Press "Enter" to skip to content

Lyngba ka Meghalaya Games kyrmen ka MSOA ban khur takma ka Jylla ha ka National Games

Shillong, Rymphang 20: Ka Meghalaya State Olympic Association ka kyrmen skhem ba lyngba ka Meghalaya Games, ka Jylla kan sa ïoh ban khur bun ki takma ha ka National Games 2022. Ka Meghalaya State Olympic Association ka ba pynlong ïa kane ka lympung ka la ïoh mynsiem shibun na ki nongïalehkai kiba la ïashim bynta ha ki 14 tylli ki jait jingïalehkai kiba la pynpaw shisha ïa ka sap ka phong kiba la thikna ban khur takma ïa ka Jylla ha ka National Games ïa kaba ka Meghalaya ka la pynkhreh ban pynlong ïa katei ka lympung.
ïa ka Meghalaya Games yn sa pynkut noh ha ka sngi Thohdieng ha jingïalang kaba la buh ban pynlong ha Laban Indoor Stadium ha ka por 4 baje janmiet kaba dei ruh ka jingïalehkai kaba khatduh jong ka lympung ïalehkai Karate.
“Ngi sngewkmen shi katdei eh ban ïohi ba ka rukom ïalehkai jong ki khynnah ka la kiew,” ong u Bah John F Kharshiing Working President ka MSOA haba kren sha ki nongthoh khubor hynne ka sngi ha ka jingïadonlang ruh ki arngut ki Vice-Presidents u Bah Bor Diengdoh bad Bah Ian Lyngdoh bad u General Se cretary Chiranjib Choudhury. “Hap ban ai khublei kyrpang na bynta ki nongïa jngi um, kiba la jngi ha ka um kaba 10 degree. Ka long kaba phylla ban ïohi ïa ka mynsiem ïakhun kaba don ha ki nongïalehkai watla ki jop ne rem ruh.”
Haba ban ha kaba ïadei bad ka jingïakop jngi, u Ian Bah Lyngdoh u la ong ba ki nongïashim bynta na ki thaiñ nongkyndong ki la pyni shisha ïa ka mynsiem ïalehkai bad ïa kane la ïohi ruh lyngba ka jingïalehkai Basketball ha kaba baroh ki kyrdan ïakhun jong ki kynthei bad shynrang la ïoh rah da ka West Khasi Hills.
“Ka khan na kane ka lympung ïalehkai kadei ka jingkiew jong ki nongïalehkai na ki thaiñ nong kyndong bad ka MSOA ka kyrmen ba kine ki nongïalehkai kin long kiba ha khlieh duh na ka bynta ka National Games 2022 bad lada ki ïoh sa ïa ki jingai jinghikai bad ki jaka kiba biang kin sa thikna ban ïoh takma. Kaba kham itynnad shuh shuh kadei ba ki kmie ki kpa na ki thaiñ nongkyndong ki la wan ban kyrshan bad ai mynsiem ïa la ki jong ki khun bad lada phi ïakren bad ki phi sa sngewthuh ba katno ki trei shitom na ka bynta ban kyrshan ïa la ki jong ki khun,” ong u Bah Lyngdoh
Ka jingthmu ba hakhmat eh jong kane ka lympung ka long ban pynshlur ïa kito kiba don shisha ïa ka mynsiem ïalehkai bad la pynshlur ruh ïa ngi lyngba ka sap ïalehkai ba ki la pyni,” ong shuh shuh u Bah John. “Hadien ba la dep baroh ki jingïalehkai ngin sa ai ka kaiphod sha ka Sorkar Jylla ba kan shim pat da ki sienjam kiba kham shakhmat.”