Press "Enter" to skip to content

Yn leit ïa kynduh ka BJP Meghalaya ïa u CM ka Assam ban kyntu ïakren pynbeit pud

Kwah da ka polisi ‘ai bad shim jaka’ ban weng ïa ki jingïakynad :

Shillong, Rymphang 18: Ka seng saiñpyrthei Bharatiya Janata Party (BJP) Meghalaya State Unit kan ïa kren bad u Myntri Rangbah ka Jylla Assam, u Sarbananda Sonowal, halor ka jingsahteng ka jingïakynad khappud hapdeng ka Jylla Meghalaya bad ka Jylla Assam da kaba sngew don jingmut ban pyntrei kam da ka polisi ‘ai bad shim jaka’ ban weng syndon ïa kane ka jingeh.
Haba kren ha ki lad pathai khubor ha la sngi ba ar, u President ka BJP Meghalaya State Unit, u Bah Ernest Mawrie, u la ong ba ka kynhun na ka Party kan leit ïa kynduh ïa u Sonowal ban ïa kren ïa kane jingïakynad khappud, kaba long ka mat ïa kren kaba la sahteng hapdeng kine ar tylli ki Jylla lah da ki phew phew snem.
“Ha ka por shwa ka elekshon, man la ki seng saiñpyrthei ki kular ban weng ïa kane ka jingeh kaba mih na ki jingïakynad khappud. Hynrei hadien ka elekshon ki klet lut. Ngi la rai ban ïa kren ïa kane ka mat bad ka Jylla Assam”, la ong u Bah Mawrie da kaba bynrap ba kane kan long ka jingmyntoi na ka bynta baroh at Jylla namar dei ka seng saiñpyrthei BJP kaba bat ïa u lakam synshar ha Assam.
U la ong ba ïa ka kynhun yn thaw ban ïoh rah ïa ka jingtyrwa katba kiwei kiwei ki ban ïa don bynta lang kum ki bor synshar shnong, ki autonomous district council bad kiwei kiwei pat yn sa kynthup lang.
U la ong ba ki don 12 tylli ki jaka ba jia ki jingïakynad khappud hapdeng ka Meghalaya bad Assam kynthup ïa ka Tarabari, Gizang, Hahim, Langpih, Borduar, Boklapara, Nongwah-Mawtamur, Khanapara-Pillangkata, Desh Doomreah, Block I & II, Khaduli-Psiar bad Ratachera —kaba long kumba 2,729.14 square kilometre.
Kine ki 12 tylli ki jaka la dep shim jingithuh da Joint Official Committee hadien ka jingïakynduh hapdeng ki Myntri Rangbah na kine ki Jylla naduh ka 26 tarik u Jymmang, 1983. Kine ki jaka borabor la sakhi ba ki mih ki jingïakynad na ka por sha ka por ha kaba la kynnoh ba ki ophisar na ka Sorkar Assam ki la pyni ïa ka jingtam pud pyrshah ïa ki jaidbynriew Khasi-Pnar kiba shong ba sah ha kine ki jaka khappud.
Ha kane ka jingthmu tyrwa, ka BJP ka la rai ban weng ïa kane ka jingeh da kaba ai jingmut ban pyntrei kam ïa ka polisi ‘ai bad shim jaka’ hapdeng kine ar Jylla.
Ha kane ka sngi ka Party ka la pynskhem shuh shuh ki nongkitkam ha kaba u bah David Kharsati, John Manner Marak, K.C. Bora, kong Bianca Kyndiah, Thomas Marak bad u Dipayan Chakraborty ki la shah jied Kum ki vice-president
U Myntri Sorkar barim, u Bah Sing Mulieh bad u Bah G.C. Nongbet kin bat ïa ka kam General Secretary katba u Sarwan Jhunjhunwala un dei u Treasurer. Nalor kine la jied ruh hynriew ngut ki Secretary ba kynthup ïa u Bah Lakhon Biam, ka Kong Marian Maring, u Arvind Yadav, ka Kong Bernadette Lyngdoh, ka Sujata Chetri bad ka Arundhati Paul.
Ïa u Bah Krishon Langstang la pynkhamti da ka kam kum u President Yuva Morcha bad ïa ka kam President Kisan Morcha la pynkhamti ha u Pramod Koch.