Press "Enter" to skip to content

Ka I.L.P ha Jylla ki Lyoh ha ka dum ka lyngngoh

Bah P.S.Giri- Sohlaper Mawlasnai:

Ka 19th Nohprah kam dei ka sngi ban sah jingkynmaw pateng la pateng bad kan ïai neh bad ïai sah ruh ha ka History jong kane ka Jylla ki lyoh (Meghalaya) ha kaba baroh 60 ngut ki Lei San Snem ki la mynjur kawei ka jingmut la sign lang ïa kawei ka Resolution ïa kaba la tip kum ka Eastern Frontier Regulation 1873, kata ban dawa na ka Sorkar pdeng ban pyntreikam noh da ka (ILP) Inner Line Permit hapoh kane ka Jylla. Bad naduh katei ka sngi la ïohsngew ba baroh ki 60 ngut khlem da kheiñ na kano kano ka seng ne ka Party ki la mynjur da kawei ka jingmut ban ïa leit sha Delhi ban leit ïakynduh ïa u Big Boss, kata ym dei ïa uto u Amit Paul uba dei u nongrwai Indian Idol uba ki paidbah Khasi ki la pyndeng ksiar pyndeng paila ha kato ka por ba ki pdiang sngewbha ïa u kynthup ïa ki bun ki shnong Khasi kum ka Mawlai bad kumjuh ruh shawei shawei. Ym tang katta ka sorkar Meghalaya ha katei ka por jong u Dr.D.D.Lapang ka pynkup burom syndon ïa u kum u Brand Ambassador, hynrei mynta shaei u jah haba katto ngi la pynkiew skong, hap ban kylli na kito ki Bah bad ki Kong. Hynrei la ïohsngew ba ka jingthmu ka jong ki la long ban leit ïakynduh ïa u Amit Shah bad ban pynsngew ha ki tyndong shkor ki jong u ba ka jylla Meghalaya ka la donkam ban pyntreikam noh mardor ïa ka ILP khnang ban lait na ka jingwan rung kyrthep jong kiwei ki jaitbynriew na kiwei pat ki jylla, kumba la pyntreikam dang shen ha kawei na ki jylla North East kata dei ka Jylla Manipur.
La ïohi bad ïohsngew katba ka (COMSO) Confederation of Student Meghalaya Organization, ka dang bunkam ban shong kyllaiñ myngngor ha phyllaw jong ka State Central Library bad kumjuh ruh ki Seng Bhalang ki dang pynlut por ban leit pynlong jingïalang lajan baroh ki ïew ki hat kiba don hangne hapoh ka Jylla ban pynsngew ha kajuh ka por sha ki shkor jong ki 60 ngut ki Lei San Snem shaphang ka ILP. Hynrei la ïohi pat mynta katba nang ïaid ki sngi kita kiba la khlei la ki jong ki juban lak ban leit ïakynduh ïa u Amit Shah imat ki la sdang ban ïa klet noh ki kheiñ bad pynlong pynban kum ka kam shet khun jakai ba ki nongïalam hapoh ka Sorkar MDA kynthup ki Minister bad kumjuh ki MLA kiba bunkam mynta ha ka ban pyllait bad khaïi tuh ïa u Dewïong ryngkat bad ka ong Hai Re Hai ka jingmuja kaba mynta janai ban ïa shalan tuh ïa u dewïong pisa ban ïa kamai.”La dei shisha kumba ong ka ktien nongwei “Politician is a man who checks hand before election and cheeked their head after election plan for money not for the development.” Ngeit ngim pat ïa klet bad ngi dang ïai kynmaw bad ha kito ki por u (Late) Prime Minister Atal Bihari Vajpee u wan ïuh kjat ha kane ka nongbah Shillong, kumno u kren bad u ong, ki jylla kiba jur palat ka jingbam sap hangne ha ka jylla North East kaba nyngkong ka dei ka Manipur bad kaba ar pat ka dei ka Meghalaya mynta lei lei ka jylla jong ngi ka la kot bad kynjoh 48 snem ha ka rta imat ka la wan ha ka kyrdan kaba nyngkong top position and Distinction ha kaba ïadei bad ka jingbamsap, ym dei tang ha kaba ïadei bad u Dewïong bad shibun kiwei kiwei ki kam ruh kumjuh. Hynrei da ka bor jong ka spah bad ka pisa la tap matlah bad set kyllut noh ïa baroh. Kumta ha kaba ïadei bad katei ka jingbamsap ban ïa khaïi tuh ïa u dewïong, la kyntu ïa ka kynhun tohkit CBI ba ka dei ban ai da ka (Award) khusnam kaba heh ïa baroh kitei ba la ïoh position bad distinction da kaba ai ïa ka jingpynsaja kaba tyngeh bad ha kajuh ka por ban pynmad da ka ja dai ym ha ki jail na along kiba don ha kane ka jylla, la dei ban rah bad set ïa ki ha kiwei pat kiba heh kiba don hapoh ka Ri India kata sha Central Jail naduh ki dalal bad kiwei kiwei ruh kiba la don kti lang ha kum kane ka kam, haduh ba la pynlong ïa u para ba u hap ban weng noh ïa la u jong hynmen na ka map ïing jong ka jylla Meghalaya, namar um dei u nongsamaria babha. Namar ba u la ïaid ha ka lynti kaba bakla bad u hap ban kohnguh ruh ïa ki paralok ba marjan kum ka PDF, UDP,HSPDP, bad BJP ïa kaei kaba ki la dawa lym da kumta kaei ka ban jia.
Hooid, ngim lah ban len ïa kane ka jingshisha ba ha u snern 2015 mynba ka aiñ tih bad khaïi dewïong ka la sdang ban pyntreikam bad ka dei kato ka por ba dang synshar ka Sorkar MUA-II ba la ïalam da u Dr. Mukul Sangma la ïohi shisha katei ka sorkar ha katei ka por ka la pyndonkam hok katkum ka lynti jong ka aiñ da kaba kem la jan baroh ki truck kit dewïong beaiñ. La ïohi bad ïohsngew ha katei ka por kiba bun ki bapli ki Driver Truck ki la shu poi along bad bam ja dai ei khamakha kaba la kot bad kynjoh da ki bun phew ngut ha ka shisngi bad kiba bun bad khambun kiba la shah kem ha katei ka por dei ki driver truck na ki thaiñ Jaiñtia. Hynrei kaba sngewphylla bad sngewlyngngoh bad ïohsngew pat ba ha ka Sorkar MDA kaba mynta bad hapoh ka jingïalam jong u Conrad K. Sangma mynta lajan dap da ki bnai ki truck kit dewïong beaiñ ki la ïaid la jan manla ki dong bad ki jaka ym shem la ïohsngew lane mih Iyngka ki lad pathai khubor ba la shah bat ki itruck kit dewïong, hynrei dei tad ha ka 7th Rymphang la paw pyrthei tyngkreiñ ïa ka jingbam sap jong ka Sorkar MDA bad dei na kane ka daw la lait ruh ka bam ja dai ki driver truck ym kum ha ka por ka Sorkar MUA II. Hangne la paw shai kdar ba ka don kaei re kaei kaba sha Iyndet ïa kaba la buhrieh noh da ka bor jong ka Andha Kanoon naduh ki Minister, ki Ophisar bad kumjuh ki briew jong ka aiñ pulit. Hynrei ha kaba ïadei bad kawei pat ka liang ngi lah khlem da ai ka jingïaroh ïa kito ki briew kiba bat ïa ka aiñ hapoh kane ka jylla jong ngi ïa ka jingsian ka jingshalak bad ïa ka jingnep ki khmat jong ki, ïa ki nongkhaïi drugs uba tang 10 gram ka jingkhia ki juh ïoh kem la jan man la ka por bad ba la mih bad ïohi bunsien Iyngba ki lad pathar khubor. Hynrei kaba sngewphylla bad ïohsngew pat ba kat ki truck kiba kit tuh ïa u dewïong kiba heh da ki phew ton ki ïaid sahuh Iyngba bun k i jaka jong kane ka jylla haduh ban da poi shaduh Nalbari Assam kiba sawa kum ki tyngam ki laren ha ka por mynmiet kim ïohi bad ïoh kem, sa ïa pyrkhat ma phi ki nongpule kaei shisha kane. Bad ha kajuh ka pynlong ïa kiba bun ki Shnong ban ïa ap miet bad peit miet naduh ki shynrang wat haduh ki kynthei ruh kumjuh la kum ba ïa ap ïa ka Christmas bad Newyear. Katkum ka jingtip ha ki thaiñ Ri Bhoi ym na ka bynta ban ïa ap miet ïa ki Nongtuh, Nonglute ne Mynshohnoh hynrei ban ïa ap miet na ka bynta kitei ki truck kit dewïong beaiñ kumba la ïathuh da u wei u Rangbah. Khnang ban ïa ïoh jingaisngewbha kumba ïoh lem u Myntri ki kam Pohïing barim. Teng teng la ïohsngew ba la mih ruh wat hapdeng ka jingïashoh ïadat bad ka pynlong ïa kiba bun ki nongñiah kiba dei ki driver truck khasi ban brut beit kat kiba ïeng ha Iynti bad ha kajuh ka por ban ong bad kren balei da kane ka lynti phi bsa khun phi bsa kti hato dei kane keiñ ba ong para khasi. Namar ka jingshah kynnoh bad shah kdew kti palat ïa la u jong u hynmen kata ïa u James K. Sangma ha kaba ïadei bad katei ka kam, u para kata u Conrad K.Sangma u la wanrah noh syndon da uwei pat ban long u nongsumar ïing hapoh kane ka Jylla uba dei syndon na tyllong par dewïong kata ha ka 12 tarik Rynphang 2020.To ngin ïa peit aïu utei u nongsumar ïing ba thymmai bad ki nongpahara jong u kin leh ha kaba ïa ïdei bad katei ka kam khaïi dewïong beaiñ ne ïoh dei tang ban pynhun ïa ki paralok kata na ka UDP kaba ju kdew kti bad kynnoh barabor ha kaba ïadei bad katei ka kam khaïi dewïong beaiñ.
Bad ha kaba ïadei bad ka jingbuh teng ngi lap bad ngi shem ba la jan man la kawei pa kawei ka sorkar kaba synshar hangne ha Jylla Meghalaya ka jong ngi ka dei ka Sorkar buhteng. Ki paitbah ki la lap bad shem ïa kata ka jingbuhteng jong kawei ka sorkar hadien kawei pat ka dei shaphang ka jingtei ïa ka ïing shong Dorbar kaba thymrnai namar kaba don ruh ka la pluh ad shah bam shngiam ha ka ding ïa kaba la kot bad kynjoh da ki bun bun snem mynta kaba haduh kine ki sngi kam shym la lah ban pynurlong kumta la shu buhteng na kawei ka snem sha kawei pat kumba long mynta ki paitbah nongshong shnong hapoh kane ka jylla ki dap da ka jingsngew lehraiñ ban tip ne ïohsngew ba ha kine ki sngi 90% na ki nongshong shnong ki jong ka kim tip haei ka don kata ka ïing shong dorbar jong ka Meghalaya katba ha kito ki snern kiba mynshuwa kum ba 90% ki tip lut bad baroh ki ai ka jubab ha Khyndai Lad Iew Pulit (Police Bazar) hynrei mynta pat shaei, shish la sngewlehraiñ shisha dei na kane ka daw keiñ ka kyntien ruh ka ong Lehraiñ ki Nongpeit ïa ki Nongeit. Ynnai ïa kren shaphang u pud u sam uba ïa dei hapdeng ka Assam bad Meghalaya bad shibun kiwei kiwei ruh ki kam Khnang ban ïa tip paitbah ka ïingshong durbar ba shipor jong ka ka don ha ka Office jong ka Art and Culture ha Rilbong Shillong.
Mynta pat sa kawei ka jingbuh teng kaba la sdang ban paw madan ïa kaba kim lah ban buhrieh katba nang mih ki bnai bad ki sngi. Ka dei shaphang ka ILP kaba ki la kular ban ïa leit sha Delhi ban leit ïa kynduh ïa u Myntri ka Tnad Kam Pohïing ka Sorkar Pdeng ïa kaba ki la buh por mynshuwa hadien ka Republic Day, hynrei kumba paw mynta la nang ïai buhteng tad ynda la kut ka Election MLA ha Delhi. La ïohi shai kdar ba ka jingbuh teng kan nang ïaid na kawei ka por sha kawei pat ka por. Namrkata ban pynkyndit ïa ka jingbuhteng ka jong ki don kawei ka kyntien ïa kaba la thoh ha ka ktien nongwei “Don’t put off till tomorrow whatever you can do taday”. “Wat ju buh teng lashai ïa kaei kaba phi lah ban leh mynta”.
Mynta la ïohi shai kdar namar ka jingbuh teng jong ki nongmihkhmat paidbah ki jong ngi bad ka jinglehbym suidñiew ka jong ki ka pynlong ïa ki nongdawa ILP ban tied ïa ka jingkhang bad ban pynsngew ïa ki tyndong shkor ki jong ki bad khamtam eh ïa kane ka sorkar mutlop bamsap khaïi tuh kaba la saphriang baroh kawei ka Ri India hapoh ka jingïalam ka NPP kumta la kyntu ïa ki nongdawa bad ïaleh ïaka jingshisha. Bad kane ruh ka dei ka por ba dang khluit kumta ngi la dei ban sah beit ïa u prek hep, ai na shata dar, tangon eh daiñ daiñ hep myn dang saw u nar” namar ba ka Ri India ka dei ka Democracy Country. Te kumta uno uno ne kano kano ka kynhun ki Seng Samla Pule ne Seng Bhalang ki don ka hok ban ïakhih ïa kano kano ka sorkar kaba synshar hapoh kane ka jylla ha Ri India jong ngi. Lada kam snga ne leh kuman ïa ka jingdawa ka jong ki. Ym tang kata ki don ruh ka hok ban pynkhyllem ïa kano kano ka sorkar kaba synshar bad ban wanrah pat de da kawei ka kynhun bad lada katei ka kynhun kam lah ban wanrah ne leh katkum ka jingdawa u paidbah lah ruh ban thoh ne pyntip sha U Governor ban pynjari noh da kawei ka bor synshar kata ka President Rule.
Baroh baroh ngi la kdew kti bad ngi la kynnoh bad ha ka juh ka por ngi la pynrem ïa ka Sorkar pdeng kaba la pynlong aiñ ïa ka CAA mynta hangne ha ri India jong ngi, hynrei ngi ïa klet pat ban ïa kdew kti bad pynrem ïa kawei ka Seng, kata ka dei ka Seng Congress ha ka por (Late) Prime Minister Indira Gandhi kaba la pynrung beaiñ ïa kiwei pat ki nong shong shnong kiba na East Pakistan kaba ngi tip dei ka Bangladesh mynta. La ïohsngew ba ha utei u snem ka la don ka jinghiar thma pyrshah da ka West Pakistan ïa ka East Pakistan (Bangladesh) ha kaba da ki lak bad ki phew lak ngut ki la shah pynïap ha katei ka thma ïa kaba la jia ha u snem 1971-1972. Kumta ka Ri India kawei na ki ri ba marjan ki la kner la ka jong ka kti ban ai jingïarap bad ai jingkyrshan ïa ka East Pakistan (Bangladesh) ban ïaleh pyrshah ïa ka jingwan thombor bad wan hiar thma da ka West Pakistan.Kumta da ka jingïarap jong ka India da ki lak bad ki phew lak ngut ki poi wir Refugee na katei ka ri ki la wan kiew khamtam eh hapoh kane ka jylla Meghalaya bad sha kawei kawei ka jylla ba marjan ruh kumjuh. Ka jingwan rung ka jong ki ka long lyngba ki thaiñ Border Balat Shella, Hatmawdon bad kiwei ruh ki jaka, la ïohi ba ka Sorkar India ba ryngkat ka jingïatrei lang bad ka Sorkar Meghalaya ki la pynkhreh ïa kita ki Camp ban shong ban sah ma ki ïa kaba ngi tip da ka Refugee Camp kum ha (Mawlait shong) Lawbah,Balat, Majai bad shawei shawei ruh kumjuh. La ïohsngew bun bun napdeng kitei ki poiwir ki la ïap namar ka jingpang jingshitom bad bym biang shuh ka bam ka dih, la tep ïa ki kum ki ksew ki miaw ha kitei ki jaka. La ïohi ruh ba kawei na ki ri hapoh ka dewlynnong Asia kata ka ri Japan ka la noh synñiang kum ka jingïarap da ki spah tylli ki truck ban kit ïa ka jingdonkam jong kitei ki poiwir ïa kaba ngi ju tip bad khot ki truck Japan ha kato ka por. Hadien ba ka thma ka la kut baroh nakitei ki poiwir refugee ki hap ban leit phai biang sha la ka ri hynrei la ïohsngew ha ka por ba ki leit phai pat sa tang khyndiat ki dien mih. Ka jingkylli mynta ka long shaei ki don mynta ki dien rung? Dei na kane ka daw ka pynlong ïa ka Sorkar Meghalaya ha katei ka snem ban ai present ne ai sngewbha shi lyngkhot ka khyndew kaba don ha Umpling hajan ka Nongbah Shillong ïa kaba ngi la tip paidbah baroh haduh kine ki sngi kiba mynta ka Refugee Colony bad ha kitei ki snem bym pat donkam ïa ki Epic ban leit thep vote kumba long mynta. Kitei ki poiwir Rufugee kila ïoh da kaba suk ban pynrung kyrteng ha ka Electoral Role jong ka sorkar Meghalaya bad ka hiar pateng la pateng wat ha ki khun ki kti ki jong ki haduh mynta mynne. Haba kumne hato dang lah mo ban ïabeh dkhar. La ïohsngew ruh la jan man ka por ba ki seng bhalang ki pynlong jingpakhang shnong hangne ha nongbah Shillong bad shawei shawei ka jingeh kaba ki ïakynduh ka long ha katei ka jaka ba shong ki khar Bangladesh. Teng teng la ïohsngew ba ki ju ong AMAR BARI AMAR BASA NUER MON, NUER KHUSI KUNNU MANODS BANDO PARTO NA. Ka ïing ka sem ka jong nga katba nga mon ngan leh mano mano ruh ym don ba lah ban phah khang. Ka jingkren jong ki nongïalam Congress ïa kiba la mih lyngba ki lad pathai khubor ba dei lyngba ka CAA ba shah ñion beiñ ki Khasi haduh katne. Kane baroh ka dei tang ka nia politics. Ki jingshisha ka la paw shai kdar ba dei ka Congress kaba la ri la sumar ïa ki naduh kitei ki snem ba mynshuwa. Namar ka kyntien ruh ka ong “wat ju pynsyaid ïa u ‘seiñpuh ïoh u puh kylla’ kane ka la wan jia shisha kumba long ha kine ki sngi ba mynta.
Haba ngi ïa phai shaphang kawei ka aiñ kaba dang pynithuh shen dang katto katne bnai mynta da ka sorkar pdeng Delhi hapoh ka jingsynshar jong ka sorkar (NDA) National Democratic Alliance ba la ïalam da u Prime Minister Narendra Modi, ïa kaba ngi ïatip paidbah jong ka Ri India bad kane ka aiñ (CAA) kumba ka paw kan ym knieh noh ïa ka hok jinglong trai jongno jongno ruh hynrei ka jingthmu jong ka sorkar pdeng ban wanrah khnang ïa kane ka aiñ ka long tang ban ailad ïa kiwei pat ki rit paid kiba don ha ka Ri bamarjan ba kin ïoh lad ban long ki nongshongshnong ba pura jong kane ka Ri. Khnang ba kin lait na ka jingshah ñion beiñ bad leh shiliang khmat ha kiwei pat ki Ri. Kumba u kpa ka jaidbynriew u Mahatma Gandhi u ong “To seve the people is to serve God, ban shakri ïa u para briew ka long ban shakri ïa U Blei, bad kumjuh ruh love your neighbours as you yourselves ieit ïa ki para marjan kumba ieit ïalade.
Kumba long mynta ka Ri India jong ngi bad baroh ki jylla kiba don hapoh jong ka ki hap ban mad sa kawei pat ka aiñ Iakjakor kaba shyrkhei bad kaba sngewtriem haduh katta katta bad kata ka aiñ ka dei ka ((NRC) National Register of Citizenship, la ïohi shai kdar ba lada kane ka aiñ kan pyntreikam ym don Hindu, Muslim,Kristan, Kristan bad baroh ki jaidbynriew kiba shong basah hapoh jong ka kin hap ban mih noh napoh kane ka ri. Lada kim lah ban pynbiang ïa ki kot ki sla kiba biang wat lada ki la kha la pun hapoh kane ka ri, la ïohsngew ba lada ka sorkar kan pyntreikam ïa kane ka aiñ kan pan ki kot ki sla ba donkam baroh khamtam eh ka syrnod sngi kha jong ki kmie ki kpa tymmen, Kumba long mynta ka Jylla Assam ka la long kawei na ki nuksa ïa kiwei pat ki jylla ba marjan, la ïohsngew bad ïohi hapoh kane ka jylla kumba long mynta wat kito ki shipai kiba Ia ïoh ïa ka Award khusnam riew shlur kiba la ïarap ban ïa khun bad ban len lade na ka bynta ka India haduh ba kin da ïap ha ka thma Kargil ha ki por barim, pynban mynta kine ruh ki hap ban mih noh ha kano kano ka por lada ka sorkar ka bthah ïa ki ban kin mih tang namar ba kim lah ban pynbiang ïa ki kot ki sla ba ka sorkar ka dawa ban pynbiang.
Kumba long haduh kine ki sngi kiba mynta tang hapoh ka jylla Assam ki don haduh 1 9 lak ngut ki briew kiba la don lypa hapdeng ka jingma bad ki lah ban shah beh ha kano kano ka por na ka Ri India namar ka jingbym biang ïa ki kot ki sla ba ka sorkar ka pan ban pynshisha la ka jinglong trai jong ki ha kane ka Ri. Katkum ka jinglum jingtip na kitei ki 19 lak ngut 14 lak ngut ki dei ki Hindu bad 5 lak ngut ki dei kiwei pat ki jaidbynriew. La ïoh sngew ba katba nang mih ki sngi ki la sdang ban ïa khih khohreh shano kin leit phai hynrei kumba long mynta baroh ki la phai khmat sha kawei ka jylla kaba mar jan ka jylla kaba laitluid bad laitlan kata dei ka jylla Meghalaya kaba la thoh ruh da ki sign board kiba heh baheh bad ba lah pynïeng baroh arliang surok Shillong sha Guwanati Assam ryngkat bad ki jingthoh Welcome to ‘Meghalaya the land of Peace” la pdiang sngewbha ha Meghalaya namar ba ka dei ka ri jong ka jingsuk dei na kane ka daw kum ki khar trei surok ba la ïalam da ki contractor ki rung ki mih Ia jan man la ka sngi bad la jan man ka por la kum ka jong ka ïing ka jong sem la jong khlem ki kot ki sla kiba biang ban p)ynshisha.
Te hashwa ba katei ka umsaw kan wan ban tyllep ki nongmih khmat paidbahjong ngi kiba u paidbah u la jied ki dei ban pyndonkam hok ïa la ka jong ka iktiar kaba u paidbah u la bynshet ha ki ym ban shuh hun lang ha ka jingbuhteng lane tharai. Kiba bun na ki riew shemphang bad kiba ïohi jngai ki la ibit bad dei shisha ban pyntreikam noh mardor da ka ILP (Inner Line Permit) hapoh kane ka jylla ka jong ngi khnang ban lait na ka jingrung kyrthep jong kiwei pat ki jaidbynriew na kawei pat ka jylla bad ha kajuh ka por ban ïada lypa ïa ka jingwan rung jong kitei ki 19 lak ngut kiba la don lypa ha khappud Assam Meghalaya kata ha Khanapara. La ïohi shai kdar ba lada ka sorkar MDA kaba synshai mynta kan pynlong khun jakai ïa katei ka ILP kumba la dawa da ka COMSO bad kumjuh ruh ruh ki Seng Bhalang khlem artatien kitei kiba la don lypa ha u pud u sam kin sa rung ha kano kano ka por bad khyllipmat namar ba ka aiñ hangne ha jylla jong ngi kumba la dep mad bad ïohi kadei tang ka aiñ matlah ki infiltration Check Gate man la ki dong bad ki jaka ki kylla long pynban ki Money Hand Cheque, la ïohi shai kdar ba lada ka sorkar kan dang ïai sngap mynthi bad leh kuman haba ïadei bad ka ILP ym artatien ei ei ruh em kitei kiba la don ha utei u pud u sam jong ka jong ngi bad ka Assam kin sa wan ban rung tuh hapoh ka jylIa jong ngi bad ha kajuh ka por kim salia shuh wat ban pynibor ryngkat ka motto jong ki “Life unto death” bad ha kata ka por kaei ka ban sa jia ka jingïaleh mar kylliang kan don bad haba don ka jingïaleh ka jingïaumsnam ka don bad haba don ka jingïaum snam ka jingïap ruh kan don. Ha kata ka por mano ban kitkhlieh bad mano pat ban shah khrai khlieh, la pashat ha phi ki paidbah nongpule ban ïa pyrkhat ïa kane. Kumta la ïohi shai kdar ba dei lyngba ka ILP ka ban long ka stieh kum ka nongïada ïa ka jaidbynriew barit paid ka jong ngi khnang ba u paidbah nongshong shnong ha ka jylla ki lyoh un nym poi ha ka dum bad ha ka lyngngoh.