Press "Enter" to skip to content

Ïeng rangbah ka longkmie pyrshah ïa ki Pulit kieng atiar ka Assam ha Langpih

“Da jap ruh, ai re tnan ïah kper lahjong”:

Langpih, Rymphang 20: Marwei hapdeng ki pyrton jong ki Pulit Assam kiba kieng atiar, ka Kong Sngewbhalin Paliar na Umwali, ka la ïeng da ka jingshlur ban pyrshah ïa ka jingwan thombor ban knieh jaka ka Assam ha Umwali ha ka sngi ba ar.
Ka Video kaba la paw mynta ka sngi, ka pyni ba kumno i Kong Sngewbhalin, da ka mynsiem ba shynrang khlem jingsheptieng, i la tur sha ki Pulit Assam ban kren beit da ka ktien shnong la jong. Ha kane ka Video, la ïoh sngew ba ine i longkmie i la tur beit sha ki Pulit Assam bad ong, “ai re ai re kane kper, ai ka kper lah jong, da jap ruh ai re tnan… mut shu wan knieh jubor iah kper ki bru? Phuit ka ksew…chamraiñ kan re wan knieh jubor iah kper ki bru, phet baroh khei, mut wan leh aiu hah ne “ Katba kiwei pat ki paidbah bad ki Pulit ka Assam ki dang shu ap lyngngoh ïa ka jingshlur ine i longkmie, uwei u Pulit Assam da ka jingtitar u la tur sha i ryngkat bad ka sumar kti bad ong, halla mot karo, halla mot karo..chup”.
Wat hapdeng kane ka jingkynhied une u Pulit Assam Ine i Kong i la bteng ka jingïania da kaba pynpaw ka jingbitar ba ki la wan ban knieh jubor ïa ka kper jong i, kaba i la thun la tep bad wat haba une u Pulit Assam, u la kynhied ïa i, im shym la sngap, hynrei i la pyneh beit triang tad haduh ba uwei u Pulit ba kham heh kyrdan u la wan pynjem bad tan noh ïa u Pulit jong u sharud.
Kane ka jingïeng rangbah kane ka longkmie da ka jingshlur, kadei ha ka por ba ki Pulit Assam kin wan ban kyntur pud sha Umwali, Langpih da ka jingthmu ban tei ïa ka Border Out Post jong ka Assam.
Hadien kane ka jingjia na ka liang ki dkhot ka HYC West Khasi Hills, ki la leit sha katei ka jaka bad ki la pynlong ka jingap miet haduh mynta ban ïada ïa kane ka jaka.
Hadien ba kane ka Video ka la paw ha ki Social Media, kiba bun ki briew ki la ïaroh ïa ka jingshlur i Sngewbhalin ban tur pyrshah ïa ki Pulit ka Assam. Bun ki la ong ba ine I longkmie, idei ka nuksa na ka bynta ki paid Khasi ban ïeng ban ïada ïa la khyndew ka shyiap bad ong ruh ba lada ki paid Khasi ki shlur ban ïeng kumne, ka Assam kan nym nud satia ban wan thombor kumne.
Ka kynhun “Ïada la ka Ri”, ha ka kyrwoh ba la phah da u Bah Ardent Miller Basaïawmoit, ka la ai ka jingïaroh kaba khraw eh ïa ine I longkmie bad ïa ki para Khasi shynrang bad kynthei, kiba la pyni ka jingshlur mynsiem ban khang pyrshah ïa ka jingwan thombor ki Pulit Assam ban shna ktem ha Umwali.Ka “Iada la ka Ri”, ka kyntu ia ki paid Khasi ban buh ka jingduwai ba kyrpang ïa kine ki riewshlur ba U Blei Un ïada ïa ki na ki bor Pulit ka Assam. Ka kynhun ka pynpaw ruh ba lada ki paid Khasi baroh ki don ka mynsiem shynrang bad ka mynsiem jingieit ïa la ka Ri kumba long kine ha Langpih, ka jaidbynriew kan jin da la lait na ki jingshah thombor ki briew ba nabar, la ki long ki riew shimet ne ki briew jong ki bor sorkar. Ka Kynhun, ka pynpaw ka jingkmen ïa ka jingïatylli jong ki ban ïada ïa la ka ri.Ka dawa ruh na ki bor sorkar jylla ban leh tyngeh ïa kane ka jingwan thombor  ka Assam ne wat na ki khappud ka Bangladesh ruh.