Press "Enter" to skip to content

Lehnohei ka sap kyrpang ki samla ha ki 16 snem ba la dep?

Ka Meghalaya Games lane ka lympung ïalehkai kaba nyngkong eh kaba la pynlong hadien 16 snem ha ka Meghalaya lehse ka lah ban pynlong ïa kiba bun ki samla ïalehkai ba kin khih met ne don ka jingkyrmen na ka bynta ka lawei ïalehkai jong ki la ka long ha kano kano ka jait jingïalehkai. Hynrei ka long pat kaba sngewsih ban ong lane lah ban kynthoh ruh halor ka jingthiah thai jong ka sorkar ba la dep kaba synshar ha kine ki 16 snem kaba khlem leh ei ei ne shimkhia ban pynlong ïa katei ka lympung.
Ka jingkylli kaba mih mynta kadei ïa ka sorkar Congress kaba synshar baroh shi katta snem ïa ka jylla halor ka jingbym shimkhia jong ka ban pynlong ïa kum kitei ki lympung kiba dei na ka bynta ban phrang ïa ka lawei ïalehkai jong ki hajar hajar ngut ki khynnah ïalehkai. Lah ban ong ruh ba ha kine ki 16 snem bun ki nongïalehkai ba tbit na ki distrik bapher bapher la ka long ha ka mareh, long-jump, high-jump, karate, tennis, boxing, shooting bad bun kiwei kiwei ki jingïalehkai, ki la duh ei ïa ka kabu ksiar ban pyni ïa ka jingtbit jong ki lane wat ban khur takma ksiar, takma rupa lada ka sorkar ha kito ki por ka pynglong ïa katei ka Meghalaya Games.
Don hok ruh ban kynnoh ïa ka sorkar ba la dep halor katei ka jingbym lerkam ka tnad Ïalehkai ban wad ki lad ki lynti kumno ban kyntiew ïa ka sap jong ki samla. Baroh shi katta la shu ïohi ba kut beit ha ka phutbol bad kriket. Lada dei lei lei ba kam don shuh ka lympung ïalehkai ba ju pynlong na bynta ki skul, kiba bun ki nongïalehkai kiba khlaiñ kum ka basketball, ne ka tennis, karate, longjump, high jump, boxing bad kiwei kiwei (lait noh ha ka mareh), ki la duh lut ïa ka kabu ksiar.
Ha kawei pat ka liang, kane ka sorkar ba mynta ka la dei ban ïoh ïa ka jingiaroh watla ka kyndit bynriew hadien lai snem ba la iaid ka bor synshar. Ka sienjam ba ka shim ban pynkhie im pat ïa ka Meghalaya Games hadien 16 snem kadei shisha ka rai rangbah. Wat ki nongpyniaid jong baroh ki jingïalehkai watla ki thnum ba ka sorkar ka kyndit bynriew hadien palat phew snem, hynrei ki iaroh pat ba ka por kam pat dier ban sdang biang.
Tangba, kawei pat kaba kane ka sorkar kan kynduh mynta, ka long ba ka por ka la dier bha bad ka buh ruh ka jingartatien la ki nongïalehkai na kane ka jylla ki lah neem ban ïalehkai bha ha ka lympung jong ka National Games kaba la buh ban long ha Meghalaya ha u snem 2022. Ka jingbym ïoh khur takma jong ki samla ha ka Khelo India Youth Games kaba dang shu lah shen ha jylla Assam kadei kawei pat ka jingsyier ïa ki nongïalehkai ka jylla ba kin ïoh khur takma.
Ym tang katta, kaba kham diaw ka long ym tang ïa ki nongïalehkai hynrei kawei pat kadei halor ki jaka ïalehkai, la ka sorkar ka lah neem ban pyndep ïa ki ha ka por kaba biang namar mynta ka don por sa kumba ar snem ei ei. Ka don ka jingma ba lada kam lah ban pyndep ïa ki jaka ïalehkai ne ki stadium bapher bapher ha ka por kaba biang ïa ka jaka lah ban rah ne pynkynriah noh wat sha kiwei ki jylla.
La katta, ka shong mynta ha ki kmie ki kpa bad ki synjuk bapher bapher ba kin shim lang ïa ka jingkitkhlieh ban pynkhreh bad pynkilan met ia la ki khun na ka bynta katei ka lympung heh jong ka Ri kaba la buh ban long ha u snem 2022, u snem ba ka jylla Meghalaya kan rakhe artad ïa ka jingdap 50 snem ka jingïoh la ka jong ka jylla kaba pura.