Press "Enter" to skip to content

Pynthut ki Pulit Assam ba pynrung kyrteng Aadhaar ki Khasi ha Ummat sha Meghalaya

Shillong, Rymphang, 14: Ka Hynñiewtrep Border Dispute Redressal Forum (HBDRF) mynta ka sngi thohdieng ka la ujor sha u Chief Secretary jong ka Sorkar Jylla hadien ba ka la ïoh ïa ka jingtip kaba bniah ba ki Pulit na ka Jylla Assam ki la wan hiar sha ka shnong Ummat kaba hap ha Block-I ban pynthut ïa ka jingpynrung kyrteng Aadhaar ki Khasi sha ka Jylla Meghalaya.
“Katkum ka jingïoh jingtip na ki dkhot bad na ki nongshong shnong, la ïathuh, katba ki bor synshar District ki dang pynlong ïa ka jingpynryng kyrteng Aadhaar ha ka shnong Ummat, Block-I hynnin ka sngi Palei, ki Pulit Assam ki la wan ban tuklar bad ban phah pynsangeh da ka bor, da kaba ïathuh sha ki nongshong shnong ba ka Sorkar Meghalaya kam lah satia ban pynrung kyrteng Aadhaar, namarba kane ka jaka ka hap hapoh ka jingpeit jong ka Karbi Anglong Autonomous District Council (KAADC) jong ka Jylla Assam,” ong u Nongaiktien jong kane ka Forum u Bah Thomas Passah.
“Kine ki jait jingjia ki dei shuh kiba thymmai bad kiba phyllaw, hynrei, ki nongshong shnong jong ka Meghalaya ki la mad ïa kine ki jingshah pyndik na ka por sha ka por, ïa kaba ngi pyrshah haduh katta katta,” ong une u Nongaiktien ka Forum.
“Namar ka jingpyneh jong ki paidbah bad ka Dorbar Shnong ban pyrshah ïa ka jingshah thombor hynnin ka sngi ka jingpynrung kyrteng haduh mynta ka dang ïai bteng. Hynrei, ka don pat ka jingsngew sheptieng ïoh ki Pulit ka Assam kin wan biang ban pynthud ïa kane ka kam,” ong shuh shuh u kyrwoh.
“Namarkata, ngi kyrpad ba phin shim ïa ki lad ki lynti ban ai jingïada ïa ki paidbah nongshong shnong ka Ummat da kaba buh ïa ki Pulit ka Jylla Meghalaya katba kane ka jingpynrung kyrteng ka dang ïaid shakhmat khnang ban tehlakam ïa kino kino ki jingjia kiba lah ban mih ha kano kano ka por,” la ong ka Forum ha ka ujor sha u Chief Secretary ka Jylla.
Lah ban kdew hangne, ha ka 9 tarik, Kyllalyngkot, 2020, ka Sorkar Assam ka la pynsdang ïa ka jingpynrung kyrteng Aadhaar ha kane kajuh ka shnong ïa kaba la pyrshah da ki nongshong shnong, kynthup ruh u Rangbah Shnong, bad u Rangbah Dong.