Press "Enter" to skip to content

Wan thep kyrteng sa ki kyrtong ka NPP bad Congress na ka bynta ka by-elekshon MDC na Langrin

Mawkyrwat, Rymphang 18: “Ha ka kam saiñ pyrthei ym lah hi ban neh ha ka juh ka party ne ha u juh u nongïalam hynrei ka don beit ka por ba ngi hap ban kynriah nawei shawei, namar katta, kum ka party Congress mynta ka kynti ka don hi ka jingkyrmen ba da ka jingwan phai biang jong kiba bun khamtam lei lei jong u MLA barim jong ka Ranikor u M.M. Danggo kan sa long ka jingai mynsiem na ka bynta kiba bun”, ong u bah Jotin Khardewsaw, kyrtong MDC jong ka Party Congress ha ka elekshon jied nongmih khmat shiteng samoi sha ka Ing Dorbar Thawain ka Khasi Hills Autonomous District Council (KHADC) na Langrin Constituency.
Shuh shuh ula pynpaw ruh da ka jingwan phai biang jong ki nongïalam kiba rim kiba la dep ban pynïasoh shipor bad ka Party NPP, ka don ka jingkyrmen .“Namar kumba ka paw ba ha manla ki jaka bun ki ‘riew tymmen ha ka por ba u M.M. Danggo u leit sha ka party NPP don kiba shu thep bym banse hynrei mynta kumba la paw ba un sa wan phai biang sha ka party Congress ngi don ka jingsngewskhem ba ki paidbah nongkyrshan kin sa ai hi ïa kata ka jingkyrmen ban poi sha ka thong jong ka jingjop”, u la ong.
Haba kren pat na ka liang jong u bah M.M. Danggo, MLA barim jong ka Ranikor Constituency u la ïathuh ba ha ka 05/02/2020 u la dep ban ieh noh shadien ïa ka party NPP bad ula don ka jingthmu ban wan phai biang sha ka Party Congress.
“Ka jingwan phai biang jong nga sha ka Party Congress ka dei hadien ba nga la ïa kren sngewthuh jingmut bad ki ïalam jong ka party bad ban ai ruh ka jingkyrshan kaba pura na ka bynta u kyrtong jong ka Party Congress”, la ong u bah Danggo.
Na ka liang jong u MLA ka Umroi Constituency, u bah George Bantei Lyngdoh pat u la pynpaw ba kum ka party ka dap da ka jingkyrmen kaba khraw ha kane ka kynti kaba mynta namar da ka jingwan phai biang jong u MLA barim u bah Martin M. Danggo ban ai ka jingkyrshan ïa ka party.
“Ngin lah ban jop kumba ka paw ba hapoh ka party ngi don ïa kata ka mynsiem jingïatreilang ha baroh ki liang naduh ki shnong ki thaw. Kaba donkam mynta ka long ba kum ki paidbah nongkyrshan, ha kum kane ka por ki dei ban don ka mynsiem jingïatylli ha ka jaitbynriew khnang ban lah ban wanrah ki jingkylla ha kiba bun ki kam”, ong u bah George.
Ha kawei pat ka liang, u kyrtong MDC na ka Party NPP, u bah Kitborlang Nongrem ula leit ban thep ïa ka kyrteng kum u kyrtong jong ka party NPP ha kane ka kajuh ka sngi . U la ong, “Haba don kano kano ka jingïaleh kum u briew hi u don ka jingkyrmen ban ïa khun beit shakhmat ban ïoh ïa ka jingjop. Ban ong ïa kata ka rem ne ka jop, ha nga hi nga ap beit ïa ka sngi niew vote ba kan sa batai ha kaba ïa dei bad kane ka jingïaleh”.
Katba na ka liang jong u Dr. W.R. Kharlukhi, President jong ka NPP Meghalaya State Unit ula bynrap da kaba ong ba kumba ka Party NPP kumba ka la dep ban kular ban pynïoh ïa ka Civil Sub Division kumta ka la urlong bad ha kajuh ka por kane ka party katha duh ban da ïoh ïa ka bor shynshar ka la ïaleh haduh 20 snem. “Te namar katta, halor ka jingmih noh u Bah Danggo na ka party NPP , ngi kyrmen ba kan nym don kano kano ka jingktah ïa ka party kumba la paw ba lada um don uwei, u mih bad wan pat sa da uwei pat bad kyrmen ba kito kiba la ai ka jingkyrshan ïa u bah Kit Nongrem kin dang ai hi ka jingkyrshan kaba pura”, u la ong da kaba pan jingkyrshan na ki paidbah.