Press "Enter" to skip to content

Da ki Sur ka Jingim ban “Kner sha Ki”

Shillong: Artylli ki kynhun ki la ïasnohkti lang ha ka 18 tarik mynta u bnai ban pynlong kawei ka prokram na ka bynta ka jingim kaba khmabha jong ki briew kiba duk ba shem shitom.
Ka AA- LEYAH School of Music ka la pynlong ïa ka janmiet ki sur jingrwai (Musical Evening) ba la ai kyrteng Rhythm of Life ne ki Sur ka Jingim na ka bynta ban pynmih pisa ban ïarap ïa ka kynhun ba la ai kyrteng Kner Sha Ki Mission Organisation.
Ïa kane ka janmiet ki Sur Jingrwai la pynlong ha LadyKeane College, ha kaba la ïashim bynta da ki khynnah pule jong kane ka School of Music bad kumjuh ruh ki khynnah pule jong ka Badari School of Music Mairang.
Ki khynnah ki la pyni ïa ki sap ba kyrpang jong ki naduh ka Musical Play, ka jingtem guitar marwei, tem guitar bun ngut (Guitar Ensemble), ka jingtem Piano bad kumjuh ruh ki jingrwai.
Ka Khmih Sha Ki Mission Organisation: Ka Khmih Sha Ki Mission Organisation, kadei ka kynhun trei mon sngewbha na ka bynta ban kner la ki kti sha ki briew kiba duk kiba shitom, khamtam eh ha ka jingnang jingstad. Kane ka kynhun kaba la seng naduh ka snem 2000, ka la trei khambun ki kam na ka bynta ban ïarap ïa ki khynnah ha ka jingpule, khamtam ki bym kotbor ban leit skul. Haduh mynta kane ka kynhun, ka la ïarap ïa kumba 500 ngut ki khynnah skul ha ka jingleit skul jong ki. Nangta ha ka snem 2017, ka la sdang ïa ka ïing ri khunswet ha Mawñianglah ba la ai kyrteng “Santuary of Hope”, ha kaba la peit bad sumar ïa kumba 15 ngut ki khynnah khunswet.
Kane ka kynhun ka la ïarap ruh ïa ki kynhun Self Help Group bad kumjuh ruh ka Vocational Training na ka bynta ki briew kiba wan na ki longing baduk.