Press "Enter" to skip to content

Na ki 3 ïing poi rakhe jubili rupa ka Balang u Blei ha Kynshithem

Kynshi: Ka Balang U Blei (M&A) Kynshithem, ha ka sngi Balang, ka la rakhe ïa ka jingdap 25 snem ne ka Jubili Rupa, da kaba pynlong ïa ka jingïaseng ba kyrpang ha kane ka sngi.
Ha kane ka jingrakhe, la plie ia u mawsahkynmaw bad ka jingkyntiew ïa ka lama da u Rev. Dr. AC Moore. Nangta la ïoh ruh ïa ka jingpynher ïa ki balloon da u Bah S.Marwein bad u Bah T. Parïong kiba long ki nongseng jong ka Balang.
Ha kane ka jingïarakhe ha ka jingïaseng kaba ha ka por 10:30 mynstep, la ïoh ïa ka jingpynkup burom ïa ki lai ngut ki rangbah kiba la long ki nongseng jong ka Balang ha ka snem 1995. Nangta la pynkup burom ruh ïa ki Evangelist bad ki Pastor kiba la ai ka jingshakri ïa ka Balang. La ïoh ruh ïa ka jingai khublei kitbk kitrwiang na ka Circle Nonglait, ka District Mawthadraishan bad na ka Pastor Fellowship jong ka Balang Kmie.
Katkum ka history ba la pynsngew da u Secretary ka Silver Jubilee Celebration Committee u Bah H. L. Myrthong, la ïathuh ba ka Balang U Blei (M&A) Kynshithem, ka la sdang na ki lai tylli ki longing. Hynrei suki suki da ka jingtrei shitrhem ki nongïalam ka Balang, ha kine ki 25 snem, ka la roi sha ki 63 tylli ki ïing bad ki dkhot ka Balang mynta ki don baroh 324 ngut.
Mynta ka Balang, ka long kawei na ki Balang kiba khlaiñ bha hapoh ka District Mawthadraishan, ha kaba ka la kner ïa ki kti ban ïarap lem ïa kiwei pat ki Balang kiba don marjan, da kaba ïarap pyntei ïingmane bad kiwei kiwei de ki kam ïalap ïa ka Gospel.
Ha kane ka jingïakhe la don lang ruh u Rev. AI Kharshïing, Pastor Incharge jong ka Balang Presbyterian Kynshi District, ki Tymmen Basan bad ki Sordar jong ka Shnong Kynshi Pyllun.