Press "Enter" to skip to content

Da ka jingïalang paidbah yn lum ki RS Mawlai ban pynkhlaiñ ïa ka Revolution

Shillong: Kiba bun ki Rangbah Shnong ka Mawlai, ki la rai ban khot da ka jingïalang paidbah ha ka 29 tarik mynta u bnai por 12:30 mynsngi ha Madan Mawroh na ka bynta ban pynshai bad pynpaw ka jingkyrshan ïa ka Revolution, ba la ïalam da ka Kynhun “Iada la ka Ri”.
Ki Rangbah Shnong kiba la wan sha ka jingïalang ba la khot da ka “Iada la ka Ri” kaba la long ha Indoor Stadium, Mawapkhaw Mawdatbaki, da kawei ka jingmut ka la shim ïa ka rai ban khot da ka jingïalang paidbah ban pynshai shuh shuh halor ka Revolution ba la ïalam da u Bah Ardent Basaïawmoit, MLA barim ka Nongkrem.
Ha kane ka jingïalang na ka liang u Bah Ardent, u la pynshai ïa ki Rangbah Shnong halor ka jingdonkam ban don noh da ka Revolution ban dawa na ki bor sorkar pdeng ban wanrah noh da ki aiñ kiba khlaiñ kiba lah ban ai ka jingïada kaba paka na ka bynta ki trai ri trai muluk jong ka jylla. Kine ki aiñ ong u Bah Ardent kin ïada wat na ki aiñ kiba thaw da ka sorkar India kiba lah ban ktah ïa ka bor jong ki Dorbar Shnong bad ki Kolshor jong u Khasi. U la batai ruh ïa ka jingangnud ban ïatrei bad ïatylli lang na ka bynta ban wanrah ka jingïaieit, ka jingïatylli bad ka jinglang ban ïa ka ri bad ka jaidbynriew.
Lah ban kdew hangne ba hynnin ka sngi, ka kynhun ïada la ka ri ka la pynlong ïa ka jingïalang bad ka Rangbah Shnong jong ka Nongthymmai Pyllun.
Ka jingïakynduh bad ki Rangbah Shnong kadei ka rai kaba hakhmat duh ba la shim ha ka jingïalang jong ka jaidbynriew ba la khot da u Bah Ardent ha ka 6 tarik mynta u bnai ha Madan Student Shillong.