Press "Enter" to skip to content

Ngin ym ailad ba ka Assam kan wan knieh jubor ïa ka khyndew ka shyiap jong ngi, ong ki nong Umwali

Baroh shimiet peitngor ki riew rangbah bad HYC ha jaka ba thmu buh ktem ki pulit Assam:

Nongstoiñ, Rymphang 20: Ka jingwan tur kynsan jong ki pulit Assam hynnin ka sngi ha ka shnong Umwali da ka jingthmu ban buh ktem pulit ha kawei ka jaka, kaba dei ka kper jong ka Kong Kwistilda Lyngdoh Marshilong bad u bah Klotsming Marweiñ, ka dei kaba la plan lypa, la kynnoh kitei ki trai jaka.
Hadien katei ka jingjia, hynnin ka janmiet u Samla Lumlang Kharsyiemlieh President ka Hynñiewtrep Youth Council West Khasi Hills ryngkat ki dkhot jong ka Rimuliang Circle, ki la hiar sha katei ka shnong ban ïakynduh ïa ki paidbah bad ban ai mynsiem ïa ki ba kim dei ban tieng ne rit mynsiem halor katei ka jingthmu jong ki pulit Assam ban thombor ïa ki jaka puta jong ki.
Ha katei ka miet ki la pynlong ïa ka jingïakynduh lang ha ïing jong i Kong Kwistilda ha kaba u Bah K.P. Pangniang u la donlang. Ha katei ka jingïakynduh lang ki la ïatai halor katei ka jingwan thombor jong ki pulit Assam na ka por sha ka por kaba la buh ïa ki paidbah ha ka jingshong syier.
Nangta ki riew rangbah jong ka shnong lem bad ki katto katne ki dkhot jong ka seng HYC, ki la leit ban ap miet baroh shimiet ha katei ka jaka ba thmu ban wan pynieng ktem ki pulit Assam. Baroh shi miet ki la ap beit ha katei ka jaka bad don ruh kiba la rah ïa ki jaiñ ki nep ban thiah baroh shimiet ha katei ka jaka.
Katba ha katei ka jingïakynduh lang ha iing jong ki trai jaka, la ïoh ïa ka jingkren bad ai mynsiem ïa ki paidbah lyngba u Samla Lumlang Kharsyiemlieh President ka HYC bad u Bah Pangniang.
U la ong ruh ba ki paidbah ki dei ban klet noh shuwa ïa kino kino ki jingïapher jingmut bad kin ym dei ban pynïadei bad ki kam saiñpyrthei. Hynrei ha kiba kum kine ki jingjia ki dei ban ïalong kawei.
Na ka liang u President ka HYC haba ai mynsiem ïa ki paidbah, u la ong ba ka jingïatylli ka dei nyngkong hapoh shnong bad haba ki paidbah shnong ki ïatylli ka seng ruh ka sngew shlur ban ai ka jingkyrshan ha kano kano ka por ba ka sorkar Assam ka wan thom bor.
Mynta ka sngi u Bah Bajop Pyngrope MDC ka Rambrai, u la hiar sha katei ka shnong ban ïakynduh markhmat ïa ki paidbah. Na ka liang jong u ruh, u la kyntu ïa ki ba kim dei ban sngew syier namar na ka liang ka sorkar ruh ka la shimkhia ban peit ïa katei ka jingeh.
Nalorkata, utei u nongmihkhmat u la kyntu ruh ïa ki bor pynïaid District jong ka West Khasi Hills ba kin phah shuh shuh ïa ki bor pahara ha katei ka jaka, na ka bynta ban wanrah ïa ka shongsuk shongsaiñ bad ba kan ym mih kano kano ka jingïaklumar.
Hadien ba utei u nongmihkhmat u la wan phai noh, la ïoh jingtip ba ki pulit Assam ki la wan kiew biang hynrei ym pat lah ban tip kaei ka jingthmu jong ki.