Press "Enter" to skip to content

Wat la mad bun ki jingeh, kyrshan ka longkmie ïa ka ïing da ka kam die soh bad ashar

Nongpoh, Rymphang 18: Ha kum kane ka pyrthei kyrduh kam kyrduh jam kiba bun ki samla ki poi sha ka lynti jong ka jingjot na ka daw ka jingbym ioh kam ioh jam ha kaba ki la shah ban pynngop ha ki jingdih basniew kum ka kyiad bad u drok bad teng tang kane ka jingong ba kyrduh kam kyrduh jam ban ngop pat sha ki kam sniew ka long kaba bakla.
U Nongthoh Khubor u Mawphor u la pyrshang aban wad bniah haduh katno kane ka jingong ba ka jingkyrduh kam kyrduh jam ka ialam ïa ki samla sha ka jingsniew bad teng teng lada bishar bniah kane ka jingong ba ym don kam donjam ka dei tang ka jingshim kabu ha kaba bun ki briew wat hapdeng ka jingduh jingkyrmen ki pyrshang hi ban ieng ha la ki jong ki kjat ban leh ïa kano kano ka kam tang ban pynim jakpoh ïa ka ïing ka sem.
La lap ba ka surok 4-lane ha Ri Bhoi ka la dei kawei na ka jingkyrkhu sha bun ki longïing longsem kiba ym donkam don jam, namar ha shi lynter katei ka surok la iohi ba la dap da ki dukan harud ka surok kaba long kawei na ka lad ai kam ai jam ïa kito kiba ym donkam don jam.
Lah ruh ban ong ha shi lynter ka surok 4-lane ha Ri Bhoi District, da ki hajar kito kiba ym don kam don jam ki la im jakpoh da kaba buh ïa ki dukan rit kiba kynthup ka jingdie kum ki kwai, ki Sikret, ki ashar, ki soh ki pai da kaba ki shna ïa ki dukan kiba malu mala.
Haba wad bniah halor kine ki jingdon ki dukan, u la ioh ruh ban ïa kren bad kawei ka Longkmie na Dulongnar kaba la pynshai katto katne kumno ka im bad ka bsa ia ka ing ka sem da kaba buh dukan harud surok.
Kane ka dei ka Kong Erles Nongkseh na ka Shnong Dulongnar bad kaba don saw ngut ki khun bad katkum ka jingiathuh katei ka Kong la ong ba lyngba katei ka dukan ba ka buh harud surok ka bsa ban pyndap ïa ki jingdonkam jong ka ïing ka sem.
Ka la iathuh ruh ki mar ba ka ju die ha katei ka dukan rit ki kynthup ki jhur ki jhep, ki sohtrun, ka kait bad ruh ki Ashar ba ka la shna hi ban pyniaid ieng na ka bynta kito ki nongleit nongwan bad kumba longhaduh mynta hi ka don ka jingeh ba teng teng kam lah ban pyniaid iew ia ki mar ba ka die na ka daw ka jingduna ki nongleit nongwan.
Ka la iathuh ruh ba wat la katta ruh dei na katei ka dukan ka la shu kyrshan ban pynim jakpoh ïa ka ing ka sem bad ka don ruh ka khep ba ka hap ban mad ïa ka jingduhnong bad kumba la lap halor kane ka jinglong jingman la sngewthuh ba kito kiba pyrshang ban ieng ha la ki jong ki kjat ki shem jingeh na ka daw ba kam don kano kano ka lad jingiarap na ka sorkar ban kyntiew lem ïa kano kano ka kam kaba ki leh ha kum kane ka pyrthei kyrduh kam kyrduh jam.