Press "Enter" to skip to content

Pynbthei ka HNLC da u bomb IED ha karkhana shna Coke

Kynnoh leh ‘Benami’ ki Politician bad kharkaia:

Shillong, Rymphang 20: Ka kynhun kiengatiar Hynñiewtrep National Liberation Council (HNLC) hynne ka sngi palei, kala pynbthei da u bomb Improvises Explosive Device (IED) ha kawei ka karkhana saiñ dewïong (Coke) ba don ha West Khasi Hills District.
Kane ka karkhana saiñ dewïong ka dei kaba don ha ka shnong Kyllon Mathei Pyndeng Jalong kaba don marjan ka shnong Riangdo. Ïa une u bomb IED la pynbthei ha ka por 1:15 baje mynstep bad ula pynjulor ïa ki katto katne ki nongkynti jong ka karkhana.
Kane ka jingjia kala pynkyndit bad pynrah mynsiem ïa baroh ki Nongtrei jong ka karkhana hynrei la pyntip pat ba ym shym la don kano kano ka jingjia ba sngewsih ne don ba mynsaw na kane ka jingbthei u bomb. La ong ba ki briew ba donkti kila pynpait ruh ïa ka Iit ba shakhmat jong ka Trok ba don marjan bad kane ka karkhana.
Ki Heh Pulit ka West Khasi Hills kila pynthikna ïa kane ka jingbthei bomb bad ong ba ka jingbthei ka dei kaba dang malu mala bad ym shym la don mano mano ba mynsaw. Ki Pulit ki pyntip ba ka jingtohkit mynta kala ïaid shakhmat ban lah pynithuh ïa ki Dkhot ka HNLC ba donkti.
U General Secretary-cum-Publicity Secretary ka HNLC Bah Saiñkupar Nongtraw ha ka kyrwoh, ula kam ba ka HNLC kala buh ïa une u bomb ha kane ka karhana namar ka daw ka jingtreikam ‘Benami’.
“Ka daw hi ka dei namar kine ki karkhana saiñ dewïong ki dei kam ‘Benami’ (Bah Gigur Myrthong) bad u Dharmu na Rajasthan. Ïa kine ki karkhana la pynïaid da ki bar jylla bad ka jingmih jong ki ruh ka dei da ka jingiarap jong ki riewsaiñ pyrthei ka thaiñ bad ki hehspah” kynnoh u Bah Saiñkupar ha ka kyrwoh.
Ka HNLC ka kam ba ka jingpynbthei ïa une u bomb IED ha Riangdo ka dei tang ka “jingsdang kaba rit’ ban pyni ba ka seng ka lah ban leh ïa kum kine ki jait kam ha ki jaka paidbah bad ruh kaba wanrah ïa ka jingïap bun ki briew.
“Ngi la pynbthei bomb ha Shillong Jhalupara bad Jaiñtia Hills khlem da pynmynsaw iano iano ruh. Man ka por la tynjuh ïa ngi da ki Pulit halor ka jinglah treikam jong ngi bad kane sa shisien ka dei ka jingmaham ba ngi lah ban buh bomb ha kano kano ka por ha kano kano ka kam bad kaei kaban jia kan long kaba shyrkhei” ong ka HNLC haba bynrap “Kane ka dei ruh ka jingmaham ïa ki Nongïalam Saiñ Pyrthei, ki Hehspah ba kin kiar na ka jingleh ïa ki kam bamsap”.
Une u Nongïalam ka HNLC ula ong ruh “Ka long kaba thamula ban peit ba wat ki Nongtrei jong kane ka karkhana shna coke ki dei lut ki bar jylla bad ki briew jong ngi kim shym la ïoh kam satia”.
Haba pynpaw ba ki thaiñ kum ka Riangdo, Shallang ki dei ki jaka khaii dewïong hynrei haduh ngim ïohi ïa kano kano ka kam pynroi ha kine ki jaka, u Bah Saiñlupar ula ong “Ki surok ki dei kiba jot rathai bad ka rukom im jong ki paidbah ruh ka long kaba isangsot. Da ki phew snem ngi ïohi ïa ka kam tih dewïong bad ki Hehspah kila im pahuh pahai ha Ri-lum Jaiñtia hynrei ym don kam pynroi satia. Ym shym la donw at tang kawei ka Hospital ba paka ne jaka sumar ha Ri-lum Jaiñtia. ”.
Haba kynthoh ba ka ïoh ka kot jong ka Jylla kala hiar bha bad ba ym shym ïohi jingkylla satia ha Jylla naduh ka jing synshar jong ka sorkar Congress haduh kane ka Sorkar MDA ba mynta, u Bah Saiñkupart ula ong “Baroh ki Nongmihkhmat sha ka Ïingdorbar Thaw Aiñ ka Jylla ki hap shim jingkitkhlieh ïa kane ka jinglong jingman hapoh ka Jylla”.
U Bah Sainkupar ula ong “Ki Nongïalam jong ngi kim shym la leh eiei na ka bynta ka Jylla lait tang ïalade bad ïohi ruh tang kumne ban pynheh ïa ki Bank Balance bad pynbun Nongkynti. Kila kylla long pynban ki kruiñ ba bamduh ïa ka spah jong ka Jylla. Dei namar jong ki ba ki paidbah kila mad jingeh mynta”.
Kumban shu pynkynmaw ba ki sengbhalang naduh ka KSU, HYC, FKJGP, WKSU, HNYF, HANM, WYF bad kiwei kiwei, ki la mih paidbah bad ïalam ruh ïa ki khynnah skul, ban pyrshah jur da kaba pynlong rally. Nangta ki la sei ruh ïa ki sakhi satar ba kitei ki karkhana ki dei kiba beaiñ, namar nalor ba la pynieng ïa ki ha ki shong briew, kim don ruh ïa ki kot ki sla kiba biang na ki tnad bapher bapher.
Ki nongïalam jong ka JAC, ki la leit ban ïakynduh bad ai jingthoh ruh hakhmat u Deputy Commissioner jong ka West Khasi Hills District ba u dei ban shimkhia halor ka jingleh donbor jong ki trai karkhana bad ba kim shym la don ïa ki syrnod kiba biang ban pynieng karkhana.Hynrei, ym kaei ka daw tad haduh mynta ruh na ka liang ki bor District kim pat shym la lah satia ban shim kam lane tuklar kham sted, watla la ïohi tyngkreiñ ïa ka jingeh ba ki paidbah ki ïakynduh na ka jingdon kitei ki karkhana beaiñ ha ka thaiñ Shallang baroh kawei.
Kumjuh ruh na ka liang ki paidbah ba bun balang, kiba la ïohi ha ki kot khubor halor ka jingkhih jong ki sengbhalang, ki sah mynta ha ka lyngngoh ba balei ki shu sngap jar jar halor kane ka kam, kaba mynta la kham slem ym shym la don ei ei shuh na ka liang ki nongïalam sengbhalang ban kren ne pynpaw.
Bun ki la sdang ban artatien ruh wat ïa ki nongïalam jong kitei ki sengbhalang bapher bapher da kaba ki la kynnoh ruh ba imat don ei ei mo sha lyndet, kaba la pynlong ïa ki ban kynran dien noh, lym kumta kaei ka daw. ‘Katto la mih paidbah la kren paidbah ha ryngkat ki khynah skul ha Shallang, hato kan shu kut noh tang kumto ?’…ki la kynthoh.