Press "Enter" to skip to content

Ka jingshah pynbieit ki samla NE ha Delhi

Da ki spah ngut ki samla na ki jylla ka thaiñ sshatei lammihngi ki tuid sha nongbah Delhi na ka bynta ban leit pule bad kumjuh ruh ban leit wad kam wad jam. Ka daw ka long ba ki jaka pule ha kane ka thaiñ kim pat biang satia katkum ka jingkwah ne angnud ki samla kane ka thaiñ. Nangta kiba leit wad kam pat kadei namar ka kam ka jam hangne ka kyrduh palat bad ki samla kiba kwah ban ïeng ha la ki jong ki kjat ki hap ban mih na la ïing ban leit sha katei ka nongbah bad kiwei de ki jaka jong ka ri India na ka bynta ka kam ka jam.
Lehse kiba bun kiba leit sha katei ka nongbah jong ka ri India bad kiwei de ki nongbah bah eh, ki la ïoh ïa ka jingjop ha kaba ki la pyndep ïa ki jingpule ha ki kyrdan kiba kham heh ne ha kiwei pat ki lain jingpule kibym don sha kane ka thaiñ. Nangta ki don ruh kiba leit wad kam wad jam kiba la ïoh shisha ki kam kiba biang ne kiba la lah ban kyrshan ïalade bad ïa ka ïing ka sem la jong.
Hynrei kaei kaba sngewsih ka long ba ki don ruh ki samla kiba ha ka jingkyrmen ban poi sha ka lynti kaba bha bad ka lawei jong ka jingkyrmen, ki poi pynban sha ka jingjot bad sha ka jingïam kthang namar ki ngat ha ka nusip jot, kaba kim poi pyrkhat satia bad kiba bun na kine ruh kidei kiba shida than ka jinglong bad ki don ruh kiba leh hi nalade ha ka jingsngew stad jong ki hi.
Kumba artaïew tam mynta, u heh Pulit jong ka nongbah Delhi, ba la buh da ka sorkar India ban peit ïa ka bha ka miat jong ki briew na North East kiba leit pule bad leit trei ha nongbah Delhi, u Robin Hibu, IPS, uba don bynta lang bad ka Helping Hands Society, u la ïathuh ba ka jingïakynduh bad ki lanot kiba ngat ha ka nusip jot, kadei namar ba kiba bun na ki, ki ngat ha ka jingshah pynbieit bad ka jingshah thok ha ki briew ne ki samla kiba don ha katei ka nongbah. Kaei kaba sngew shyrkhei ka long ba ki don ruh ki briew kiba na kane ka thaiñ kiba ïatreilang bad kine ki riew dakaid na Delhi ban pynngop bad pynbieit ïa ki samla jong kane ka thaiñ. Kaei kaba une u heh Pulit u la ïathuh ha ka jinglap jong u, kadei kaba ki samla kane ka thaiñ kin ngat beit, namar ba kidei ki briew kiba la ïaithuh ithaw bad kiba lah ban shaniah. Pynban kim poi pyrkhat ba kin shah shet kylla ynda ki la poi hangtei. Kane kadei namar ka jingshida bad ka jinglui lui hi jong ki paidbah.
Kawei pat ka bynta kadei ka jingle stad bad ka jingleh stad jong kine kiba leit shatei, la ka long ka jingleit pule ne ka jingleit wad kam. Kine ki shah shet shukor ha ka jingieit. U Hibu, u ïathuh ba kine ki sdang shuwa da ka jingïaieit kum ha ki sngi rakhe Valentines Day. Nangta ha ki jingleit jingïaseng bad kiwei kiwei de ki jingïakynduh. Balei kine ki shah pynbieit kumne?. Lehse kadei namar ba ki peit ïa ka spah ka phew jong kine ki nongshet shukor, namar kiba bun kidei ki heh ki haiñ kum ki Doktor, ki Engineer, ki Pilot, ki Nonghikai, ki nongkhaïi bad kiwei kiwei. Kine ki samla ha ka jingshisha ki la dei ban pyrkhat arsien ha shuwa ba kin ryngkoh, namar na ka por sha ka por ki khubor ki ju mih halor ka jinsghah shet shukor ki samla ha ka jingieit ne ka jingpynbieit kine ki Romeo na nongbah Delhi. Kane ka pyni ruh ba ki dei ki khun ki bym sngap ïa ka jingsneng bad ka jingpyni ki kmie kpa. Namar ym tharai ba kin kmie ki kpa kin shu phah ïa ki shaduh nongbah Delhi, khlem ka jingmaham ne ka jingsneng jing kyntu. Lehse napdeng jong kine, ki lah ban don ruh kiba ngat ha ka jingriam tang ban pynsngewbha ïala ka jong ka met ne ban kamai spah kloi. Lah ban don ruh kiba sngew khyllew, ba kin ïapoikha bad ki briew kiba na Delhi.
Namarkata ka daw ka long kaba donkam haduh katta katta ba ki kmie ki kpa kidei ban shimkhia bha ïa kane. Ym ban shu sngew khyllew ba ki khun jong ki, ki pule ne trei sha nongbah Delhi. Nalorkata ruh donkam ka jingphikir bad ka jingtohkit kaba bniah, haba ki khun ki kti jong ki, ki don ha ri nongwei. Ka long ka jingkyntu ruh ïa ki bor Pulit bad ki bor sorkar ban peit bniah ïa ki kynhun ne ki agency kiba ju wan bobarbor shane ha ka kyrteng ban ïarap pynïoh jaka pule, nangta ban pynïoh kam ïoh jam. Lym kumta kiba bun ki samla kiba mih na ïing da ka jingkyrmen, hynrei kin wan phai pat da ka jingjaw ummat.