Press "Enter" to skip to content

Ryngkat bad ka jingroi ki Balang ki paidbah ruh ki roi lang

Bah Philip Marweiñ

Ki shnong ki thaw ba shong shnong ki Maram, Nongtrai, Lyngngam, Muliang, Garo bad khyndiat ngut ki Nepali jong ka Civil Sub-Division Mawshynrut, mynta, ki la kham kiew khyndiat ha ka bor pyrkhat, ka jingsngewthuh bad ha ka ïoh ka kot namar ka jingroi jong ki kynhun balang Khristan. Ki balang khristan kiba kham paw ha kane ka thaiñ ki dei ka balang Presbyterian bad ka balang Katholik. Kiwei kiwei ruh ki don tangba kim da paw eh. Dei kine kiba la tur naphang ïa ka raieh raidam ban pynïar ïa ka Hima jong u Blei bad ban pynsngewthuh ïa ka kyrdan longbriew manbriew. Kumne ka long ha kiwei kiwei ki jaka ruh jong ka Meghalaya bad jong kane ka thaiñ shatei lam mihngi jong ka Ri India bad wat jong ka pyrthei ruh. Khyndiat une u nongthoh u kwah ban thoh katto katne shaphang ka jingshem jong u haba u la leitpoi dang shen sha ka thaiñ Nongtrai,Maram,Lyngngam, Muliang bad Garo jong ka bynta sepngi jong katei ka Civil Sub-Division.
Kawei na ki tnat balang Katholik ka ba dei jong ka Nongstoiñ Diocese ka la leit buh ktem ha ka shnong Nongjri kaba jngai kumba 35 kilo metre na Riangdo. Kane ka tnat balang kaba ha Nongjri la khot ka St. Mary of the Angels Parish. Kane ka dei khmih ïa kumba 43 tylli ki shnong. Kine ki shnong ki dei- ka Nongjri, Dhapor, Lumkynjang, Umkait, Mawshut, Pyndenkirit, Lawdap, Mawdonglang, Jririangsin,Nongthymmai, Japung, Mawkohram, Nongriangken, Mawkyllon, Pormawleiñ, Langdongdai, Mawguru, Porla, Mawsmai, Nonghawei, Lumsohsan, Porshken, Madanjira, Rathaw, Jynruniangbrat, Lumdiengjri, Borkhe, Mawdiang, Nongkubur, Mesei, Umkap, Portharnang,Nonghadok,Jasyllar, Mawkhar, Mawiaper, Agreng, Dubil, Nongpdeng, Mawblei, Dambur, Santapor bad Poriu. Ka jingbun briew jong kine ki shnong ka la kot kumba 18,000 ei ei bad tang ki khristan Katholik ki la kot kumba 5500.. Ki don lai ngut ki phadar kiba trei ha kane ka Parish na ka seng riewniam Franciscan of Asisi hapoh ka jingïalam jong u phadar Stephan Lamin. Ba la seng ha ka 2/2/2014 kane ka Parish ka trei borbah ban pyniar ia ka Kospel jong u Jisu Krist ha kine ki shnong bapher . Ka ïaleh katba lah ban ai jingnang jingstad shaphang U Blei bad ka jingstad pyrthei ruh. Ban ai jingsumar ha ka koit ka khiah ka la buh ia kawei ka Dispensary ha Nongjri hi bad ka buh 43 tylli ki L.P, 8 tylli ki U.P.S bad kawei ka Secondary School. Kiba la pyndep ïa ka Matrik ki la don kumba 100 ngut tam bad kumba 36 ngut na ki kristan jong kane ka Parish ki don ha ka kam sorkar. Kito ki bym pat nang ban thoh bad ban pule ruh ki dang bun bha bad nalorkata, kiba la pep skul noh shiteng por ki kynrei bha. Ka khubor kaba pynsngewbha ïa baroh ka long ba ka jingïapoi kha khynnah ka la duna haduh katta katta.
Haba phai kyllum sha ki nongshongshnong jong kane ka thaiñ, kumba la kdew haphrang, ki briew ki im da ka rep ka riang. Ka rep shyrti ruh ka dang kynrei bha. Ka rep kaba kongsan ka dei ka rep kba, sying, synsar bad ka rep soh rep pai (horticultural cultivation) ka dang duna bha. Hooid, ka jingrep ïa kito ki jait jingthung kiba man peisa kloi kloi (cash crops) ka dang duna bha bad bun ki dang shu sdang ia ka rep diengsoh bapher. Ki rep jhur ruh kam pat da rung bha ha ki. Kaba da ïohi shai ka long ba ki dang rep tang ïa ka shriew, Phandieng, pathaw, sohkhia. Ka rep Kait, sohpieng, sohtrun sohkynphor, sohmrit, kwai tympew bad kiwei kiwei ka dang duna palat. Ka khubor kaba pynsngewsih jur ïa ngi ki para khasi bad Garo ka long ba kiba don khyndew lajong ki long tang khyndiat eh. Ka dang don hi ka khyndew Raid kaba malu mala hynrei kiba bun eh ki briew kim don ka khyndew lajong (Landlessness is acute). Hato phi lah ban mutdur ia kane ka apot. Ka khyndew ba kham bun ka la leit sha kito ki khyndiat ngut kiba kham don kham em. Haba bishar bha na ka jingïathuh jong ki sordar, ki secretary shnong, ki Nonghikai bad kiwei ki nongïalam balang la ong ba ka ïoh ka kot jong ki babun ki longiing, ka long malu mala (average) kumba hapdeng T.70,000/- haduh T.1,00,000/- shisnem na baroh ki lad jingïoh bad kham bun na kane ka jingïoh ka long na u sying, synsar bad u sohmynken ba la thung ha lum shyrti. Ki don ruh kiba ri Masi, syiar bad sniang hynrei ka dang duna haduh katta katta. Ka khyndew jong kane ka thain ka sbur bad ka seisoh bha hynrei ïa ki mar-rep ym pat lah bha ban pynïaid ïew ha ka rukom kaba dei namar dang duna palat ki surok. Ki surok kiba la don ruh ki dang sniew palat.
Ha ka liang ka pule puthi ki dang don tang ki L.P skul bad khyndiat tylli ki U.P skul. Ki Secondary skul ruh kim pat don bha, yn nai kdew ïa ki H.S.S bad ki Kolej. Ban leit pule kham shalor hap leit sha Nongstoiñ, Shillong lane sha Guwahati. Na ka bynta ki jingsumar ban ïoh jingkhiahkrat hab ban leit sha Nongstoin, Shillong bad Guwahati namar ki Sub-Centre ha ki shnong bad PHC ha Riangdo kaba jngai kumba 35 kilo metre na kane ka thaiñ ruh kim pat lah ban pynbiang ïa ka jingsumar, khamtam ym don doktor, ki nors, ki dawai, tang ha Riangdo ki don 2 ngut ki doktor bad khyndiat ngut ki nors. Ha kaba ïadei bad ka Umbam Umdih ruh ka sorkar kam pat lah ban leh ei ei, hab ban shaniah ha la ki jong ki tyllong um ba kyrsoi ha ki jan kper bad ha them jong ki lum. Ha kaba ïadei bad ki iew ki hat na ka bynta ka jingdonkam jong ki paidbah nongshongshnong ki dang hab ban leit sha iew Bamer hajan Mangsang bad ha Riangdo kiba jngai na kane ka thain. Ki bor sorkar jong ka Meghalaya, ki la iehnoh khunswet kumba 48 snem ïa kane ka thaiñ kyndong kaba ïakhap bad ka East Garo Hills, ki tnat sorkar bapher bapher kim phaikhmat sha kane ka dong. Tang ka Mawshynrut Block ka la ai jingïarap skhim malu mala, hynrei tang shu poi ka NREGS ka la long ka jingkyrkhu ïa kine ki shnong. La iathuh ba ka Soil Conservation bad ka PHE ki la leh thohmut thohmat mynshuwa na ka bynta kane ka thaiñ. Ka PWD ka la noh synñiang da kaba shna ïa ki katto katne ki surok wat la ki dang sniew palat ruh bad dang bun bah ki shnong ki bym pat ïoh surok bad ki paidbah ki dang dei ban ïaid bun kynta ban poi sha ki iew bad sha ki jaka kiba la kham kiew shaphrang. Ki ophisar heh jong ka sorkar khamtam kiba na Riangdo bad Nongstoiñ kim leit jngoh satia ïa kane ka thaiñ.
Ka khubor kaba sngewkthang tam ka long ba ki MLA bad MDC kiba mynta bad kiba mynshuwa ruh kim phaikhmat satia sha kane ka thaiñ. La ïathuh da ki sordar bad ki secretary shnong lem bad ki babu ba hikai skul bad kine ki nongmihkhmat ki poi sha ka thaiñ tang ha ka por wan tong briew ban ïoh ïa ki vote. Kane ka thaiñ ka hap ha Mawshynrut Constituency bad katto katne tylli ki shnong ki hap ha Rambrai-Jyrngam Constituency jong ka West Khasi Hills District. Kane ka thaiñ ka jngqai kumba 75-80 k.m na Nongstoiñ bad kumba 180 k.m na Shillong.