Press "Enter" to skip to content

Dei ban pyntreikam pyrkhing shwa da ka MRSSA ha jylla katba ym pat ïoh ILP

Wat la ka sorkar MDA ka la leit ïa kynduh ïa u myntri kam pohïing ka ri halor ka resolution ba la dep rai da ka ïing dorbar thawaiñ ka jylla halor ka Inner Line Permit (ILP) hynrei la sngewthuh ba kane kan dang kham shim por hi kat haduh ban da ai ïa ka jylla Meghalaya. Kaei kaba donkam eh ka long ba ka sorkar kan pyntreikam shwa ia ka Meghalaya Residents Security and Safety Act (MRSSA) 2016 katba ym pat iohi ia ka ILP. Namar kane ka aiñ ruh ka la long hi kum ka ILP namar haba kiwei ki jaidbynriew ki rung shapoh ka jylla lada palat ïa ka 24 kynta la hap ban register kyrteng lym kumta yn shah kem beit ha ki bor ka aiñ.
Namar ïa kane ka ILP ba mynta ka sorkar pdeng kan dang hap ban rah shwa ha ka Kynhun Myntri jognka sorkar NDA bad hadien ba la ïoh ka jingmynjur kan sa leit sha u President ban soi pynskhem shwa ban pynbna ba kan long aiñ hangne ha Meghalaya. Nalor kata hadien kane hap ban thaw sa ki kyndon aiñ jongka ILP ki ban treikam ha kane ka jylla kumta kane hi kan dang kham shimpor kaei kaba donkam kyrkieh mynta ka dei beit ban ïoh noh ïa ka MRSSA namar kane ka la dei kawei na ki aiñ kaba nep bha ban pyntreikam hapoh kane ka jylla ban ïada ïa ka jingwan rung ki mynder ri sha ka jylla.
Kawei ba ka ILP kan kham shimpor namar baroh ngi ïa ïohi hadien ba ka CAB ka la ïoh ka jingmynjur na ka Lok Sabha bad Rajya Sabha bad soi ruh da u President ka ri ka la jia ka jingïakhih ha kylleng ki jylla ka ri India ban pyrshah ïa kane ka aiñ Citizenship Amendment Act (CAA) 2019. Mynta da shisha kiba bun ki jylla ki la ïeng pyrshah beit ïa kane ka aiñ namar ki tip shai ba ka long ka aiñ kaba khniot ïa ki trai ri bad ki rit paid na ka bynta ban ailad ïa ki bar ri ban long ki nongshong shnong hapoh ka ri India. ïa kane ka thaiñ shatei lam mihngi lei lei jong ka ri India kane ka aiñ ka long kum ka aiñ ïakjakor hi namar khlem pep kan khniot beiñ ïa ki trai ri trai muluk riewlum rit paid kane ka thaiñ. Namar kam pher lada pdiang ïa u ban long u nong India ha kano kano ka jylla ruh hynrei haba u wan sha ki jylla kane ka thaiñ ym lah shuh ban beh ïa u namar u la dei u nong India bad lada u sah ruh u lah beit ryngkat ki kot ki sla kiba biang.
Ka jingiakhih jong ki kynhun bad ki seng bapher bapher ki long da shisha kiba shonghok namar kane ka aiñ ka long ka aiñ kaba khniot ïa ki rit paid bad ai lad ban kylla heh paid u mynder ri. Ym tip shuh kane ka lah ban dei ka buit ba shalyndet jongka BJP ban thynnian ïa kine ki mynder ri sha kane ka thaiñ hi khnang ba kane ka thaiñ kan long ka ktem jongka BJP ha kawei ka por kaba ym don shuh ba lah ruh ban pynkhih. Namar ka BJP ka don ka thong ba naduh khlieh haduh kjat ka India ne naduh shatei haduh shathie, mihngi haduh sepngi kan long ka ri ban bun ki Hindu khnang ban ïoh khot ïa kane ka ri kum kata ka ri Hindu kaba dei ka thong jongka shwa ka election 2023. Kumta ki paidbah bad ki seng bhalang jongka jylla ruh kim dei ban shu klet noh tang kumto ïa ka jingïakhih dawa ILP hapoh ka jylla namar lada klet kane ka kam ka lah ban shu jah rngai noh hynrei na ka por sha ka por dei beit ban ïai pynkynmaw ïa ka sorkar khnang ba kan leit bud dien bad tynruh sha Delhi ban sted kane ka jingpyntreikam kumba la mynjur hapoh ka ïing dorbar thawaiñ ka jylla da baroh 60 ngut ki MLA.
Kynmaw ki 60 ngut ki MLA ki rai ka mut ba dei ka rai jong u paidbah namar kine ki dei kiba mih khmat na ka bynta ki paidbah hapoh ka tei ka ïing dorbar thawaiñ . Hooid ym baroh ki don ha ka Liang Synshar na kata ka daw donkam ban ïai bud dien ban ïai pynkynmaw khnang ba ka sorkar ruh kan shim khia ïa kane ka kam.
Ym lah ban len kane ka sorkar ka pyrshang hi ban leit tynruh sha Delhi halor kane ka ILP hynrei kumba ka paw ka dei ka sorkar pdeng kaba kham leh kiar ban ym pyntreikam ïaka ILP ha ka jylla. Ka sorkar MDA ka dei ban ym shong thait hynrei ban leit bud dien beit tad haduh ban da urlong ka Resolution.