Press "Enter" to skip to content

Lahduh i heprit ba 9 snem ïa ka jingïakop mareh 3000 meter

Thaw rekod ka Meghalaya Games – 2020:

Shillong, Rymphang 18: Ka Meghalaya Games mynta ka kynti ka la ïoh ban thaw rekod hadien ba i heprit ba dang 9 snem ka rta na Sakwang, Mawkyrwat, SWKHD i Lyntijingkyrmen K Jahrin i la lah ban pynliem lut ïa baroh ki thei mareh kiba la kham heh ka rta ha ka jingïakob mareh ba 3000 meter jong ki U-17 kaba long ha ka sngi Ba-ar ha madan JN Stadium, Polo, Shillong.
Itei i heprit i dei i wei na ki 9 ngut ki nongïamareh bad i la lah ban pyndep ïa ka jingmareh ha ka 11 minit bad tam ruh bun shah ïa kitei ki 8 ngut kiba la ïashim bynta. Na ka liang itei ki heprit i la ïathuh ba im ju pep ban mareh step da ka thong ba ha kawei ka sngi in long i nongjop ha ka jingïakop mareh, hynrei ngam shym khmih lynti ba ha kane hi ka kynti nga la long i nongjop “Ngam shym khih lynti ban jop ha kane ka jingïa mareh”, i la pynpaw.
Itei i heprit i la ïathuh ruh ba 5 haduh 6 baje mynstep i ju pynlut por ha kaba mareh step. Watla ha ka karta kaba dang 9 snem pynban ine i heprit i la buh ïa ka thong ba in khur takma ha ka National Games kaban long ha Meghalaya ha u snem 2022.
I heprit Lynti-jingkyrmen K Jahrin i dei i khun ba lai napdeng hynriew ngut shi para jong i Kong Donboklin K Jahrin bad i Bah Dakerlang Sohphah bad i dang pule ïa ka klas IV.
U nonghikai jong itei ki heprit, Bah Jopsingstar Ramsiej u la ïathuh ba u la ïohi ïa ka sap kyrpang jong itei i heprit naduh ba i dang kham rit khamtam haba im thait kloi kum kiwei ki para khynnah haba ki ïa mareh, kumta ka la pynktik ïa ka jingmut jong u ban shim ïa itei i khynnah ban ai jinghikai shuh shuh da ka thong ba ha kawei ka sngi in sa long i jongjop.
Kum ka jingpynshlur jong ia itei i heprit, na ka liang u General Secretary ka Meghalaya Athletics Asso ciation (MAA), Bah Finely L Pariat u la pynkup burom ïa itei i heprit da ka khusnam pisa ha ka jingïadonlang ruh u Vice-President ka MSOA, Bah Ian Lyngdoh.
Na ka liang u Bah Finely u la ong ba kum ka synjuk ki kmen haduh katta katta watla itei i heprit im pat ïoh ïa ka jingpyntbit kaba pura hynrei i la pyni pat sha ka pyrthei ïa ka sap ba kynsai kaba long ka jingkyrmen ïa ka Meghalaya ban tikna khur takma ha ka National Games kaban sa long ha u snem 2022.