Press "Enter" to skip to content

Mih ka hukum thung nonghikai shipor mar ïa phah jingthoh u Dr Mukul

Shillong, Rymphang 18: Shi sngi hadien ba u Dr Mukul Sangma, Nongïalam ka Liang Pyrshah ha ka Ing Dorbar Thawain ka Jylla Meghalaya, u la phah jingthoh sha u Myntri Sorkar Jylla ba dei peit ïa ka tnad Education, u Bah Lahkmen Rymbui, halor ka mat ïa kren ba ïa dei bad ki katto katne ki Lower Primary School ha ka Jylla kiba la jan poi sha u pud ba ki lah ban nym treikam shuh na ka daw ka jingbym thung ïa ki nonghikai, u Ambrose Ch Marak, Director of School Education and Literacy, Meghalaya Shillong, u la pynmih jingpynbna da ka jingthoh kaba hukum ïa baroh ki Sub-Divisional School Education Officer, Meghalaya ban pyntreikam ïa ka jingpynjlan ha ka jingthung kam nonghikai ba shi por sha ka 59 sngi.
U Director of School Education and Literacy, ha kane ka jingpynbna u la pynpaw, “Khnang ban pynthikna ba baroh ki skul ha
ki jingpeit jong phi kin ïaid beit bad treikam khlem kano kano ka jingwit, la hukum ïa phi ban pynmih ïa ka hukum ban pynjlan ïa ka jingthung kam nonghikai shiport ba mynta shisien sha ka 59 sngi naduh ba pynmih ïa kae ka shithi”.
“Nga la ïoh pdiang jingtip na kiba mih khmat na ki School Managing Committee bapher bapher ba haduh mynta ym shym la don ki nonghikai kiba la ai kaiphod ba kin wan hikai ha ki katto katne tylli ki skul bad kaba la wanrah ka jingklumar jingmut kaba khraw hapdeng ki kmie ki kpa bad ki nongshong shnong”, la ong u Dr Mukul Sangma ha ka shithi sha u Myntri Sorkar ba dei peit ïa ka tnad Education.
Une u Nongïalam ka Liang Pyrshah u la ong ba u la kren ruh ïa u Director Elementary and Mass Education & Literacy ban wad bniah ïa ki daw halor kane. “Nga dap da ka jinglyngngoh ban lap ba ka don ka jingbthah da ka Sorkar Jylla ba ym dei ban thung nonghikai adhoc ne shipor kumba ka tnad ka dei ban pyndap ïa ki jaka kiba duna nonghikai namar ka Sorkar ka thmu ban thung ïa kine ki jaka ba thylli tang hadien ba la pynbna ïa ka result Meghalaya Teachers Eligibility Test (MTET)’, la ong u Dr Mukul Sangma.
U la kyntu ruh ïa ka Sorkar Jylla ban pyndap ïa kine ki jaka ba thylli jong ki nonghikai khnang ban ïoh sdang noh ïa ki jinghikai ha ki skul bapher bapher. Da kaba khmih lynti ïa ka jingtuklar shim khia na ka liang u Myntri Sorkar halor kane, u Dr Mukul u la ong ba kane ka mat ïa kren ka dei bynta bad ka jingshim jingkitkhlieh ban bud ryntih ïa ka kyndon ka Article 21A ka Constitution ka Ri India bad kumjuh ïa ka RTE Act 2009 na ka bynta ki khynnah pule kiba wan na ki longing kiba kham duna ka ïoh ka kot.