Press "Enter" to skip to content

Ka Sorkar ka la dei ban pyrkhat thymmai ba jur ka dheng kali

Ka jingdheng kali ha nongbah Shillong ka la long kawei na ki jingpang kaba ka tnat Pynïaid kali jong ki Pulit (Shillong Traffic Police) ki ïakynduh mawsiang bha ban pynduna watla ki la wad ïa ki lad ki lynti bad pyndonkam da ki buit ban weng ïa kane ka jingeh kaba ki paidbah nongleit nongwan ki mad jingeh.
Ka dawbah jong ka dheng kali ha nongbah Shillong ka dei hi na ka daw ka jingailad ïa ki kali ar shaka bad saw shaka ban pynieng ha shilynter jong ka surok. Ka tnat Shillong Traffice Police wat ha i bor barit ka la pyrshang kat ha i bor barit ban weng ïa ka jingdheng kali ha ka nongbah Shillong, hynrei kumba ka paw, ka jingkharoi ki kali ha ka nongbah ka la nang kiew nang kiew katba nang mih ki sngi. Ka jingkharoi ki kali ka la pynsuhsat ym tang ïa ka tnat Pulit hynrei wat ïa ki paidbah nongïaid nongieng kiba ïakynduh mawsiang ha ka leit ka wan namar ka surok ka sah hi kumjuh naduh ba la pynkha ïa ka Jylla Meghalaya na ka Assam.
Haba peit ïa ka jingdheng kali ka dei na ka jingdon jong ki katto katne ki nongniah kali kiba pynieng kat haba lap ba shem ïa ki kali katba ki sngew bit. Ha ki snem ba ladep mynba ka Sorkar Pdeng ka la mynjur ban pynjari da ka jingsynshar u President (President’s Rule) ha Meghalaya, ka jingdheng kali ka duna bha haduh katta katta. Ki paidbah ki kohnguh sneng haduh katta katta ïa ki bor jong ka aiñ. Ka jingpyntreikam jong ka Shillong Traffic Police ïa u “Khnap” (Clamp) kam pynpei skhor ïa ki nongniah kali namar ki pynieng ïa kali wat ha ki jaka ba la thoh “No Parking,’ kaba wanrah pat ïa ka jingsuhsat jong ki nongniah kali kiba bud ïa ki kyndon aiñ niah kali bad ïa ki nongïaid nongieng. Ka jingbym biang ki lynti ïaid kjat ka buh jingma haduh katta katta ïa ki nongïaid lynti namar ki don ki khep ha kaba ki paidbah ki hap ban ïa synrud lang bad ki kali. Ka jinglong amriang jong ki nongniah kali kiba pyrkhat tang ïa ka malade ka wanrah ïa ka syrtok ïa kiba bun. Nalor kata ka jingpynieng kali ha ki jaka ba khim ka la nang pynjyrwit jyrwat shuh shuh ïa kiwei pat ki kali nalor ba ki surok ha nongbah Shillong ki long kiba khim. Ka daw kam dei namarba ki nongniah kali lehse kim tip ïa ki kyndon aiñ niah kali hynrei ka dei tang namar ka jingsngew baheh. Ka tnat Pulit watla ka la pynshitom ïa ki nongpynkheiñ da kaba shaiñ kuna bad da kaba pyndait da u Khnap pynban ki paidbah ki dang ïai leh saitlah ïa ki jingmaham bad jingmana jong ka tnat Pulit.
Ka jingailad ban pynieng ïa ki kali shilynter ka surok ka dei kawei na ki daw bah kaba ju wanrah ïa ka dheng kali namar ki don beit ki riewshimkabu ki ban phrung ban pynieng ïa ki kali wat haba ki la ïohi pylleiñ pylleiñ ba wat jaka pynieng kali ruh kam don shuh. Tangba biang ka malade shimet, kam pher watla kiwei ki suhsat ne ki khñium.
Ha Khyndai Lad ka jingailad ïa ki taksi kamai ban pynieng katba mon ha ka surok Keating Road ban mih sha Khyndai Lad ka dei ka dawbah kaba wanrah ïa ka jingkhapngiah. Ha Motphran, ka jingailad ïa ki Bos Saw ban leh mon bad leh trai kat haduh ban pynlong kum ka Parking Lot hapdeng surok ki dei ki dawbah kaba wanrah ïa ka jingdheng kali kaba jur bha ha ka surok Guwahati-Shillong Road. Ïa kane lah ban sakhi khamtam ha ka por janmiet, ha kaba ki kali Bos Saw ki ïaid kum ki mattah ban thep pyndap da ki nongshong kali khlem pyrwa la ka surok ka don hapdeng ka jingdheng kali. Nalorkata, sa ka jingdon ki nongdie madan hapdeng surok ka la pynwit shuh shuh ïa kane ka surok ha ka thaiñ Motphran kaba long ka kad khaii kaba ju thnem bha da ki nongleit nongwan bad ki nongthied nongpet baroh shingi.
Ha Laitumkhrah, ka daw na ki jingdheng kali ka dei namar ba ka long ka jaka pdeng jong ka shlem pule puthi jong ka sor Shillong bad ka Jylla Meghalaya ha kaba baroh kiba khynnah skul bad ki samla pule na Sor bad ki shnong Khapsor ki ïabeh ban phah skul sha ki skul kiba don ha Laitumkhrah. Da ki phew hajar tylli ki kali kiba tyllun ha ki surok ka Laitumkhrah ha ka shi sngi nalor kata, sa ki kali kiba wan na Jowai. Kane ka dei ka daw kaba la idonkam haduh katta katta ba ki bor pynïaid skul ki la dei ban pyrkhat thymmmai ban weng ïa une u sohkyrdot da kaba buh noh da ki School Bos kumba la ai jingmut da ki Rangbah Shnong bad ki Principal jong ki skul ha ka jingïalang bad u Director General of Police (DGP) ha u snem baladep.
Nalorkata, ka Sorkar ka la dei ban tei noh da ki Rural Market khnang ban pynduna ïa ka jingwan tur ki briew na ki khap Sor Shillong khnang ban weng ïa ka jingdheng kali ha Sor. Ynnai ïakren ïa ka jingdheng kali ha Them Iew Mawlong kaba dei ka kad khaii kaba ju thnem da ki paidbah kiba wan na kylleng ki shnong nongkyndong ban wan siew wan tda bad wan donkam manla ka sngi sha Sor Shillong. Ka Sorkar kan ym lah ban weng ïa kine ki jingeh lymda ka knieh noh ïa ki jaka kiba la shah klun ha ki riewshimet khnang ban tei da ki Parking Lot ne ki jaka pynieng kali namarba watla ka Sorkar ka la tei ïa ki jaka pynieng kali phewse kane kam shym la lah satia ban law ïa u sohkyrdot ba ki paidbah ki ïakynduh mawsiang.
Ka ladei ka por ba ka Sorkar Jylla kan hap ban pyrkhat thymmai ban pynïar ïa ka Sor sha ka New Shillong kumba ka la thmu naduh ki snem kiba mynshwa namar katba nang mih ki bnai ka jingbunbriew ha ka sor ka la nang kiew artet. Lada sha kiwei pat ki jylla ki lah ban weng ïa kane ka jingeh, balei ka Sorkar ha kane ka Jylla kam lah ban loit ïa une u sohkyrdot. Ka shong eh ha ka mot bajwat jong ka Sorkar ban leh ïa kaba donkam haba ka kam ka shah hakhmat na ka bynta ka jingbit jingbiang hi jong ki paidbah ba bun balang.