Press "Enter" to skip to content

Ban long ka jaidbynriew Tipblei Tipbriew

Bah E.Nongwah:

Lada ka dei ïa ngi ban pyrkhat bad im na ka bynta ki para briew ka kamram kaba nyngkong eh ka long ban tip ba ngi long ki jingthaw kiba kordor eh ha ka khmat jong U Blei. Ban tip bad ithuh kat ïa uta U Blei ba khuid bad uba hok, ruh ban ïa im suk im saiñ para jingthaw jong uta uba long u Nongthaw ïa ngi. Ka don ka jingïapher kaba khraw bha hapdeng ka jingthew ban kam ba ngin long ka jaidbynriew tipbriew tipblei. La kumno kumno ka donkam shuwa ban ngam kham jylliew ha kaba puson ïa ka jingïadei bad U Blei bad shisien ba ka la shong tynrai ha ka jingmut jong ngi, ban long kiba tipbriew kan ym don jingeh ei ei.
Ki jingjia ha kine ki sngi na ki jingïasiat pathar, jingïapynïap, jingïaumsnam, jingmynsaw bad kum kita ki bor pyntriem, ki mih na ka jinglong kaba shapoh jong u briew, bad na kiba kum kita lada yn shu shim lyngkot hapdeng ki jingmut kiba ïar, ka long ba kito kiba ju mlien ban shim ïa ki lynti jingpyrkhat ba sniew bad ba pynsyier ïa kiwei pat, ka long “Namar ba ki wan na ka liang (back ground) kaba ym don jingsuk ne kiba dap tang da ka jingpyrkhat baroh. Ka la donkam ba ngin phai sha ki ïing ki sem na kaba lah ban mih ki daw jong ki jingsniew baroh. Ka jingkylli mynta ka long, “Hato ki kpa ki kmie ki la ju long ne em ka rukom im bad jinglong ba bha ha la ka jong ka ïing, ha khmat ki khun ki kti, kaba ngi ju ong ba ka ktien nongwei. “The Role Model. Imat ki kmie ki kpa lane khamtam U kpa kakmie, ki la klet ban sneng ban pyni ïa la ki khun ki pyrsa.
Ha man la ki lad ba ki surok shnong ki dap da ki samla khynnah kiba wat ban leit skul ruh kim mon shuh bad kaba katno tam ba kin mane ïa U Blei ha ki ïingmane. Mano ban ai jingkheiñ? Hato ym dei ki kpa ki kmie? Kat shaba phai ki bun ki DROP OUT STUDENTS, bad na kiba kum kita, ki dei kiba rung ha kiwei pat ki kynhun kieng atiar ban im pyntriem bad pynjot ïa kiwei pat bad ban pyrta shla ha ka pyrthei ba ki im bad ïap na ka bynta ka Jaidbynriew. Bad dei kata ka jingpyrkhat ba bakla, ba la ong sha khmat, la klet ïa u Blei ban pynïap ïa u para briew. Nga ngeit ba ba ki nongpule ïa kane ka jingthoh kin ïamynjur lem shispah na ka shispah, ba ki jinglute, jingtuh jingthiem, jingpynïap briew, jingpynkulmar, jingïakhih be-aiñ, ki jingpyrshah ïa ka jingshongsuk bad jinglong jai jai ha ka imlang ka sahlang, ki mih na kito ki briew bad samla kiba la ïap ka jingïatiplem jong ki. Ki dei kita ki juh lehse ki riewpyrkhat, kiba ka Sngi U Blei ka dei ka jong ki, ban kiew ha khmat jong u Blei ha ki ïingmane, shisien shi taïew bad ban set tala ïa U Jisu ha Iingmane, tat haduh ban ïashem ha kawei pat ka taïew.
Ka Imlang sahlang ha kane ka Ri jong ngi, ha ka nongbah Shillong bad ha kiwei ruh ki jaka, ka la shong syier eh shibun ha kine ki khyndiat snem. Ki khunlung ki khynnah ki la sheptieng bad im khuslai, ki nongïalam ha ki ïing ki sem ki rit mynsiem namar ki bor pynshyrkhei na ki nongïaleh pyrshah jingsuk bad ki Sorkar. Ngi ïohi ruh ba wat kito kiba don ha ka bor wanrah ïa ka jingshong shngaiñ bad jingïaid beit ka aiñ (Police Law and Order), ki pyndonkam bakla ïa la ka bor bad jingpynïaid. Kumba ka long mynta, ngi ïohi ïa ka jingbym ïaid beit shuh ka rukom synshar, khamtam ki bor pule, kiba pynlong khongpong lut ïa kiei kiei baroh. Ha ka jaka ban pynbeit ïa kaba bakla, la pynbeit pynban ïa ka jingbakla. Bad kumba ki mih kine kiei kiei ïa ka jingbakla da ka naduh kine ki khyndiat sngi haduh mynta.
Ka dang don ka jingkhmih kyrmen ba sa shisien kan wan pat ka aïom ksiar ha kane ka Ri jong ngi, lada ka dei ba ki Nongïalam ha ka saiñ hima sima jong ngi kin aiti thymmai ïalade ha uta uba long u Nongbishar bad Nongsynshar uba hok bad uba ïai neh. Ka jingkhot ïa ki Nongsynshar ki Nongmihkhmat jong u paidbah, ki riewpyrkhat aiñ lem bad ki nongshong shnong baroh, ba kin tip ba U Blei u plie rynghang ïa ka khyrdop jong ka jingieit jong u ban aiti lut bad shakri khlem jingsheptieng, ban kren ïa kaba dei, ban pyrkhat ïa kaba dei, leh ïa kaba dei bad ban kiar na ki jingkwah burom bad jinglalot spah, kiba la wanrah ïa kiba bun ki jingsniew bad jingbymman ha kane ka Ri jong ngi.
Ka don ruh hangne ka jingkhot ïa kito ki samla, kiba don ha ki kynhun lehnoh (Terrorist Group) ba kin iehnoh ïa kito ki kam pyntriem baroh, ban aiti thymmai ba U Jisu Khrist uba long tang ma U Ka Lynti ka Jingshisha bad ka Jingim de. Ka jingduwai ka long ba U Blei um ktah ïa phi, un pynkynduh ïa phi, kumba u la pynpaw bad leh ïa u Saul jong ka Tarsus, ba ka lynti jong u (kum u terrorist) sha Damascus ban pynïap ïa ki khristan ne kiba bud ïa U Jisu Khrist. Lada dei ba phi la ju pyrkhat shisha na ka bynta ka Jaidbynriew kam dei da ka lynti jong ka jingïaumsnam, jinglute, jingpynïap bad kumta ter ter. Phi tharai ba U Blei u sngewbha ïa kaba kum kine ki jingleh? Em, da lei lei ka jingkhot ïa phi kynhun lehnoh, ba ki paidbah ki rit mynsiem. Ai ba U Blei un ktah ïa phi da kaba nga duwai haba phin pule shaphang kane, ba yn ym tip shuh shaphang jong phi kum ka kynhun lehnoh, hynrei kum ka kynhun U Jisu Khrist, bad na ka bynta ka kyrteng jong u (Henceforth I prayh,that you will be no longer known as Terrorist Group, but as Jesus Christ Group). Ka jingduwai bad jingkyrmen kum ka
Jaidbynriew ne kum ki Nongbud jong U Jisu Khrist, ka long bad kan ïai long, ym shuh ka HNLC, ha ka jingmut jong phi, hynrei ‘Holy Nation Liberation for Christ (HNLC). Ha kaba nga ngeit ba U Blei un ïarap bad aibor ïa phi.
Ai ba ngin ïai buh tang ki jingduwai kum ka jaidbynriew na ka bynta kitei ki jingshisha baroh.
– Phaidien.