katkum ka jingthoh ba la pynmih da u Robin Hibu, u Pulit IPS ba peit ïa ki briew jong kane ka thaiñ kiba sah nongbah Delhi, u la ïathuh ba kine bun na kine kiba shah shet kylla, ki la wan ïakynduh ïa ka Helping Hands Society, ha kaba udei uwei na ki nongpeit, la ong ba ki samla na Delhi bad kiba nabar ri, ki pynbiej ïa ki thei samla jong kane ka thaiñ khamtam ha ka sngi Valentines Day ne ha ki jingleit sha ki ïingmane.
Une u heh Pulit u la ïathuh ba kumba 95% na kine ki shynrang ki pynbiej ïa ki samla jong kane k thaiñ kumba ki ieit eh ïa ki tang ban ïoh ïaleh sngewbha ha ka jingkwah brai ka doh, hynrei ynda ki la sngewngiah ne hadien ba kine ki samla ki la armet ne ïoh khun ki iehnoh noh ïa ki bad jah syndon.
U Hibu u la ong ba marshiteng na kine, kiba shah ieh shiteng por, kidei kiba ïakynduh ha ka sngi Valentines Day bad ha kaba leit Jingïaseng. Kine ki shynrang kiba pynbiet ki kynthup ïa ki Doktor, ki Lawyer, ki Engineer, ki Pilot, ki trai dukan, ki Manager, ki Nonghikai bad kiwei kiwei.\
Katto katne ki jingjia kiba kum kine, la ïathuh ba kine ki shynrang shisngi shuwa ka Valentines day ki leit rah ïa ki syntiew hakhmat ïing jong ki ne da ki jingai sngewbha kiba rem dor, nangta ki sms da ki kyntien ieit jali jaum bad kumta ter ter.
Napdeeng kine kiba shah ieh shiteng por, don ruh kiba shah ieh ha ka por ba ki thiah ha Hospital, nangta kiba dang armet, kiba la ïoh khun bad kiwei kiwei.
Kine kiba shah ieh ki wan ud wan nam ha ka Helping Hands Society bad ïathuh lut ïa kine ki jingjia baroh.
Kumta u Hibu, u kyntu ïa ki samla kane ka thaiñ kiba wan pule, kiba wan wad bylla ne wan wadkam sha Delhi ba kim dei ban shu biej klumar ïa ki shynrang ba ki ïakynduh ha nongbah Delhi, hynrei ban da peit bad husiar bha ban nym tare klumar.