Press "Enter" to skip to content

Mudui ki Waheh Shnong pyrshah ïa u Doloi Sutnga halor ka jingkynnoh ai jingbit ïa ka karkhana ha Sookilo

Khliehriat, Rymphang, 20: Lai ngut ki Waheh Shnong na East Jaintia Hills District ki la pynpaw ka jingsngewkhia halor ka jingioh jingbit (No Objection Certificate) jong ki karkhana thang Coke ha shnong Sookilo ban tei ïa ki Oven Plant jong ki bad la kynnoh ruh ba kitei ki karkhana ki la ioh syrnot NOC na u Doloi jong ka Elaka Sutnga,u Ma Erudit Sutnga
Halor kane, kine ki lai ngut ki Waheh Shnong ha ka 18 tarik mynta u bnai ki la ujor sha ka Additional Deputy Commissioner jong ka East Jaiñtia Hills District.
Kine ki lai ngut ki Waheh Shnong kiba kynthup ia u Ma Lamsuk Langstang u Waheh Shnong ka shnong Narwan, u Ma Shibor Langstang u Waheh Shnong ka shnogn Tympiahkasu bad u Ma Lim Shadap u Waheh Shnong jong ka shnong Sahkai ha ka shithi ujor ki la ong, “ka shnong Sookilo ka don hapdeng ka shnong Moopala, Narwan, Tympiahkasu, Sahkai, Umlawang bad kiwei kiwei ki shnong kumta lada buh ïa kane ka karkhana ha Sookilo kan ktah ïa ki shnong ki thaw bad ka jingma kaba khraw ka ap.’”
Haba ring nuksa ïa ki karkhana kiba don hajan shnong briew kiba ju pynmih ïa ka tdem, ka jingsma iwtung bad pynmih ïa ka lyer jakhlia, kine ki lai ngut ki Waheh Shnong ki la ong, “ngim sngew ïahap ban pdiang ïa kum kine ki karkhana ban don hajan ki jaka ba shongshnong ki briew.”
Ki la kyntu ruh ïa ka ADC jong ka East Jaiñtia Hills District ba kan shimkhia ïa kane ban pynsangheh noh ïa katei ka NOC ba la ai da u Doloi jong ka Elaka Sutnga bad ong ruh ka kane ka bym lah long kaba khlem don ruh ka jingpynsngew paidbah ne ka Public Hearing.
Ia kane ka shithi ujor, kitei ki Waheh Shnong ki la phah kopi ruh sha u Myntri jong ka ka Koit ka Khiah, u BahAlexander L. Hek, sha u Myntri jong ka tnat Commerce and Industries u Ma Sniawbhalang Dhar, sha u Member Secretary jong ka Meghalaya State Pollution Comtrol Board, sha u Superintendent of Police jong ka East Jaiñtia Hills District, sha ka ophis u Chief Inspector of Boilers and Factories bad sha u Secretary jong ka Executive Committee ka Jaiñtia Hilla Autonomous District Council (JHADC) bad kiwei kiwei.
Kumjuh ruh ha ka shithi ba ki la phah sha u Doloi ka Elaka Sutnga, u Ma Erudit Sutnga kine ki lai ngut ki Waheh Shnong ki la kyrpad da kaba ong, “Da ka mynsiem kaba sngewkhia ngi pynpaw ba ngi la ioh jingtip ba phi la ai syrnot NOC ïa ki karkhana thang Coke ban buh ïa ki Oven Plant jong ki ha Sookilo khlem da ïamir jingmut bad ki nongshong shnong ba marjan bad khlem da pynshong nia ruh ïa ki jingma bad jingjulor kiba kine ki karkhana kin wanrah. Halor kane ngi kyrpad jur ïa phi ban pynsangeh noh ïa kine ki syrnot NOC.”
Ia kane ka shithi ba ki la phah sha u Doloi, kitei ki Waheh Shnong ki la phah kophi ruh sha ophis jong u Deputy Commissioner ka East Jaiñtia Hills District u Bah FM Dopth.
Ka East Jaiñtia Hills District ka dei kawei na ki District ka Jylla kaba jyllei bha ki karkhana pynmih dewbilat bad ka dei ruh kawei na ki District kaba pahuh bha ha ka jingdon jong u dewiong bad u mawshun.
Ka jingpynjari jong ka Natioal Greeen Tribunal ia ka hukum ban khang tih bad shalan dewiong ka la buh jingeh bha ia ki paidbah jong kane ka District bad kumjuh ruh ia kiwei kiwei ki District ha ka jylla kiba im kamai jakpoh na kane ka kam. Ym tang katta, ka Sorkar Jylla ka la duhnong ruh da ki spah klur tyngka na ka jingiohlum khajna hadien ba ka NGT ka la pynjari ia katei ka hukum. U dewiong ba la shalan haduh mynta u dei uba la ai jingbit da ka Iingbishar Supreme Court.