Press "Enter" to skip to content

Urlong ka jingangnud ki paidbah ban buh khyrdop talasi mynder ha khappud Meghalaya bad Assam

La plie ïaka Anti-Infiltration Check Gate ha Iew Mawroh:

Nongpoh, Rymphang 14: Ka jingangnud jong ki paidbah ban don noh ka khyrdop talasi mynder haka thaiñ khappud ka jylla Meghalaya bad Assam haka Jirang kala urlong hadien ba u Bah Sosthenes Sohtun MLA ka Jirang kum u kongsan mynta ka sngi u la leit ban plie paidbah ïa ka khyrdop talasi mynder (Anti-Infiltration Check Gate) jong ka tnad pulit ha Iew Mawroh jong ka Jirang Constituency.
Ïa katei ka khyrdop talasi mynder la angnud ban buh la slem khamtam hadien ba ka jylla Assam kala pyntreikam ïaka National register of Citizens (NRCs) ha akab da ki lakh ngut ki paidbah kila kyntait ha katei ka thup kaba la buh jingma ruh ïaka jylla naka jingwan tuid ki mynder sha ka jylla Meghalaya, bad dei halor katei ka nongrim lyngba ka jingshimkhia jong u MLA ban buh jingthoh sha ka sorkar ha u snem bala dep la lah ban plie noh ïaka bad sdang treikam naduh mynta ka sngi.
Ha katei ka sngi ka jingplie ïa katei ka khyrdop talasi mynder la sakhi ruh da ka jingdon lang ki heh pulit ka jylla ba kynthup ïa u Bah H Nongpluh IPS, ADGP (SB), Bah O Passi IPS DIGP, Bah S Nongtnger SP ka Infiltration, Bah C Syrti SP ka Ri-Bhoi District, Kong V Hynniewta EAC ka Ri-Bhoi District bad kiwei kiwei ki riew rangbah bad ki ophisar pulit.
Haba kren ha katei ka sngi kum u kongsan naka liang u Bah Sosthenes Sohtun u la pynpaw ka jingsngewkmen kaba khraw ba katei ka jingkhmih lynti kaba la slem ban don noh ka khyrdop talasi mynder kala urlong naka bynta ban ïada naka jingwan rung kyrthlep ki mynder sha ka jylla khamtam ka thaiñ Jirang kaba dei ka khappud ka Meghalaya bad Assam.
U la ai ruh ka jingïaroh ïaka Hima Jirang kaba la don ka jingkitkhlieh naka bynta ka jaitbynriew bad ai ei ruh ïaka jaka naka bynta ban tei ïa katei ka khyrdop ha katei ka shnong khnang ba ki bar jylla kin nym ioh ban rung mon bad laitluid lyngba katei ka thaiñ, namar kumba ju long man ka por u tei u surok na Rani sha Jirang u long laitluid ban rung ban mih.
U la ong ruh ba ka jingwan katei ka Anti Infiltration Check gate ha katei ka thaiñ kan long ka jingshngaiñ ruh ïaki paidbah kiba shong ba sha katei ka thaiñ bad lyngba katei ka khyrdop yn lah ban tehlakam ïaki mynder kiba wan ban rungtuh sha ka jylla.
U la kyrpad ruh naduh ki nongsynshar Hima, Raid bad ki nongïalam shnong ba kin ai ka jingïatreilang bad ki pulit naka bynta ban lah ban tehlakam ïaka jingrung bad jingmih jong ki mynder sha katei ka thaiñ khamtam ba ka dei ka jaka khappud, u la bynrap.
La ai jingkren ruh ha katei ka sngi da u Bah H Nongpluh IPS, ADGP (SB), Bah O Passi IPS DIGP, Bah C Syrti SP ka Ri-Bhoi kiba la pynpaw ka jingsngewkmen kaba khraw ba la lah ban plie paidbah noh ïa katei ka khyrdop ha ka shnong Iew Mawroh khamtam ka jingshah kyntait da ki lakh ngut ki paidbah hadien ka jingpyntreikam ïaka NRC ha Assam ba lyngba katei ka khyrdop yn lah ban talasi ïaki mynder kiba rung tuh sha ka jylla Meghalaya.