Press "Enter" to skip to content

WAT HAPDENG KA JINGïAKYNAd NANG KIEW KA AREA LANGPIH

Da u Bah Philip Marweiñ:

Ka jingïakynad kaba mih na ka por sha ka por na ka daw jong ka jingknieh jubor jong ka sorkar Assam ïa ki jaka puta bad ki khyndew ki shyiap jong ki Khasi bad ban pynshong da ki Nepali ha ka thain Langpih, Mynta ka la kham thanda khyndiat. Pynban ym lah ban tip lano ka jingïakynad kan bteng biang. Une u nongthoh u la leit jngoh ïa kane ka thaiñ dang shen bad u la lap ba ki Khasi, Garo bad ki Nepali kim shym la ïakhih ne ïakynad, pynban ki ïashongsuk bad ki ïakhleh milai ha ïew Langpih bad ki la pynleit jingmut ha la ki jong ki jong ki kam ki duk.
Ka long ka jingshisha ba ka sorkar Assam ka la buh kham slem ïa ka Police Outpost kaba khlaiñ bha ha Langhpih markhap bad ka ïew Langpih hynrei shaphang mihngi. Ka ophis jong kane ka Outpost ka heh bha. Nangta ki don ruh ki barrack bad quarter ba pynsah ïa ki pulit khnang ban ai jingïada ïa ki Nepali bad ïa ki shnong jong ki. Ha kajuh ka por ban iarap ia ki Nepali ban pynïar ïa ka hima Assam da kaba klun ïa ki jaka puta jong ki Khasi. Ka long ka jingshisha ruh ba ka Meghalaya ka la buh ïa ka Police Outpost kaba rit kumba 300 metre sepngi na ka ïew. Ha ka Area Langpih ki don shibun ki shnong Khasi, ki shnong Nepali bad katto katne tylli ki shnong Garo. Katto katne na ki shnong Khasi ki dei ka Mawlan A, Mawlan B, Langpih, Mawdiangsnam, Umyiap, Miangbyrkong, Umwahsiang, Dronpara, Umpha, Umbah, Umtap, Madan Jaiaw, Makoibari, Lawbah, Mawbynna, Umsram, Mawsikar, Umbyrsit, Iew Nongma, Nongma, Umwali, Nongmawleiñ, Nongmawlong, Madan Sohstap,bad kiwei kiwei. Kham bun na kine ki shnong la shongshnong da ki briew kiba na thain Maram. Lada kheinlang ïa ki Nepali kiba shongshnong marjan bad kine ki shnong Khasi ki la kot kumba 1000 ngut ei ei. Lada kheiñlang ia ki Khasi, Nepali bad Garo ha kane ka area baroh ka la kot sha ka 20,000 ngut ei ei. Kane ka long katkum ka jingiathuh jong ki sordar, secretary shnong bad ki riewkhmat jong kane ka thaiñ.
Katkum ka jingïathuh jong kine ki Rangbah kynthup ïa ki babu kiba hikai skul sha kane ka thain, ka synshar khadar ha kane ka thaiñ ka shong synjor bha namarba ki bor synshar hapoh ka Hima Mynsaw (mynshuwa la jer ka Raid Mynsaw) ha kaba kine ki shnong ki hap, kam skhem satia bad ka don tang ka jingïaknieh bor hapdeng u Syiem ba la thung da ka District Council bad u nongsynshar barim jong ka Raid Mynsaw. La ïathuh ba ïa ka ïew Langpih ruh, mynta, dang pynïaid da u nongsynshar barim. Ki riewkhmat jong kane ka area ki ïathuh ba ka don ka politiks kaba jur hapdeng kine ki nongsynshar hima bad la kdew ruh ba ki politishian ruh ki don kti ha kane ka kam.
Ki bor pynïaid shnong ki la ïathuh ba bun ki Khasi ha kane ka thaiñ ki la don la ki jong ki jong ki khyndew shimet (Khurit) bad tang khyndiat eh ka khyndew Raid bad ki khlaw ba rben jong kane ka thaiñ ki la lut ploiñ lait sa tang ki khlaw shnong ba ki paidbah kim shah ban pomdieng lyngkar. La iathuh ba ha ki khlaw ba rben ki la don shibun ki dieng kiba kynsai bad kiba remdor hynrei ki briew na Assam ki la dep pom da ka bor ban pynkit bak sha Assam. Ka jingmih jong kane ka jingbym salia ïa ka mariang ka long ba bun ki tyllong um ki la jah jynduh bad ki nongshong shnong jong kane ka thaiñki shem jingeh ban ïoh ïa ki tyllong um ban tong na ka bynta ka umbam umdih.
Ki paidbah jong kane ka thaiñ ki leit ïew ha Langpih kaba long pdeng bha bad bun kiba leit sha Boko bad sha ïew Nongstoiñ ban leit siew leit tda bad ban leit die ia ki mar-rep. Ka khyndew jong kane ka thain ka seisoh bha bad ki briew kiba shong ha kane ka thaiñ ki dei baroh ki nongrep. Ki mar-rep kiba kham kongsan ki dei u Sying, u Synsar, u Kba, Sohmynken bun jait, u Sohñiamtra, ki sohjew, sohphan, Sohkynphor, sohpriam, ka Kait, Sohtrun, soh Balensha bad ki la pyrshang ruh ban rep Diengsoh Apple. Ki don bun jait ki Kait ba ki rep kum ka Kait kaji, kait mon, kait saw, kaitkpu bad kiwei. Kaba phylla ka long ba ki nongrep ha kane ka thaiñ kim da smat ban rep jhur, laitnoh tang ki sohkhia, pathaw babun jait. Na ka liang ka Agriculture bad Horticulture ki ïalong paralok bha bad ki nongrep jong kane ka thaiñn. Ka la don ruh ka dak jong ka jingri dohkha, ri sniang, syiar bad Masi. Kane ka thaiñ ka khlaiñ bha ban pynmih Sying, Synsar bad Sohñiamtra. Kawei kawei ka longïing ka dang lah ban pynmih lai trok saw trok u sying, u synsar bad Sohniamtra bad khlem kheiñ ïa kiwei kiwei ki jait mar rep. ïa kine ki mar la shalan sha Assam, sha Nongstoin bad sha Shillong. Ki shnong kiba khlaiñ bha ban pynmih sohñiamtra ki dei ka Umtap, Umyiap, Madan Jaiaw, Mawdiangsnam, Miangbyrkong,Umwahsiang, Langpih, Umbah, Umpha, Dronpara, Umsram bad Lawbah. Khambun ïa une u soh la shalan sha Nongstoiñ, Shillong bad sha Assam.
Haba mih ki jingïakynad hapdeng ki Khasi bad ki Nepali, ki Pulit Assam ha Langpih ki ïashah ïa ki Nepali bad ki kem bikar ïa ki Khasi, rah sha Boko bad set along ïa ki. Kawei na ka jingïakynad hapdeng ki Khasi bad ki Nepali kaba la jia ha ka 14.5.2010 ha Iew langpih, ki Pulit Assam kiba ap ha Langpih O.P, ki la iashah ia ki Nepali bad ki la siat da ki kuli ia 4 ngut ki rangbah khasi ha ïew langpih. U Kolombus Hujon na shnong Umyiap, u Denis Nongsiej na Mawsikar, u Charles Lyngkhoi na Mawlan A bad u Ekros Rani na shnong Mawdiangsnam ki la kyllon ïap ha kane ka jingsiat. Mynshuwa ruh ki la jia ki jingïakynad hapdeng kine ar kynhun hynrei ki pulit Assam hangto ki la kem bikar ïa ki Khasi bad rah ïa ki sha Boko (Assam).
Ki Paidbah jong kane ka thaiñ ki thrang palat ba ka jingsuk kan wan synshar noh ha kane ka thaiñ ban ïaid beit ki shnong ki thaw bad ki jingtrei jingktah. Ki kwah eh ba ka sorkar Meghalaya kan ïabeit noh bad ka sorkar Assam halor u pud u sam, ba ki Khasi, Nepali bad Garo kin ïashongsuk shong saiñ, ba ki surok kin poi lut sha ki shnong bapher bapher bad kin long kiba bha, ba ki Nepali kin pynphai noh ïa ki khyndew ki shyiap ba ki la klun na ki Khasi bad ba ka kam Hima Mynsaw kan don noh ka jingsynshar kaba beit. Ka khubor kaba sngewsih ban iohsngew ka long ba ki MLA bad MDC kiba mynshuwa bad mynta ruh kim patiaw ban peit ïa ka bha ka miat bad ka roi ka par jong kane ka thain bad ki shu leit mih sha kine ki shnong tang ha ka por milekshon ban tong briew ban ïoh ïa ki vote jong ki.Kane ka thaiñ ka hap hapoh ka Rambrai-Jyrngam Constituency…