Press "Enter" to skip to content

Shibit mynmiet yn ïa kynduh u Amit Shah ïa ka kynhun MDA ban ïa kren ILP

Shillong, Rymphang 14: U Myntri Sorkar Pdeng ba dei peit ïa ka tnad Kam-Pohing, u Amit Shah, u lah ban khot ïa kynduh ïa ka kynhun na ka Sorkar Meghalaya Democratic Alliance (MDA) shbit ka miet (19/02/2020) ynda la palat ïa ka 10 baje ban ïa kren halor ka jingdawa pyntreikam ïa ka Inner Line Permit (ILP) ha ka Jylla Meghalaya.
Ka tyllong khubor ka ïathuh ba ka Sorkar MDA ha ka jingïalam u Myntri Rangbah, u Conrad K Sangma, ka don ka jingkyrmen kaba skhem ban ioh ïa kren sani bha bad u Amit Shah . Kum ban shu kdew ba ka kyhun na ka Sorkar MDA ha ka jingïalam u Myntri Rangbah, ka la leit sha Delhi ha ka sngi ba ar ban leit wad lad ban ioh ïa ka por ïa kynduh ïa u Amit Shah ban ïa kren ïa ka jingdawa pyntreikam ïa ka ILP.
Ka kynhun ka la don lypa sha Delhi ban ap kmang tang shu ioh lad ban ïa kynduh noh ïa u Amit Shah. Ha ka sngi nyngkong u Myntri Rangbah ka Jylla Meghalaya u la ong ba u la dep wad lypa ïa ka por ban ïa kynduh ïa u Amit Shah hynrei ym pat ioh jingpynthikna satia.
Ka sien ba khatduh ba u Myntri Rangbah u la ïa kynduh ïa u Amit Shah ka la long ha ka taiew ba nyngkong une u bnai ha kaba u Amit Shah u la ong ïa u Myntri Rangbah ban ïa kynduh pat hadien ka elekshon ha Delhi.
Kane ka dei ka sien kaba lai ba ka kynhun na ka Sorkar MDA kan leit ïa kynduh ïa u Amit Shah naduh ba la mynjur da ka Resolution da ka Ing Dorbar Thawain ka Jylla Meghalaya ban dawa pyntreikam ïa ka ILP ha ka Jylla ha ka 19 tarik u Nohprah jong u snem ba la dep.
Ka sien ba nyngkong , u Amit Shah u la phah wan ïa ka Sorkar Jylla hadien ka Christmas bad New Year. Kaba ar pat ka long hadien ka Republic Day bad kaba lai pat mynta hadien ka elekshon ha Delhi.
Katkum ki tyllong khubor la ïathuh ba na ka liang ki nongmih khmat kiba la don lang sha Delhi nalor u Myntri Rangbah, ki long u Bah Hamletson Dohling, u Bah Banteidor Lyngdoh, u Ba AL Hek, u Bah Lambor Malngiang, u Bah Nujorki Sungoh, u Bah Adelbert Nongrum bad kiwei pat ki lah ban poi mynta ka sngi ha Delhi.