Press "Enter" to skip to content

4 ki takma ksiar khur ka Alyzza M Lyngdoh ha ka Swimming

“Nga shu peit buit tang lyngba ka Youtube”

Shillong, Rymphang 20: Ka Aliza N Lyngdoh ka la ïoh ban khur lut ïa baroh ki takma ksiar ha ka jingïakop jngi ba la pynïaid da ka Meghalaya Swimming Associaton ha ka lympung ïalehlai Meghalaya Games 2019-20 ïa kaba la pynlong da ka Meghalaya State Olympic Association (MSOA), ha ryngkat ka jingïatreilang bad ka Directorate of Sports and Youth Affairs.
Ka Aliza M Lyngdoh khun jong u Bah Michael Pakynteiñ ka dang pule ha ka klas IX ha Pine Mount School, Shillong ka la ïoh ïa ka nam Best Swimmer hadien ba ka la khur lut ïa baroh 4 tylli ki takma ksiar na ki kyrdan ïakhun ba kynthup ïa ka Backstroke, Butterfly, Freestyle bad ka Breaststroke.
Haba ïakren bad u Mawphor, watla ka Aliza M Lyngdoh ka la ïoh khur haduh 4 tylli ki takma ksiar pynban ka la pynpaw ïa ka jingsngew diaw halor ka jing bym don ki nongai jinghikai (Coach) ban ai ka jinghikai kaba paka kumba long ha kiwei ki jaka. “Nga sa poi sha kane ka kyrdan ruh dei lyngba ka jingtrei shitom hi da kaba nga shu peit lyngba ki YouTube kumno ban nang ha ka rukom jngi”, ka la ïathuh.
Shuh shuh ka la ong ruh ba lada ki don ïa ki nongai jinghikai kiba biang ka kyrmen ba kin nang lah ban ïoh shuh ki jingtip ha kaba ïadei bad ka rukom jngi. “Watla ngi la shu pyrshang hi na lade hynrei peit ngi la lah pat ban kiew haduh katne, katno tam lei lei lada ngi don ïa la ki jong ki coach nga ngeit skhem ba ngi nang kham tbit shuh shuh”. Ka la ong.
Kat haduh mynta ka Jylla Meghalaya kam pat don ïa la ki jong ki coach kiban ai jinghikai ha katei ka jait jingïalehkai.
Ka Aliza N Lyngdoh ka la ju leit ïashim bynta ruh ïa ka Jylla wat sha ki jingïakop jngi shaduh ka National Level hynrei namar na ka jing bym don kiba ai jingkyrshan khamtam na ka liang ka sorkar lehse ki jingthmu ba shakhmat jong ka kin sa shu long sepei noh.
Ka Jylla Meghalaya ka don shibun ki thei bad rangïalehkai kiba tbit bad kiba don la ki jong ki sap ki phong la ka long ha ka Football, Swimming, Basketball bad kiwei kiwei hynrei lada kam don kan kano ka jingïarap khamtam na ka Sorkar bad lada kam khmih bad peit ïa kiba kum kita ka lawei ki khun samla kiba don shisha ïa mynsiem ban thrang ban poi sha ka thong lehse kan shu kut noh tang ha ki jingphohsniew.
Na ka liang u Bah Michael Pakynteiñ u la ai khublei ïa ka tnad sport kaba la shim ïa ka sienjam ban pynlong ïa kane ka lympung ïalehkai hynrei u la ong ba lada ka shu kut tang noh shisien ka long ka jingpynduh mynsiem khamtam ïa ki nongïalehkai.